西游记粤语（林兆明讲古版）第四回
第四回
孙悟空喺桥外便演变咗一轮法术，满面春凤返翻入嚟高登宝座，将箇支如意金箍棒竖正喺当中，箇班马骝仔，有啲毋识死，见到支棍栋厾企噉企喺度咁好玩，就成班扑上嚟想抢嚟玩下，有啲撞到额头都肿晒，有啲撞到鼻血都出埋，箇支棍逳都毋逳仲系栋厾企噉放喺度，于是乎箇班马骝仔一个个咬手指，伸长条脷揸耳𢯎腮。
「大王，咁重你点托得返嚟㗎。」
孙悟空行前两步，一手搦起支棍。
「呢个叫做物各有主，呢个宝贝，镇喺海底已经有几千几百年，有咁巧噃，今年佢突然间放出金光，整定系归我嘅，海龙王箇老懵懂，佢毋识宝，佢以为呢䊆系铁，冇用㗎，其实呢支系叫做天河镇底神针，不过，老实讲，佢龙宫里便冇一个搦得起，仲话冇人逳得，先至叫我老孙攞咗出嚟，我最初睇呢个宝贝有两丈几长，𥮾底咁粗，我嫌佢大咗啲，佢即刻细返，我又叫佢再细啲再细啲，佢又细啲，再细啲，佢真系细啲，原来佢听我话，等到我攞到出嚟一睇，已经系而家咁大细，你地睇真下，上面仲有一行字，写住如意金箍棒，重一万三千五百斤，你快行开啲，等我再耍两道畀你睇睇。」
讲完佢一手就搦起呢个宝贝，叫声，细细细，一路细落去，细细下变咗支秀花针，箇只马骝王将绣花针收埋喺耳仔窿箇度。箇班马骝大声喺下便嗌：
「大王，小心啲，一阵跌咗落地好难攞得返嚟。」
「毋使怕。」
孙悟空又将支绣花针喺耳仔度攞返出嚟，放喺手掌心箇度，一连嗌咗几声，大大大，即刻又变返原来噉样，碗口咁粗，两丈长短，真系个个都佩服喺处拍掌称赞，马骝王越玩越得意，一手揦住支棍，跳上铁板桥头，跳到出洞外。
「大家跟住嚟睇下嘢，我何止呢支如意金箍棒会变，我都会变」
只见佢眯埋双眼，扎起马敨啖大气，变，本来得四尺左右高矮，突然间变做身高万丈，头顶三十三天，脚踩十八层地狱，嚇到满山虎豹豺狼，妖魔鬼怪，七十二洞洞主，个个魂飞魄散，跪晒喺度叩头参拜，一阵间，马骝王收咗法又变回原型，将箇支如意金箍棒变返支绣花针，收埋喺耳仔里便，返翻入洞内，大排筵席，欢庆美猴王得到件宝物。
第二日，美猴王又试嚟操练，佢将箇四只最多计仔嘅老马骝，封做四健将，将两只赤尻马猴，封做马、流二元帅，乜嘢叫做赤尻马猴呢，原来即系屁股红色箇啲马骝，又将两只通背猿猴封做崩、芭两将军，封赏完毕，就将箇啲安营扎寨，赏罚升降同埋所有垃垃杂杂嘅事务就交晒畀箇四只老马骝负责。
从此，美猴王就一无牵挂，每日云游四海，腾云驾雾，傲游天地之间，寻访英雄，广交朋友，又结拜咗七个弟兄，就系牛魔王，蛟魔王，鹏魔王，狮驼王，猕猴王，𤟹狨王，连埋佢呢个美猴王一共七个，成日就喺埋一齐讲文论武，饮酒作乐。早出晚归，真系风流快活，神仙不如。
