J.Arie解約離邵氏TVB，因七師傅人氣急升

歌手J.Arie（雷深如）大學畢業後冇做律師，反而選擇加入樂壇。2013年加入太陽娛樂後獲力捧，入行初期風頭一時無兩，不過去到2019年佢決定離開，轉做獨立歌手。咁啱當時邵氏向佢招手，J.Arie毅然同邵氏簽5年合約，估唔到佢入咗邵氏一年半就提早解約，喺情人節回復自由身。

J.Arie就話佢上年推出左兩首比較偏激嘅歌包括《雙面哈菲》和性上癮為題材嘅《陰陽道具》，當時「性女」型象嚇親高層。之後佢知道自己叛逆性格無可能綁係邵氏，所以嘗試同樂易玲傾談解約，樂小姐覺得佢做嗰啲歌搞到個人咁癲，好唔正面，係返唔到大陸。 而J.Arie都知道自己越嚟越違背邵氏對藝人嘅要求，所以最終獲得放生。佢都好多謝舊公司同高層樂易玲放生，依家佢可以繼續以獨立歌手身份做喜歡嘅音樂同題材。今年12月，J仔會喺海洋公園怡慶坊舉行入行8年來嘅首個正式個人演唱會《PERFECTLY GUILTY LIVE》。

解約原因當然係大家想法唔同，之前有報道指J仔參演過TVB兩部劇，加埋合共四句對白，其實係咪有呢啲事發生？J仔講返：「嗰時簽邵氏係想入屋，之前聽大家comment覺得我唔入屋，咁簽邵氏不如簽埋TVB，但簽完後發覺原來冇乜親上加親待遇，都係等待機會，拍過兩套劇，有一部《非凡三俠》，專登飛去馬來西亞講一句對白，最後剪咗冇埋，剪淨一個wide shot嘅back shot，即係一粒鼻屎。另一套有兩三句對白，飾演一個年輕女子，就係《陀槍師姐》大結局。」作為一個歌手，當時又入行幾年，結果得4句對白嘅待遇，J仔又唔覺得好奇怪：「當初簽約時，話睇到你talent幾適合演戲，我哋嚟緊擺你多啲喺劇度，如果有機會做到《愛回家》會大力幫你推；如果做到大騷保良呀博愛呀，都會盡量擺你喺入面...其實間間公司簽時都可能係咁講，但實際做時又有幾多呢？」

當初簽邵氏時，邵氏有冇同J仔講過要做個點樣嘅藝人？路向又會點行？J仔話佢簽咗邵氏後，2019年底佢寫咗一本「誠實日記」，自己好似食咗誠實豆沙包咁毫無保留地坦白面對自己，得出嘅結論係自己原來係一個邪惡、充滿歪理嘅人，於是佢就開始製作精神病系列歌曲《雙面哈菲》、《陰陽道具》、《判官之印》，歌曲大膽、敏感，同公司嘅想法有出入，「公司希望係做正面、正能量、乖嘅藝人，但TVB高層同埋樂小姐聽到我《雙面哈菲》後已經唔係太喜歡，我唔明音樂上點解要做一個好斯文嘅人，點解音樂一定要係靚靚？點解一定要係乖？唔明界線同尺度。」

由於J.Arie同邵氏合約唔係包薪，所以出糧得4位數字。J.Arie直認被迫做「月光族」，更話呢刻銀行戶口積蓄有5位數字，已經算係入行以嚟最多錢。另外，佢仲話咁多年為咗做音樂甘願捱麵包，有時全日食21蚊嘅菠蘿油加杯熱奶茶，全日只食呢一餐，其餘時間就飲水和食梳打餅。

J仔係港大法律系畢業，有律師唔做，堅持做歌手，因為佢太愛音樂，呢樣亦係佢人生中堅持得最耐同最要捍衛嘅事情，既然同公司路向不同就無謂勉強。離巢半年，佢會點樣形容依家嘅TVB？J仔話：「我會覺得係努力掙扎求存。依家每個地方、大世界環境疫情，都唔單止TVB，大家都係掙扎求存，懸崖邊好用力爬番上嚟嘅感覺。TVB請咁多人返嚟，好想作出改變，但借我首歌《判官之印》嚟講，呢隻歌主旨係我哋成日掛喺口邊，要為樂壇、娛樂圈做啲咩事，但落手落腳做嘅時候，係咪可以完全唔理人哋目光、唔理幾多收視幾多views，係咪真係可以做啲改變樂壇同娛圈生態嘅嘢呢，大家都會驚唔敢行呢步，要play safe。我做呢隻歌就係提醒自己要跳出comfort zone。」

J仔就大膽行出自己嘅第一步，舉辦年底嘅第一個演唱會，佢拍咗一張全裸概念嘅海報，寓意赤裸地表達自己，佢喺社交平台發文形容演唱會好癲，咁即係癲成點？「到呢刻我未度好rundown，但成件事係用我隻碟《PERFECTLY GUILTY》嚟包我們都是精神病人，我哋身體都係精神病院，係一個主題。演唱會2B級，15歲以下人士不能觀看，會好多本土文化、人性嘅嘢食色性也去表達。演唱會係我第一次做賣飛騷，希望騷到畀大家係我嘅成長經歷，一齊回顧我呢8年，希望大家都會支持我依家行緊嘅路。」

歌手J.Arie近兩年做獨立歌手，不過音樂事業仍不盡人意，因為做歌要好多錢，她試過最窮時，戶口得返80元。七師傅除了帶她到李嘉誠門外吸收旺氣之外，竟帶到深水埗街頭瞓街，希望她谷低反彈。而七師傅與J.Aries一齊瞓係度傾心事，師傅問對方點解咁鍾意音樂，點樣去維持生計時，J.Arie講下講下忍唔住爆喊，就話要做好多工作去增加收入，如寫歌、或開直播並且厚住面皮地叫大家課金。問到家人有冇反對，J.Arie更加喊到收唔到聲。七師傅見到佢喊得咁慘，於是就送佢一張支票，任佢寫幾多錢，不過J.Arie寫得太多，七師傅都忍唔住話：「會彈票」。最後，七師傅為了鼓勵雷深如，帶她到紅館唱歌，希望她仍然繼續努力，總會有日可以發光發亮。不少網民睇完都話其實好勵志，搞笑得來又有點感動。