西游记粤语（林兆明讲古版）第五回
第五回
美猴王做咗弼马温之后，认真卖力，过咗半个月啫，箇啲马养到又肥又壮。
箇日，大家比较得闲，底下箇班监官就安排酒席，一来同美猴王接风，二来贺喜。孙悟空饮咗几啖落肚就得意忘形。
「我呢个‘弼马温’，系乜嘢官衔㗎？」
「官名嚟㗎啫。」
「噉到底系几品官？」
「噉冇品从个噃。」
「品从都冇，噉即系好大？」
有一个就毋抵得颈：
「大乜嘢，都未入流嘅。」
「乜话乜话，乜嘢叫做未入流？」
「未入流嘅官，只系最低最细嘅，贱到只能够管马，老实讲，好似你噉，到任之后咁卖力，养到啲马咁肥，至多毋系得返句称赞，讲一句好，噉就算㗎喇。如果啲马瘦咗啲咁多，仲要捱打，箇啲马有乜三长两短，毋单止要罚，仲要拉去问罪。」
孙悟空一听就心头火起，咬牙切齿大骂：
「咁睇毋起我老孙，睇得我咁衰？老孙喺花果山封王大晒，眲我上嚟同佢养马，呢啲下贱功夫，后生小辈嘅事要我老孙嚟做？毋做毋做，几大都毋做，呸，我走！」
一脚就将酒席踢翻，台面上嘅茶壶酒杯，碗碗碟碟打到兵兵嘭嘭满地都系，佢跟手就喺耳仔度掹咗个宝贝出嚟，碗口咁粗两丈咁长，一边打就一边闹，一直打出御马监去到南天门，箇几个天神天将，知到佢入咗仙册，又系个咩弼马温，大大细细都算个官，噉就不敢拦阻，俾佢打出南天门外。
一个筋斗就返翻花果山，花果山上箇四健将，同埋各洞嘅洞主，正喺度操演紧兵卒。美猴王就大力嗌一声：
「孩儿们，老孙返嚟喇。」
成山嘅马骝欢天喜地，一齐走上嚟叩头迎接，接美猴王返去洞天深处。请佢高登宝座，箇四健将就上嚟恭喜大王：
「恭喜恭喜大王，天上十几年，而家得意荣归，恭喜恭喜。」
「我先去咗半个月，边有十几年。」
「大王你喺天上不知时辰过，天上一日，凡间一年。请问大王做咗乜嘢大官？」
「大大大，大个屁，毋好讲喇，提起佢我就激气，箇个玉皇大帝毋会重用人才，佢封我做个乜嘢弼马温，原来同佢养马都毋入流，我又毋知俾佢眲到我，同佢养咗半个月马，好在今朝箇班手下讲畀我听，我先知到原来咁下贱嘅，真系俾佢激到我，我老孙火滚踢爆佢个酒席，劈咗顶乌沙帽，翻返嚟呢度喇。」「好啊好啊，大王，呢度系洞天福地，个个都尊重大王，你喺呢度快快活活噉咪好啰，使乜去同佢做马夫，快啲快啲，你地快啲办酒席嚟，同大王开心同大王解闷。」
大家正喺度饮酒欢宴，守洞嘅马骝就入嚟报告，有个独角鬼王要嚟求见，美猴王就请佢入嚟问佢咩嘢事。
「久闻大王招贤，无由得见，今日大王受咗天箓，得意荣归，特献上赭黄袍一件，与大王祝贺，如果大王毋嫌弃收埋小人，小人甘愿为大王效犬马之劳。」
美猴王一听就十分欢喜。即刻着起箇件赭黄袍。旧时，赭黄袍就毋系个个都着得，要皇帝先能够着，其实孙悟空早就封王，不过系马骝王，所以就冇咁讲究，依家难得有人送上门，于是就着起箇件赭王袍威风八面，似模似样噉。箇班马骝就排班朝拜美猴王，美猴王心中欢喜，即刻就将鬼王封做前部总督先锋，独角鬼王谢恩之后就问：
「大王大王，你喺天上荣任乜嘢官职？」
