新编粤剧《锁麟囊》第一折聘嫁选妆剧本
新编粤剧《锁麟囊》
撰本：焦循
京剧编剧：翁偶虹
改编撰曲：老薛
【本折人物】
江绮珠——正印花旦/花衫
浣碧——二帮花旦/花旦
江老夫人——夫旦（即是老旦）
陈姨——梅香
江至忠——文武生/公脚
老傧相――丑生/网巾边
少傧相――丑生/网巾边
江平——拉扯
常安——拉扯
【正文】
（牌子头一句开幕丑生少傧相上）
（打引）又到婚期逢聘嫁，择日成婚不少好人家。
（白）我，就系少傧相，喇，今日六月十七，听日六月十八个播，好日子嚟架。讨新妇嘅多，我地傧相就忙啦，叫我老豆出嚟，倾下点算至得。老豆！
（丑生老傧相匆忙上介白）嚟啦！仔呀，你唔好咁大声叫啦。（口古）父子作傧相，转为他人忙。（对少傧相白）你咁鬼急叫我做乜鬼啊？
（少傧相白）老豆你知唔知今日初几啊？
（老傧相白）哦？我谂下先，今日……十七，听日……十八，咦，听日十八？你唔讲我揸啲唔记得哂，听日就系人地聘妻之期啦
（少傧相白）咁我地商量下我地两个去边处啦。
（老傧相白）我谂下，哦，江家同杜家
（少傧相白）两家
（老傧相白）仲有白家和区家
（少傧相白）四家
（老傧相白）呢度四家，就令到我地忙得紧要啦，区家细门细户，杜家大门大户，你啊，听日去区家啦！
（少傧相白）做乜听日我去区家㗎咋
（老傧相白）我头先话你知啦，区家细门细户礼数唔多，你去都好，江家大门大户，礼数繁杂，咁系我去啦。
（少傧相白）你势利!
（老傧相白）做乜我势利㗎咋？
（少傧相白）你谂下啦，乜嘢大喜事我冇整过啊？点解今次就要我去区家咁鬼孤寒嘅人家去呢？
（老傧相白）你唔好咁讲啦，乖仔，你都势利㗎咋，区家穷都要畀钱，杜家富都要畀钱，不过多少唔同啫。
（少傧相白）哦，多少唔同，咁点解你唔去呢？咁我都应该去杜家。
（老傧相白）唔得，听日你去杜家啦
（少傧相白）我唔去
（老傧相白）你咁係要去
（少傧相白）就唔去
（老傧相白）你就要去
（少傧相白）我就唔去（下介）
（老傧相白）呢个衰仔！讲开又讲，冇我个老势利，点有佢个小势利啫！（下介）
（江至忠上介古腔唱滚花下句）为求妆奁四处奔走，我只望快归不负韶华。
（白）老奴江至忠，乃是江府上嘅管家，听日我家小姐出聘，老夫人言说送一锁麟囊与她，都希望佢能够早生贵子，老夫人又命我挑选花样，唉，我正欲呈小姐定夺
（唱清歌）小姐明朝将出嫁，老奴为佢奔走十余家，谁知形制难适合，所以为斯难露笑颜牙。
（滚花上句）我快将新绣与他睇下。
（陈姨内叫白）忠哥，慢行慢行。
（江至忠企定，陈姨、江平与报鞋盒常安齐上介）
（江至忠白）你地去边处啊？
（陈姨白）忠哥，今次老夫人要我地准备小姐出聘妆奁，小姐又话唔好，又要我地换，喇呢的。
（江至忠）佢先唔系咁㗎咋。
（陈姨白）咦，忠哥，你手上执住啲乜嘢啊？
（江至忠）锁麟囊咯，小姐又话唔好，都系换来㗎
（陈姨白）我睇下，都几正啊，不过唔知小姐中唔中意。
（江至忠白）你地嘅嘢都换齐啦？
（陈姨、常安、江平同白）系啊。
（江至忠白）咁好啦，一齐入去啦。
（江至忠入门介叫）浣碧！浣碧！
（浣碧上介白）忠叔啊，小姐而家好烦啦，你唔好咁大声啦，小姐如若撞火，我地都呵唔转，個时就真系闭翳啦！
（常安白）浣碧姐，你睇吓呢个花色就最正啦。
（浣碧白）都几好，你等阵啦，我送入去畀小姐睇下。（入虎度门介复出）
（浣碧白）常安，你点解换咗咁嘅花色啊？小娘唔中意，去换啦。
（常安白）仲话唔好？
（浣碧白）系，快啲去啦，快去！
（常安抱鞋盒下介）
（江绮珠内场叫介）浣碧！
（浣碧白）唉！
（江绮珠内场白）嗰个花样要鸳鸯戏水嘅！
（浣碧白）哦，鸳鸯戏水。
（江绮珠内场白）返来！
（浣碧白）我系度㗎。
（江绮珠内场白）鸳鸯一飞一游，不要太大，亦不要太小
（浣碧白）哦，唔大唔小
（江绮珠内场白）返来！