有一日，孙悟空就喺水帘洞吩咐四健将，安排筵席，要请其他六个弟兄返嚟饮宴。大家就高高兴兴饮到醉醺醺，箇美猴王就送箇六位魔王出门口，佢返翻转头箇阵，觉得有啲酒意，就喺铁板桥边松树荫下敨一阵，一阵间就瞌着眼，箇四健将同埋箇啲守卫就毋敢嘈醒佢，就围住喺佢身边嚟到保护，美猴王觉得迷迷懵懵之间见到有两个差人，攞住张批文，上边写住“孙悟空”三个字行埋嚟，嚟到佢身边问都毋问声，突然间用条绳一箍就箍住美猴王条颈，将美猴王嘅魂魄索到实，然后连推带𢫨一直带到一座城池旁边，迎面嘅冷风一吹，美猴王就打咗个冷震，就觉得有啲酒醒，𫖵高头一睇，个城门上面有个铁牌，牌上面有三个大字，幽冥界。
「幽冥界就阎王所住嘅地方，点解会嚟到呢度。」
箇两个差人就讲：
「你而家阳寿已尽，死期已到，我两个奉命嚟捉你返去。」
美猴王一听：
「我呸，我老孙已超出三界之外，不在五行之中，长生不老，毋归阎王管。箇个老懵懂咁大胆嚟捉我？」
原来箇两个差人系勾魂鬼，专门捉人，平日就恶惯，以为孙悟空好㗇，喺处喊打喊杀，要㓥要斩，又推又𢫨，要将孙悟空拉入地狱。孙悟空就俾佢𢫨得两下，推得几下就发火，喺耳仔边掹出箇件宝贝一揈，二丈咁长，碗口咁粗，成万几斤嘅铁棍，顺手一班就班过嚟，你咪讲话咁大力打过嚟，就算轻轻砸落嚟都砸扁，当堂就将呢两个勾魂鬼砸成肉酱。孙悟空火气仲未消。
「你呢班家伙，立乱噉捉人，居然捉到我老孙头上，我毋使你拉我入地府，我自己打入去，教训下你地先至得。」
于是佢除咗索喺颈上嘅箇条绳，攞住箇支如意金箍棒，施展神威，乱棍就打入幽冥界，嚇到牛头马面东匿西避，南奔北跑，有啲快趣趯入去报：
「大王，不得了不得了，外面有个满面生毛嘅雷公打入嚟喇。」
嚇到箇十殿阎王快啲缩整衣冠一齐出嚟，原来地府有十个阎王，各管一样，所以叫做十殿阎王，又叫做十代冥王，箇十殿阎王里边，排头箇个叫秦广王，佢见到孙悟空凶神恶煞，力大无穷，俾佢嚇到胆战心惊，出到嚟就讲：
「咪打住咪打住，上仙高姓大名？」
「我咩名你都毋识，你都毋知到我系边个，点解你揾人嚟捉我？」
「不敢不敢，梗系啲差人搞错咗啫。」
「我就系花果山水帘洞天生圣人孙悟空，你呢十个家伙做咩官㗎。」
「我地系阴间天子，十殿阎王。」
「成十个咁多嘎，我点知你边个打边个，逐个报名上嚟，迟啲就照打。」
十个阎王就一一报上自己嘅姓名，孙悟空就指住佢地嚟闹。
「你地既然登上王位，点解咁不知好丑，我老孙已经修道成仙与天齐寿，长生不老，已经超出三界之外，跳出五行之中，点解你地咁逗打，敢揾人嚟拉我。
「上仙你毋好嬲，普天之下同名同姓嘅好多，梗系箇勾魂鬼搞错咗定嘞。」
「混帐，攞命个㖞，讲玩笑呀，噉都搞得错个咩，快啲将生死簿攞出嚟畀老孙睇下。」
