西游记（粤语讲古，林兆明版）文本，第三回
箇混世魔王劈低把大刀，抬起箇对砂煲咁大嘅拳头，排山倒海噉就扻过嚟。之你估对手系边个，孙悟空。你估大只就怕你？都未打得够三个回合，就俾孙悟空喺佢䏚膁箇度打咗几锤，肋骨都几乎打断。仲喺后便喺屁股度兜咗几脚尾龙骨都赤晒。
「毋对路，呢只死马骝咁厉害，好汉不食眼前亏，咪哜喇，等我先下手为强。」
于是混世魔王一手揦返起箇把大刀兜头噉劈过嚟，真系牙齞。好彩孙悟空避得快，箇把刀喺佢头壳顶度pit1一声噉片过嚟，争一寸咁多，就连天灵盖都俾佢打碎。
「岂有此理，你咁冇口齿，话过毋用刀枪用拳脚比武，而家你赖猫，好，等我炮制你先得。」
孙悟空喺身上掹咗条毫毛出嚟，放入口里便嚼咗几下，然后pu噉一声喷出嚟。即刻变咗三几只马骝仔。
原来孙悟空得到菩提祖师教授过七十二变嘅法术，佢身上一共有八万四千条毫毛，条条都可以变，随心所欲，话变乜就变乜，变出嚟箇啲马骝比真嘅仲精㔹，只只都系眼急手快，刀斩毋到枪㓤毋入，成班马骝走去围住箇混世魔王，有啲就跳上佢膊头，搦鼻齃，扭耳仔，挖眼珠，打嘴巴，掹胡须，有啲喺前边打心口，踢肚腩，有啲就匿喺后便，打佢背脊，摏佢䏚膁，有啲跳尾，仲跳入去胳肋底猛咁𡁶佢，有啲抱住佢只脚，除咗佢只鞋，走去挠脚板底，有啲仲揾石头嚟撘佢脚趾公，搞到箇混世魔王一仆一辘，筋疲力倦，孙悟空一手抢咗佢把大刀，叫班马骝行开，然后手起刀落一刀劈落去，从头到脚整整齐齐劈做两边。
跟手又成班杀入里便，将啲大大小小嘅妖精通通杀清光，孙悟空就将箇身顶一压，成班马骝就变返晒箇条毫毛上返身，孙悟空就打算走喇，点知一睇：
「奇怪喇，点解仲有三几十只仲怐怐愗愗噉踎喺度嘅，噉毋通系毋返得上身法术不灵？」
再睇真下，原来呢啲系真马骝嚟，孙悟空就问：
「点解你地会嚟咗呢度？」
箇班马骝头先见到孙悟空同混世魔王喺处打斗，已经嚇到傻晒，依家见孙悟空杀咗混世魔王，然后先定返神，于是一齐哭哭啼啼喺处申冤。
「大王，我地系水帘洞㗎，系你嘅子孙，大王，因为你去咗修仙学道，我地呢几年捱得好辛苦，被箇混世魔王㗇到绝晒，将我地捉咗嚟呢度做苦役，连我地水帘洞嘅架撑，石盘石碗都搬晒嚟呢度。」
「乜原来噉嘎？好，你同我将啲架撑冚嘭唥搬返出嚟。」
搬完之后，顺手一把火就将水脏洞烧清光，孙悟空就话：
「你地可以返去水帘洞毋使怕，冇人敢㗇你。」
「大王，你毋知到，我地毋返得去，毋识路。箇个魔王毋知使啲咩法术，要我地冚眯埋眼，一阵风就将我地吹嚟呢度，我地而家点返去？」
「箇啲算系咩法术，呢啲噉嘅本事，我要几多有几多，好，你地冚嘭冷眯埋眼，等我带你地返去，毋使怕，毋好擘大眼，擘大对眼跌咗落去冇得医。」
成班马骝揞住个头眯埋眼，踎埋一堆，孙悟空念声咒语，架起筋斗云，一阵狂风，成班马骝仔已经返到花果山，班马骝仔擘大双眼，就见到已经返到自己屋企，真系欢天喜地飞跑入岩洞，同埋家人父母兄弟姊妹团聚。
呢一次，因为孙悟空重返花果山，又杀咗混世魔王，救返班子孙，花果山上真系欢天喜地兴高采烈，大家安排美酒鲜花水果同孙悟空接风贺喜，成班马骝仔喺处称赞，有啲就问：
「大王，你边度学到咁高超嘅本事返嚟？」
「我？我自从离开你地之后，飘洋过海，去到南赡部洲，学会讲人话，学人行路，着人嘅衣服，七八年咁耐，都未曾揾到师傅，后尾，我又去到西洋大海去到西牛贺洲箇度，几艰难辛苦先揾到个神仙教我长生不老之术。」
大家一听就欢天喜地喺处嗌：
「大王真系洪福齐天，洪福齐天。」
「咪嘈住咪嘈住，毋止，仲有添，我而家有个姓。」
「大王你姓乜嘢？」
「我而家姓孙，叫做悟空。」
班马骝一听就欢天喜地，好啊，好啊，大王而家姓孙，噉大王系老孙，我地就系二孙三孙细孙，小孙，从此一家孙，一镬孙，一窝孙，大家就上嚟恭贺孙悟空。大盘小碗装满晒椰子酒菩提酒，鲜花美果，食到饱晒，饮到醉晒。
从此以后，美猴王就攞住混世魔王箇把大刀每日喺处操演教授武艺，箇班马骝就斩啲竹嚟做长矛枪镖，削啲木头嚟做刀剑，打埋旗号吹起啲啲，一进一退，刀兵练武，安营扎寨，真系似模似样。