「箇玉帝都毋识宝，佢不会任用贤良，封我做个乜嘢弼马温。」
「岂有此理，大王如此神通广大，点能够同佢养马？不如大王在此做个齐天大圣，噉又咩话毋得至得㗎？」
「好啊，齐天即系同玉皇大帝平起平坐噉解，好，我就叫做齐天大圣，你地即刻同我喺洞口竖支大旗，旗上面上住齐天大圣四个大字，从此以后只准叫我做齐天大圣，毋好叫大王喇，即刻同我传令畀各洞洞主。」
花果山上多咗个齐天大圣，凌霄殿上少咗个弼马温。
第二日，玉帝上朝。只见到张天师带埋御马监嘅官员嚟禀奏：
「万岁，新任弼马温孙悟空佢嫌弃官职太细，昨日反出天宫，不知去向。」
仲未讲完啫，守南天门嘅天将入嚟禀报：
「弼马温不知因何故走出南天门。」
玉帝就叫佢地先返去先，然后就传圣旨派遣天兵天将擒拿孙悟空。班部中走上两人，一个就系托塔李天王，一个系哪吒三太子，李天王就启奏：
「万岁，微臣不才，请旨下凡，收降呢个妖魔。」
玉皇大帝就好欢喜，即刻封托塔李天王做降魔大元帅，佢个仔哪吒三太子做三坛海会大神，就派佢地父子两个兴师下凡，擒拿孙悟空。李天王同埋哪吒叩头谢恩。
返到本宫，就点起三军立即出动。叫巨灵神打先锋，鱼肚将压后。一阵间就嚟到南天门外直落花果山。选好地形，扎下营寨，就叫巨灵神去挑战。巨灵神着好披挂，攞支宣花斧，一直嚟到水帘洞口。见到成班豺狼虎豹之类，喺晒门前练武，原来呢啲系七十二洞所属嘅妖怪。巨灵神就大喝一声：
「你班孽畜听住，快啲同我报畀弼马温知，我系天上嘅大将，奉玉帝旨意，到此收服佢，要佢即刻出嚟受降，如果毋系，你地通通性命难保。」
箇班妖怪一听就惊晒，即刻到去洞里边禀报畀孙悟空知，孙悟空一句说话都毋多讲，揸起箇支如意金箍棒，带埋众人就出洞迎战。
巨灵神一见到孙悟空就大喝一声：
「你呢只山马骝，你睇真下本将军系边个？」
「我都毋识你嘅，无名小将，小小毛神，老孙点会识得你？」
「咪讲咁多，快啲报个名上嚟。」
「你只冇良心嘅死马骝，住惯荒山野岭，梗系毋认得本天将，我系托塔李天王部下先锋，巨灵天将，今奉玉帝圣旨，嚟呢度收降你，你精嘅就快啲放下架撑，归顺天恩，噉就免得满山走兽遭受杀生之祸。如果你胆敢讲半个不字，我即刻将你斩为两边。」
「芝麻咁大嘅官，小小毛神，喺处夸大口，胡言乱道，我本来想一棍就送你归西天，不过就怕冇人同我去报信，所以留返条命畀你，你快啲同我返去，同我对玉皇大帝讲，佢不识任用贤能，我老孙有无穷本事，居然叫我同佢养马？呸，你𫖵高头睇真下，睇我支大旗上边写住乜嘢字？如果你照足呢度封我官衔，我就不动刀兵，噉就一天都光晒。如果毋系，噉就毋好怪我老孙。到时我打上凌霄殿，箇阵佢龙床都瞓毋成，龙座都冇得坐。」
巨灵神𫖵高头望一下，洞门外竖一支大竹竿，上面一支大旗，写住「齐天大圣」四个大字，巨灵神就冷笑三声。
「你只死马骝，斗胆包天，你真系梦想天开，居然上学人做齐天大圣，等住，捱我一斧头先。」
讲完就一斧头劈落嚟。美猴王就不慌不忙，舞起金箍棒嚟到迎战。
