話時話好多小朋友同我話做講義陣時，唔識點同文字標註粵拼，其實內訓都講過嘅，但係話講返嚟，都可能有唔記得咗嘅時候，噉我就寫咗呢篇文來教下大家。優缺點寫喺步驟嘅前面喇，睇你咩需求。如果你用緊 Windows 系統，噉我最推薦嘅係辦法二，呢個辦法喺 Mac 度用唔到，因為佢唔支援 Macro。如果臨時有幾個字想改下嘅話，無論係乜系統都係辦法一最易，呢個亦都係最通用嘅辦法。

辦法一：直接用「Phonetic Guide」

• 優點：通用。

• 缺點：拼音嘅字型同大細好麻煩調。

步驟：

1. 打開講義文檔，選中想標拼音嘅文字。

2. 喺上邊嘅「Font」欄中搵到「Phenetic Guide」，撳入去。

3. 喺「Rudy text」欄中拍拼音，每個格對應嘅就係佢左邊嘅字。然之後設「Size」，建議設成 14 pt。最後撳「OK」。

4. 噉就得喇。如果係覺得嗰字黐埋一齊嘅話可以喺中間加個空格。

辦法二：用「Macros」

• 優點：適合批量標註，拼音嘅大細亦都可以跟住字號按比例放縮。

• 缺點：唔支援 Mac 作業系統。

步驟：

1. 首先係導入我編寫嘅 Macro ，你可以喺小倉庫入面搵到，文件名係「JyutpingInsert.bas」。如果你用緊嘅講義模板係後綴名為「.docm」嘅帶宏文檔，你可以直接跳到第 4 步。第 2 到第 3 步係介紹點導入嘅。

2. 撳開「Developer」，喺「Code」欄中搵到「Visual Basic」。

P.S. 如果喺辦法一中冇搵到「Developer」嘅話，可以自己 Google 下點開啓，我就唔多講喇。

3. 喺彈出嘅窗口入面，撳「File」中嘅「Import File」，然之後搵到頭先話嘅「JyutpingInsert.bas」，撳「Open」，然後撳 Ctrl+S 保存就得喇。

如果你想一勞永逸嘅話，可以喺第 3 步開始之前，先撳下「Normal」指定導入到共用模板，噉以後都唔使再導入喇。

4. 返到文檔，先選中想標註拼音嘅文字，然後撳「Developer」入面嘅「Macros」。

嗱，咪住先，呢度注意喇，一次性淨係可以選一句話，唔要選埋嗰標點符號，佢好蠢㗎，標點佢都會以為係一個字㗎。

5. 跟住雙擊「JyutpingInsert」，或者你中意嘅話都可以先單擊然後撳右邊嘅「Run」。如果冇睇到「JyutpingInsert」嘅話，噉就喺「Macros in」入面選中你啱先導入嘅位置，例如我照上面話嘅導入咗到「Normal」，所以我就選咗「Normal.dotm (global template)」。

6. 彈出一個對話框，喺文本框入面拍拼音，注意每個字嘅拼音要用空格分隔。拍完之後就撳「OK」。

7. 噉就得喇。

辦法三：從網頁上 Copy

• 優點：方便簡單。

• 缺點：唔調得拼音嘅字型同埋大細，亦唔會同文字嘅一齊變。為咗講義嘅美觀，唔到萬不得已儘量唔要用呢個辦法（Mac 選手當作耳邊風就得喇～）。

步驟：

1. 打開 qhgg 寫嘅呢個網站：https://mepy.net/Notate/mix/

2. 按照網頁嘅提示操作就得喇。