網絡專欄 | 一式一樣倒模式真人show風格令TVB失去生命力

統一後製風格令電視台失去生命力

電視台最緊要多元化，劇集如是，綜藝如是，不斷重複最後只會受到觀眾嘅嫌棄。ViuTV好多節目都有MIRROR同ERROR成員出現，縱然依家愈來愈多觀眾笑99台應該改名做「鏡錯電視台」，但觀眾緣喺娛樂圈幾乎等於一切，極高嘅支持度同愛戴度可以暫時克服藝人重複出現造成嘅悶局。

99台最近以娟姐《阿女又戀嚟》、七仙羽《七救星》、許廷鏗《AH佛‧真惜玩》嘅播放安排，沖淡返MIRROR同ERROR嘅「霸道」感覺，又係成功嘅一著：《阿女又戀嚟》靠住娟姐嘅主持化學反應，減走咗「又係真人騷」嘅感覺，接力嘅Alfred同七師傅，兩個有基本盤嘅新主持，前者靠同唔同嘉賓交流再講到自己，後者天馬行空純粹笑吓，都展現出多元。

TVB其實都多元喎，由四月新官掌權之後，綜合項目《開心大綜藝》、唱歌、配音、跳舞、清談、劇本殺、選港姐，下星期又有煮嘢食比賽《煮戰》，仲破天荒星期一至三播佢，星期四五播另一個節目《代溝關注組》。以節目類型嚟講多過ViuTV，咁點解睇落TVB都仲係死氣沉沉，感覺好悶呢？

好大原因係後製統一化：嗰啲KEY字、剪接風格、節奏、慢鏡營造所謂緊張感覺、參與人士嘅大頭誇張反應，個個節目都差唔多，尤其喺真人騷節目就更加顯著。都已經唔係話呢啲做法大唔大陸，嚟到香港會唔會水土不服，問題係全個電視台遵循同一後製模式去做節目，只會令到播出嚟嘅感覺單一懨悶。

電視台喺展現創意嘅地方，生命力都係由此而生。節目前中後期，包括構思、拍攝、內容、剪接、後製，倒模咁做，宛如殭屍。