张国荣身边有个活动八宝袋（旧闻）

张国荣身边有个活动八宝袋 　

English below

去《大富之家》探张国荣，在现场见到一个叫阿英的大婶，这个英姐不离张国荣左右。佢穿一件背心，背心有几个口袋，口袋内有各式张国荣要应用的物件。张国荣每郁一下，英姐就知佢想点。比如， 佢大少爷烟瘾起，英姐就立即趋到递烟点火。佢咖啡瘾起，佢就即刻去冲咖啡，林某坐系度同辣士里倾偈，都有著数，有免费咖啡可饮。

一次，张国荣又望吓英姐，英姐即刻在口袋内掏烟，辣士里赞佢。『哈，阿英姐，你系醒目嘅，我郁一郁，你知我想食烟。』 辣士里同我介绍：『呢个阿英姐以前跟我嘅，我三十三场告别演唱会，佢跟足我三十三晚，佢服侍我十几年啦，新艺城拍戏开始，做到我退出歌坛…』略停。辣士里话：『呢部戏(指大富之家)演员太多，我搵阿英姐来跟我，等佢赚D钱过年。』最后这句我听得分明，分明是佢照顾佢，等佢有D收入，咁睇，辣士里都好识做人。有D温情。

在英姐身上，我又睇到辣士里嘅另一面，佢同侍候过佢嘅人之间时有嬉戏。英姐问辣士里：『依加得闲吗？』『又签名？』『系呀。』『要俾钱喎。』 『几多呀？』 『五元一张啦！』 『好，五元就五元。』很爽快的样子。英姐从佢口袋内掏出一叠张国荣的相片，叫张国荣签，佢地两个煞有介事咁系度数。英姐问：『签咗几多张呀？』好似真的要俾钱张国荣似的，又签了一叠，又问：『加埋系几多呀？』我出於好奇问：『你真系俾钱佢，佢真系收你钱？』『佢点会收我钱呀？』『你又计得好均真咁嘅？』『我同佢玩之嘛。』一老一少，时有如此这般的嬉戏。

英姐同我讲辣士里四年前告别演唱会最后一场，佢话：『果晚，场面好动人，天好冻，我攞住件大褛，企系度等佢落台。果个周润发系后台同我玩，死捉住我唔放，我都未来得及，辣士里冲落台，一支箭咁标，含住一泡眼泪，上咗架车，走咗。』我话：『我有睇果晚影带，辣士里好心伤，唔舍得…』辣士里话：『梗系心伤啦，每唱一只少一只...　唔再唱啦嘛！稍停，辣士里话：『果晚录影带，我一次都未睇过。』梗系啦，容乜易又一壳眼泪喎。

林冰