箇十个阎王就俾孙悟空喝到晕头晕脑，就请孙悟空来阎王殿嚟查生死簿，孙悟空攞住支如意金箍棒大摇大摆就上殿。一个毋该就𠱂正喺中间南面坐落嚟，十个阎王分开两边企喺下便，原来旧时坐位好讲究，箇啲皇帝接见大臣，就只有皇帝先能够坐喺中间向住南面坐，孙悟空懒鬼理佢咁多，一𠱂就𠱂正至大箇个位，理你咁多，而家至大系我，十个阎王通通同我企埋一边，箇十个阎王见到孙悟空咁恶，就快啲叫掌管生死簿嘅判官攞文簿出嚟查对，判官见到阎王都怕咗孙悟空，佢更加不敢怠慢，飞咁快入去就将成叠生死簿攞晒出嚟，真系奇怪，佢揾极都揾毋到孙悟空个名，原来箇个孙悟空虽则似人但系佢不入人册，虽则似走兽，又不服麒麟管，似飞禽又不受凤凰辖，佢另外有个簿㗎嘛，孙悟空自己心知，佢喝一声：
「行开行开，等我自己嚟睇。」
一查就俾佢查到，喺箇魂字一千三百五十号上边，就写住，孙悟空，乃系天产石猴，该寿三百四十二岁，善终。孙悟空一睇，到期喇，于是佢大喝一声：
「即刻同我攞支笔过嚟，算喇算喇，我毋理寿数几多，我擦咗自己个名就得。」
箇个判官就快啲捧个墨砚上嚟，攞起支笔，掭满浓墨，双手递上，孙悟空一攞过嚟就嗤嗤喳喳将自己个名擦咗去，一不做二不休，凡系马骝之类有名嘅佢一概擦晒佢，呢次连名都冇我睇你阎罗王管都管毋怗。擦晒啲名以后，一手将箇生死簿劈落地。
「好喇好喇，算数喇算数喇，就噉喇。」
攞起支如意金箍棒乒乒嘭嘭一直打出阎王殿，箇十个阎王避都避毋彻，边处敢阻拦佢，等到孙悟空去到好远好远喇，箇十个阎王先一齐去到翠云宫，拜见地藏菩萨，启表玉皇大帝要去告孙悟空嘅状。
再讲美猴王，佢一路耍住如意金箍棒打出幽冥界，出咗城门，突然间脚下一滑，一羡，几乎掼低，一下就挃醒，原来头先系南柯一梦，佢正系想起身，听到箇四只老马骝喺处同其他嘅马骝倾偈。
「大王毋知饮得几多酒，点解咁好瞓嘅，足足瞓咗一晚仲未醒。」
「醒喇醒喇，何止瞓咗一晚，我头先发咗个梦，梦见有两个人嚟捉我，将我带去幽冥界，好在我醒得快，俾我大显神通，一直同佢嘈到上阎王殿，将箇十个阎王磢咗一身，我仲睇咗我地个生死簿，凡系有我地名嘅，我冚嘭唥都消晒佢喇，以后阎罗王点名都揾毋到我地，毋归佢管。」
箇班马骝一听个个欢天喜地，叩头多谢美猴王，所以，以后有啲山马骝好长命㗎，因为阎罗王点名揾毋到佢个名。
其他各洞嘅洞主，知到美猴王大闹阎王殿呢件事，都纷纷赶嚟贺喜。箇六个结拜兄弟就更加欢喜，成日聚埋一齐饮宴庆贺。
讲完花果山又讲下九重天上。有一日，玉皇大帝喺凌霄宝殿坐朝，忽然间，报上话洞海龙王敖广，上朝告状。玉皇大帝就宣敖广上殿，接过佢嘅文书一睇，原来讲系花果山水帘洞妖仙孙悟空，自恃武艺高强，到龙宫无理取闹，强行索取神针铁棍。抢走金冠锁子甲、步云履，事后恶言讽刺，乞求派出天兵天将，收服妖孽。玉皇大帝睇完就传旨：叫东海龙王先返去龙宫等候，等佢派天兵天将去捉孙悟空返嚟归案。
东海龙王啱啱走啫，下边又有个跟住嚟告状。呢个就系阎王秦广王，玉皇大帝接过表文一睇，原来又系告孙悟空。佢告孙悟空不守王法，不服拘捕，不服管辖，在幽冥界中大打出手，致使勾魂鬼丧命， 十代阎王心惊，强行将生死簿涂改，将马骝除名，致使阴司无从执法，伏乞调遣神兵，收降此妖，永安地府。玉皇大帝睇完表文，就叫阎王先返去地府等候，等佢派天神捉孙悟空返嚟问罪。