都未打得够两个回合（两下），美猴王一棍照头就㩧落嚟好似泰山压顶，箇巨灵神用尽全身之力，一架，辟啪一声，个斧头当堂打到两橛。巨灵神拧转身就趯啰㖞，俾佢再打棍添，仲得了嘅？孙悟空咔咔声笑：
「正一饭桶嚟嘅，毋使走咁快，老孙毋杀你，留翻条命畀你报信畀玉皇大帝知吔。」
巨灵神执返条命，边度仲敢停留，一阵风噉就走翻返入营门。跪低禀报李天王。
「箇只弼马温真系神通广大，末将敌佢不过，败阵回营请罪。」
李天王听见出师不利，当堂发火：
「你呢个家伙挫伤我锐气，左右，同我推出去斩！」
旁边闪咗个哪吒三太子。
「请父王息怒，暂时宽恕咗巨灵神之罪，等孩儿出师一次，就知到箇个妖魔深浅。」
李天王听到个仔噉讲，火气就消咗。就吩咐哪吒：
「你小心上阵。」
哪吒就攞好架撑，跳出营盘，一直嚟到水帘洞外。箇个美猴王啱啱打赢咗巨灵神，想收兵回洞。见到一阵风又嚟咗个，睇真下，呢个又真系得意，白白净净一个细路，仲梳住一双铔角髻，身上仲缆住一条红肚兜，眉清目秀，之杀气满面，左手揸刀，右手搦住支剑，揽住一捆绳，腰带箇度仲插住一支雷将棍。脚上踩住一个闪闪发光嘅铁圈，仲孭住一个绣球。
孙悟空见到个细路噉趣怪，行埋嚟同佢开玩笑。
「细路，你边度㗎，系咪荡失路嚟到我呢度。」
「我呸，你只死马骝，你睇真下我系边个？我系托塔天王三太子哪吒，奉玉皇大帝嘅旨意，嚟呢度捉你。」
「三太子，你睇你脑笋都未生埋，乳臭未除，胎毛未干，仲带埋啲lam2lam2sam2sam2嘅嘢嚟玩，你知毋知呢处系边度，仲讲大话出口伤人，我就毋舍得打你，睇我支大旗上面写住咩字？齐天大圣嚟个噃，返去返去，返去话畀你老窦知，叫佢拜上玉帝，如果封我噉嘅官衔，就乜事都冇，如果毋系我打上天宫，到时毋好怪我老孙无礼。」
哪吒系太子，娇生惯养，兼夹一身武艺，少年得意，边度受得噉嘅气。
「呸！你只妖猴，你有几大本事啊你，你敢学人做齐天大圣？你毋好走住，你捱我一刀先。」
「细路，乜咁大火气嘅，好，你嘅孙爷爷企喺度，任你斩几刀嚟玩下。」
哪吒就更加火滚，大喝一声：
「变！」
睇毋出噃，箇细佬哥一变就变做三头六臂，攞住六件架撑就扑过嚟，呢几件毋系细佬哥玩嘅玩具嚟㗎，原来一把系斩妖剑，削铁如泥，一把系劈妖刀，掂亲都冇命，箇条绳叫做绑妖索，被佢一箍亲就好似吊颈噉，走都走毋甩，箇条雷将棍，揍亲都骨断，箇个绣球，你估系皇帝女招驸马箇个呀，毋系，系兵器嚟㗎，睇佢个样好似圆辘辘，软绵绵噉，之一抛出去，比铁仲硬，碰亲都头破血留，箇只铁圈，叫做风火轮，会发热放电，行慢啲都焫亲，悟空一睇，呢条细路，咪睇小佢，有几道散手。咪喇咪喇，小心为上。佢亦大喝一声：
「变！」
一变就变做三头六臂，一支如意金箍棒就变做三支，六只手就变做三支棍就顶住哪吒箇六件宝贝，呢场打斗真系半斤八两，两个各不相让，各显神通，打到天乌地暗，三军胆寒，鬼神心惊，三太子箇六件兵器变做千千万万，孙悟空箇三条铁棍变做万万千千，雨点流星，风驰电掣。到底系孙悟空老练啲，趁住打到乱晒龙箇阵，佢掹咗条毫毛出嚟，叫一声，变！就变咗个假孙悟空出嚟，同佢一毛一样，又系攞支如意金箍棒，顶住哪吒箇刀刀剑剑。佢自己一跳就跳到背后，一棍就㩧落嚟，哪吒就顾住同前面箇个假孙悟空打，突然听到背后丿一声响，连忙躲避，点知都避毋彻，箇支如意金箍棒喺膊头箇处打落嚟，当堂半边身都麻晒，好在佢道行高深，如果换第二个，早就冇命喇，咪喇，快啲收返六件兵器，走为上着。