（浣碧白）我未行开㗎咋！
（江绮珠内场白榄）戏水鸳鸯应五色，玲珑彩羽透清波，请君莫绣鞋尖处，紧要提防走路磨。
（浣碧白）哦，提防走路磨。
（江绮珠内场白）返来，快啲返来！
（浣碧白）系度。
（江绮珠内场白榄）配景当如画，映衬白莲花，莲蕊使金线，莲瓣用朱砂。
（浣碧白）小姐你讲咁多，我记唔住，你自己出来啦！
（江绮珠内场白）蠢丫鬟，快些馋我来呀。
（浣碧入虎度门，江绮珠右手扶浣碧上介唱八字二黄）虚度逝水华年，春光去也惊怕，心思千样，旧时娇媚，岂负才华。非是任性自专，再多繁杂。（过序转梆子滚花上句）只是如意珠儿，手中未挂。
（江绮珠白）呢件衫都唔正，加埋双鞋，越发难睇，真真叫人生气。
（浣碧白）江平，你啲嘢换好未？
（江平白）好啦，喇。
（浣碧白）睇得，你等阵先，（对江绮珠）小姐，江平换来手绢，你睇下啦。
（江绮珠看手绢不悦掷介白）花僆仔，于归之日，就用这个白白净净的手绢啊？
（浣碧白）系，我都痴咗线，江平，呢个手绢白咗啲，唔得，去换啦。
（江平白）仲换？
（浣碧学江绮珠介白）花僆仔，于归之日，就用这个白白净净的手绢啊？
（江平白）你搞乜鬼啊？
（浣碧白）你咪话咁多，去啦。
（江平执手绢下介）
（陈姨白）浣碧啊，我同小姐换来一对花瓶，仲有句好话添。
（浣碧白）嗯？
（陈姨白）富贵白头
（浣碧白）好，你等阵。（抱花瓶入门介对江绮珠白）小姐啊，陈姨换来花瓶一对，仲有句好话，话富贵白头添。
（江绮珠睇花瓶颔首微笑介）
（浣碧白）陈姨啊，小姐中意啦，你休息下啦。
（陈姨下介）
（浣碧对江至忠白）忠叔换好未啊？
（江至忠白）喇，系度啦
（浣碧执锁麟囊入门京白）小姐请看，锁麟囊
（江绮珠三睇介乐起八板南音板面至第六板首叮起升八度食第七板"六"字唱飏舟腔二流）仔细看，这麟儿还在彩云下，攀爬还比蛟龙，何解样比马？（白）谁人买到？
（浣碧白）忠叔买到。
（江绮珠白）烦劳佢再跑一趟
（浣碧白）忠叔啊，唔得，你再去啦。
（江至忠白）咁就难啦，
（江至忠散板清唱）口含瑞草锦麒麟
（转清歌）大喜于归我却要重换下
（江至忠白）老奴又岂敢忠言相告。（哭介）
（江老夫人上唱清歌）午梦得惊谁欲醒，缘何啼哭待我问声他。（白）至忠啊，你为何在此啼哭？
（江至忠白）小姐命换锁麟囊，几番查访，皆不合心意，老奴因此啼哭。
（江老夫人白）哦，你同我来。（与江至忠同入门介）
（江绮珠起身让母上座京白）参见母亲
（江老夫人京白）罢了，（白）坐低啦
（江绮珠京白）谢座
（江老夫人白）仔呀，听日你就要出阁個喔，吓。
（浣碧白）夫人啊，小姐觉得锁麟囊花色唔好，发紧嬲添。
（江老夫人白）哦，仔呀，唔好嬲啦，你讲个花色要至忠换啦。
（江绮珠侧面不悦介）
（江老夫人白）仔呀，妈子同你讲嘢，你做乜唔开声㗎？再唔讲我就闹你啦。
（江绮珠白）啊，妈子，孩儿岂有不悦之心，不过，
（江老夫人白）啊呀，为一件咁嘅嘢搞得我个仔咁样，至忠你快啲去啦
（江绮珠白）唔使啦，（同浣碧耳语，浣碧取一锭银）
（江老夫人白）小姐话唔使，就唔好去啦，放系度，休息去啦。
（浣碧白）忠叔啊，小姐畀你㗎。
（江至忠白）多谢小姐。（下介）
（江老夫人白）梅香，快啲挪我嘅珠宝匣来啦，（对江绮珠）乖仔，同我来啦。
（江老夫人拉江绮珠起身行半圆台归小边接锁麟囊与浣碧会心一笑介）
（江老夫人口古）仔细观瞧，仔细选挑，随心所欲，自己选挑。（白）仔呀，呢个夜明珠，乃系无价之宝，喇，同你装在囊内。
（江绮珠白）妈子，古话慢藏诲盗㗎。
（江老夫人）你有所不知，我地呢度女儿出嫁必备锁麟囊，多装珠宝来馈赠，为求女儿早生贵子。（江绮珠暗下）（江老夫人白），啦，赤金链，紫瑛簪，（对浣碧）嗯，小姐呢？
（浣碧白）哦，小姐害羞，先行回房。
（江老夫人白）快把珠宝送去啦，唉，都系我呢个妈子锡个仔啊。（与浣碧同下介）