于是玉皇大帝就叫齐啲文武大神上殿，查问下呢只妖猴系何年出生，如何出身，因何有如此高深道行，千里眼同顺风耳就即刻禀报。
「呢只马骝系三百年前天地生成嘅石猴，当时以为冇乜大碍，点知佢呢几年毋知喺边度修炼成仙，斗胆去大闹龙宫，捣乱地府。」
玉皇大帝有啲嬲，就想派出天神天将下凡去收服孙悟空。只见个老神仙太白金星，就上朝启奏。
「呢只石猴系天地生成之物，如今修炼成仙，又有降龙伏虎嘅本事，陛下，不如降一道招安圣旨，将佢叫到天上嚟，求其畀个官职佢，将佢拘束喺呢度，如果佢听话，以后再赏，如果佢违背天命，就地擒拿，噉一则就不必劳师动众，二来收仙有道，岂不是两全其美？」
玉皇大帝听完觉得噉亦好，就叫太白金星去招安。
箇太白金星领旨出咗南天门，按下祥云就嚟到花果山水帘洞，守洞口箇班马骝见到有个伯爷公，肥肥矮矮老态龙钟，箇把胡须雪咁白，一路髧到落肚脐咁长。有啲就同佢开玩笑。
「老公公，你啲胡须乜咁长㗎，噉你食嘢点食㗎。」
有啲调皮就跳上去掹箇啲胡须嚟玩。
「不得无礼，不得无礼。我系玉皇大帝派嚟嘅天使，有圣旨喺度，请你地大王上天宫，快啲快啲同佢告知。」
箇啲马骝就一层一层噉传入去，一直传到洞天深处，报告畀孙悟空听。
「大王啊大王，外面有个伯爷公，孭住一本文书，话系玉皇大帝派嚟嘅天使，有圣旨请你上天。」
「系咩系咩，啱晒啱晒，我呢两日正想话去九重天玩下，咁啱就有天使嚟请，快啲快啲，大开洞门请佢入嚟。」
玉皇大帝派嚟嘅天使，美猴王亦都不敢怠慢，佢即刻肃整衣冠，出门去迎接。太白金星入到嚟，就对孙悟空讲：
「我系西方太白金星，奉玉帝招安圣旨，下凡嚟请你上天拜受封赐。」
「噉又真系多得晒老神仙，多得晒多得晒，孩儿们，安排酒宴。」
「免喇免喇免喇，圣旨在身，不敢久留。请大王一齐去，以后我地相处嘅日子多咧。」
「噉又真系毋好意思，怠慢，哎吔真系。」
孙悟空讲完，跟住掹开箇四健将吩咐佢地： 「你地小心谨慎啲，带领住啲儿孙守护山洞，等我上天去睇下有乜门路，到时如果好嘅，我带埋你地上去住。」
于是美猴王就离开水帘洞，同太白金星一齐驾起云飞上天，箇个孙悟空，佢一个筋斗十万八千里，一揈就将太白金星揈喺后边，佢自己话都冇咁快，已经到咗南天门外，啱啱想收住云头入去，点知看守南天门嘅天神天兵天将就举起刀枪剑戟拦住毋畀入。
「毋畀我入去？原来箇个金星个老家伙，佢系奸诈之徒，既然请老孙嚟点解又叫人动刀动枪，阻头阻势喺度，你毋畀我入系吗，我偏要入，你毋畀我入我就打入嚟。」
过阵，太白金星赶到，孙悟空正系发紧火，一见到太白金星就指住鼻哥闹：
「你只老家伙你话，你居然眲我，你话玉皇大帝招安圣旨请我上嚟，点解你而家吩咐呢班人嚟阻拦我毋畀我老孙入。」
「大王，你毋好嬲，你以前都未嚟过呢度天宫，毋系咩出名嘅神仙，箇班天兵天将又点识得你，佢地梗系毋畀你入去，等一阵你见到天尊，封翻个官嚟做，入咗仙册，以后任你出出入入边个敢拦阻你。」