再讲箇托塔李天王，佢见到自己嘅仔出战咁耐都仲未返嚟，心中就牵挂，惊住有咩咿逳，就带埋啲天兵天将赶嚟接应。半路就见到哪吒慌慌张张噉趯返嚟。
「父王啊父王，箇个弼马温真系有本事，孩儿噉嘅法力都敌佢不过，俾佢打伤我膊头。」
李天王大惊失色。
「箇家伙咁厉害，如何取胜好呢？」
「禀上父王，佢仲喺洞外竖咗支旗杆，上便写住齐天大圣，佢仲话，要玉皇大帝封佢做齐天大圣就万事皆休，如果毋系，佢打上凌霄殿。」
「既然箇妖猴咁放肆，你暂时毋好同佢斗，我地翻返上天宫，将啲事禀报玉帝，再派天兵天将嚟擒拿佢，都未为迟。」
箇哪吒捱咗棍，已经痛到入心，成身软晒，边度仲敢打落去，所以托塔天王一讲，佢就毋出声跟埋佢老窦上天去启奏。
箇个孙悟空得胜回山，七十二洞洞主同六个魔王齐齐嚟到贺喜。喺洞天福地箇度大排筵席，欢庆胜利。饮到兴高采烈，孙悟空就对箇六个魔王讲：
「小弟而家都号称齐天大圣，噉我地大家都系结拜弟兄，你地都可以封返个乜嘢大圣嚟做下。」
于是箇几个魔王个个都安返乜嘢平天大圣，覆海大圣，混天大圣，驱神大圣嚟做。自作自为，自封自号，封完之后又试开怀痛饮，玩足一日先至散。
呢边打胜丈就高兴喇，箇便李天王箇班打败将就耷头耷脑，垂头丧气返翻上天宫。即刻就去玉皇大帝箇处禀报。
「臣等奉旨出师下凡，收服妖仙孙悟空，谁知佢神通广大，不能取胜，望万岁添兵剿除。」
「区区一个妖猴有多少本事，仲要添兵添将。」
哪吒跟住上前禀奏：
「望万岁赦神死罪，箇个妖猴使一支如意金箍棒，先打败巨灵神，又打伤臣嘅膊头，妖猴仲喺洞口箇处竖咗支旗杆，写住齐天大圣四个字，佢话如果毋封佢呢个官衔，佢要打上凌霄宝殿。」
「狂妄，放肆，擒拿返嚟碎尸万段。」
玉皇大帝发脾气，边个毋惊，底下粒声都冇出。
过咗一阵，箇太白金星就上殿启奏。
「万岁，呢只妖猴佢系不懂礼教，只知其言，不知大小，如果出兵去征剿，一来劳师动众，二来呢只妖猴道行高深，一时难以收服，万岁，不如大发慈悲，再次降旨招安，封佢做个齐天大圣，只系挂个名个啫，有官无禄，只系安个名又冇实职，又毋畀佢管事，又毋发佢俸禄，噉只系养住佢喺九重天上，慢慢嚟收佢嘅邪心，使佢不生狂妄之念，噉岂不是乾坤安定，四海清宁？」
玉皇大帝听到噉讲，亦有啲道理，于是乎即刻降咗道诏书，要太白金星再次下凡。
太白金星呢次嚟到花果山一睇，同上次完全毋同，只见森严壁垒，杀气腾腾，成班马骝同妖精鬼怪，攞晒刀枪剑戟棒严阵以待。一见到太白金星啫，就成班扑上嚟，攞刀攞枪，要打要杀。
「咪逳手，咪逳手，多烦你地去报畀大圣知到，我系玉帝派嚟嘅天使，有圣旨喺呢度，请大圣上凌霄殿。」
