#長文慎入#香港音樂 #廣東歌

臨近頒獎禮，有關唔同歌手嘅報導開始浮面，無知之徒亦隨之浮現。
.
不時喺有關本地歌手嘅post，只要係非天王天后級等一線歌手，留言部份都會出現「唔識」、「邊位啊」、「聽都未聽過」之類嘅說話。先講呢種留言低質冇營養，盡顯無知，點解唔識又唔去自己搵答案？仲要以無知為傲，何其可悲。
.
貴古賤今近乎人類天性，總係吹捧以往有幾好，然後就話今非昔比。無可否認以前香港樂壇真係好蓬勃，但係咪就代表而家冇好嘅音樂人去做好香港音樂呢？與其話香港冇好嘅音樂人，我更加質疑香港嘅聽眾質素。當然以往嘅金曲我哋都會時常回味，但人總唔可以活喺過去，點解就唔俾個心出嚟欣賞而家用心做音樂嘅人呢？其實唔洗成日攞以往同而家比較，因為活喺唔同年代，都會有各自嘅特色同文化，學習好好欣賞各式各樣嘅音樂。
.
當然論流行度，我覺得的確係今非昔比，所以更加希望可以有更多香港人支持返本地嘅樂壇，得到更多人嘅支持，相信對做音樂嘅人嚟講係好大嘅動力。
.
成日話香港樂壇已死，咁有冇諗過點解會死（利申唔覺死），話香港得K歌，又有冇諗過係邊個搞成咁。有其他曲風又唔接受，有新嘅風格又要批評，有新晉歌手又要踐踏，咁點百花齊放。
.
而且有啲人，平時都唔留意本地樂壇，但到投票嘅時候又突然活躍，好比忽然球迷，仲要做埋場外球證，對自己明明唔識嘅嘢指指點點。
.
與其覺得自己大大聲講唔識係好型嘅話，不如好好反省點解會覺得自己型，其實只係將你無知同唔尊重嘅一面表露無遺。有時間留言話唔識，不如就花啲時間好好認識而家嘅樂壇，祝你哋早日離開井底。