「你噉讲又系，好喇，我毋入喇。」
「毋得毋得，你仲系同我一齐入去，请请。」
于是太白金星就吩咐：
「天兵天将听住，呢个系下界仙人，我奉玉帝圣旨带佢上嚟，你地让开条路。」
箇班天兵天将先至收埋兵器，放开条路，美猴王就同太白金星一齐入去。
马骝王住惯荒山野岭，上到天堂一睇，只见金光万道，瑞气千条，山上千年不败嘅鲜花，地下系万载常青嘅绿草，三十三座天宫霞光闪闪，七十二重宝殿金碧辉煌，一对对玉麒麟，一双双金稳兽，箇只马骝王睇到眼都毋眨，一咪喺处，咁架势咁架势，不知不觉就嚟到凌霄宝殿，只见到殿外边排住一行天兵天将，个个凶神恶煞，瞪眉凸眼，殿里便一班大臣，个个神态轩昂，庄严肃穆。
太白金星就带住美猴王上殿拜见玉皇大帝，见到玉皇大帝个个都跪低叩头。结果只马骝王，企喺度头𫖵𫖵，左望右望毋知揾边个噉，原来佢喺度揾玉皇大帝，玉皇大帝系高天上圣，梗系高高在上，佢个样毋畀人见，上朝接见大神仙卿，都系隔住一道用珍珠织成嘅门帘，所以毋怪得孙悟空见毋到佢，孙悟空个心𠼻𠼻咕咕，喺度，箇玉皇大帝噉又系怪，你请我老孙上山，嚟咗毋知你匿鬼咗去边度，箇太白金星已经跪低禀奏。
「臣领圣旨已经将妖仙带到。」
玉皇大帝就隔住道门帘问：
「边个系妖仙？」
「我，老孙。」
成班大神嚇到大惊失色。
「岂有此理，你只马骝，你跪低叩头参拜吖嘛，你斗胆话我老孙，你真系死罪，死罪。」
玉皇大帝冇责怪佢。
「孙悟空乃下界妖仙，不知礼貌，姑且恕罪。」
成班大臣就喺处谢圣恩，马骝王仲系眼眨眨毋紧毋要噉企喺度，太白金星就𢫨佢一下。
「你仲毋去谢恩？」
「噉又系。」
于是孙悟空弯起条腰大声嗌咗句：
「多谢晒。」
玉皇大帝又查问底下，边度少咗咩嘢官，可以安置孙悟空去做，箇个专门管分配官吏嘅武曲星君就启奏，佢话天宫里便各宫各殿，各方各处，箇啲官已经多到凸头，而家就御马监缺一个正堂管事，玉皇大帝就传下旨意，封孙悟空做弼马温，玉皇大帝讲完，其他大臣都跪喺处谢圣恩，箇个孙悟空仲系噉个样讲句多谢多谢噉就算数
从此，孙悟空就当上天宫嘅弼马温，弼马温呢个官名够古怪，咁多官名毋安，安做弼马温，原来旧时相传，马骝可以避得到马瘟疫，而家又叫马骝王养马，所以安个官名就叫做弼马温，意思就系避开马嘅瘟疫噉解，马骝王喺玉皇大帝封咗个官之后，欢天喜地就即刻去上任，合合埋手下箇班力士同大小官员，点过马匹一共有天马一千匹，呢啲天马跑起上嚟一阵风咁快，只只都系踏步腾云，孙悟空新官上任三把火，认真落力，成日咁巡查照应，日头毋使计，连晚黑都殷勤照料啲马匹，见到啲马瞓到腍，就赶起身嚟食草，见到啲马走出去，就赶翻返去入嚟马槽，箇啲天马亦好有性，见到孙悟空嚟就将只马头岌下岌下，将条尾揈嚟揈去，𨂽蹄𨂽爪，挨身挨势噉，养咗半个月啫，只只马都养到又肥又壮。