箇啲马骝即刻入去禀报。
「报上大圣，上一次嚟眲你上天宫做弼马温箇个老家伙又嚟喇，佢话玉帝嘅天使，有旨嚟请你。」
「你地毋使咁嬲，毋使责怪佢，上一次请佢上天虽则冇封到咩大官嚟做，只系上天玩咗一次开下眼界，仲认得出入嘅路，呢次佢嚟，梗系有好意，快啲，开门迎接。」
呢次美猴王就威风啰，戴起紫金冠，披起金甲，穿起云履，仲褛埋箇件赭黄袍，一摇三摆就出到洞门口。
「老神仙，真系请恕老孙失迎之罪。」
太白金星跟住佢入到嚟之后，对佢讲：
「大圣，上一次大圣你嫌官细，走咗出嚟，玉帝知到之后责怪话，凡系做官，由卑到尊，由小到大，点会嫌细，所以李天王带埋哪吒嚟打斗，点知大圣你神通广大，打败佢地，噉佢地而家报畀玉帝知，话你要做齐天大圣，其他箇啲天将本来毋肯，要兴师动众嚟厮杀，老汉冒住死罪奏请玉帝，先至免咗呢场刀兵相见，而家玉帝已经应承，封你做齐天大圣，请你即刻上天受封。」
「好，上次多得你帮忙，今次又靠你关照，真系毋话得，乜噉噃，天上有冇齐天大圣呢个官衔㗎。」
「有，如果冇箇阵，老汉嚟负责，你责怪我啦。」
孙悟空就欢天喜地，即刻同太白金星一齐架起祥云，再次上天宫，去到南天门外，箇班天兵天将个个都拱手相迎，一直入到凌霄殿，太白金星就禀报。
「臣奉圣旨，宣弼马温孙悟空到嚟见驾。」
「孙悟空，你过来，依家朕封你为齐天大圣，你官居极品，今后不可胡作非为。」
「得得得，多谢多谢多谢。」
跟住玉帝又吩咐，喺蟠桃园旁边，起一座齐天大圣府畀美猴王住，属下仲有安静司，宁神司两处嚟到照应，底下仲有仙官仙吏嚟专门服侍齐天大圣，美猴王领完圣旨，就同五斗星官一齐去齐天大圣府到任，玉帝仲特意赏赐佢御酒两瓶，金花十朵，无非系想呢只野马骝安心定性，咪再胡作非为，箇个美猴王一返到去齐天大圣府，就即刻打开箇两瓶仙酒，叫齐府中箇班仙官仙吏，不分尊卑，大家啹啹声饮清光。玉皇大帝呢个办法确系几灵，从此以后美猴王就真系心满意足，喜地欢天噉快快活活，喜地无忧无虑，无牵无挂噉过日子。
兼夹箇妖猴到底系荒山野岭修炼而成，野性未驯，佢冇乜计较俸禄高低，又毋去问咩官衔品从，又毋系争咩实权，求其挂个名，底下有仙吏服侍，但求日食三餐，夜眠一塌，无事牵挂，自由自在，就心满意足。得闲就会友游宫，交朋结义，见到老一辈就叫老神仙，老道，见到皇帝就叫声陛下，见到同佢年岁差毋多嘅，好似九耀星，五方将，二十八宿，四大天王，十二元辰，普天星相，河汉群神，一律称兄道弟，佢今日东游，明日西荡，云来云去，行踪不定。世上有啲人就争名夺利，勾心斗角，天上亦不外如此，虽则孙悟空收心养性，只系亦有啲睇毋惯，见佢咁优游自在就毋抵得颈。于是难免闲言闲语。
有一日，玉帝早朝，箇个许旌阳道人，就扶住支拐杖，跀下跀下噉上殿启奏。
「万岁，听讲箇个齐天大圣得闲无事，到处咁游荡，交朋结友，不论尊卑都结为兄弟，佢个野性难驯，恐怕以后必然会惹出祸端。不如陛下交件事畀佢管下，趁势拘束下佢，免得再次惹祸。」
玉帝一听就觉得有道理，就即刻宣孙悟空上殿。