有一日，孙悟空喺处检阅大家练武，突然间佢一谂，毋妥，我地而家喺呢度揾埋晒啲假刀假枪喺处学武，只怕搞搞下弄假成真，惊动咗人间帝王，或者禽王兽王，以为我地兴兵作反，噉又真系打过嚟，我地呢啲都系假刀假枪，边处够人地打，噉点办，去边度揾啲真刀真枪返嚟，箇班马骝一听，个个惊起上嚟。
「大王，你讲得啱，不过边处揾啲兵器返嚟好呢。」
正喺度商量紧，有四只老马骝一齐上前禀奏，其中一个最老嘅马骝就讲：
「大王，要揾到箇啲兵器都好容易。」
「点容易法？」
「喺我地呢度花果山，向东便去有二百里左右，箇度就系傲来国界，箇度有座城池，好兴旺，里便一定有金银铜铁各种行业，大王如果你去箇度，买啲返嚟或者整啲返嚟噉都好，到时教我地练武，等我地好守护山洞，呢个先系长久之计。」
「好，你喺度等等，等下先，等我去。」
于是孙悟空又一个筋斗，眨下眼就已经到咗傲来国界，见到果然有一座城池，六街三市，万户千户人来人往，十分热闹，孙悟空就心谂，呢度梗系有现成嘅兵器，不过要求人买，都毋知佢肯毋肯，算喇，不如我耍个法术出嚟，自己去整几件返嚟算啦，于是佢就念起咒语，敨啖大气，然后踎低对住地下啲泥沙一吹，当堂飞沙走石，天乌地暗，街上啲行人走都走毋彻，个个匿返屋企，家家关门闭户，孙悟空就趁住呢个机会，一个筋斗就打入皇宫里面，打开武库同埋兵器馆嘅门，箇里便真系刀枪捡戟棒，铁锤，利斧，长矛，强弓，毒箭，样样都齐全。箇个马骝王又欢喜又心急，有喇有喇，呢次揾到晒。不过我一个人点托得咁多，好，于是佢掹一摣毫毛出嚟，放落嘴里便咬咗几下，然后pu一声吐出嚟，当堂变咗一千几百只马骝仔出嚟，马骝仔见到咁多武器喺度，于是乎又系你争我抢，有啲大力嘅，一只就托七八件，箇啲孱弱嘅，最起码执翻两三件，孙悟空又试架起筋斗云，一阵狂风成班马骝仔就返到花果山上。
箇阵，花果山上箇啲马骝，正喺洞外嚟到玩，忽然间听到空中𠾶呤哽唥响，抬头一望，边度嚟一帮马骝，攞晒刀枪剑戟飞过嚟，嚇到匿都匿毋彻，过咗一阵，孙悟空按落云头收咗云雾，将啲马骝收返上身，于是乎箇啲兵器就嗜嗜唦唦噉跌落嚟，箇啲马骝𫖵高头一睇：
「死喇死喇，有人打过嚟，满天刀枪捡戟棒劈落嚟。」
成班马骝喝到满山噉走，孙悟空就大嗌一声：
「孩儿们，毋使怕，我带兵器嚟畀大家。」
箇班马骝先个个转惊为喜。见到地上咁多兵器，又试嚟抢。
「我大只啲，我要长矛。」
「我细粒，我揾返把刀。」
「最好眼界系我，我攞弓箭。」
箇个又话：
「我手力最大，我耍流星锤，边个呒同我抢。」
足足又搞咗一日，个个马骝都分到件兵器。
第二日，孙悟空就召集全体嚟操练，而家有咗兵器就毋同晒，零舍威风，点起名嚟一共有四万七千几口。箇阵满山怪兽妖精，远远近近都嚟齐晒，老虎、狮子、大象、金钱豹、大黑熊、梅花鹿、豺狼、狐狸、野猪、山牛、羚羊。一共有七十二洞洞主，兽王，都嚟参拜孙悟空为王，有啲就献上金鼓，有啲献上彩旗，有啲献上盔甲。从此，花果山上就摇旗呐喊，杀声震天，刀光闪闪，金鼓齐鸣，十分威武。
有一日，孙悟空正喺处练武艺，忽然间叹口气：
「你睇，你地个个都揾件顺心嘅兵器，之我咧，我确实核突，而家仲揸住呢把刀，又大又挜拃，舞嚟舞去都毋顺手。」
原来，呢把刀系混世魔王用，噉混世魔王成三丈高，佢用嘅兵器点会啱孙悟空用？孙悟空讲完，有只老马骝就上前禀奏。
「大王，你系神仙，凡间嘅兵器边度啱大王你使用？不过就毋知大王你水性点？」
「乜话，我？我自从得道之后，学会七十二般变化，一个筋斗就翻十万八千里，又识得隐身之法，又会借土遁之术，真系上天有路，入地有门，水浸浸我毋死，火烧烧我毋伤，边度毋去得？」
「大王，你咁神通就啱喇，我地呢度铁板桥底下嘅水，一直通到东海龙宫，大王，如果你去揾着海龙王问佢要件咩嘢兵器，噉就几矜贵几合心水都有。」
孙悟空一听就十分高兴。
「你只老马骝真系多计，好，我去。」
佢即刻去到桥头，于是同上一次跳瀑布箇阵毋同，箇次靠沙胆啫，呢次学到道返嚟，孙悟空就耍个闭水法，只见个口噏咗几句，嘭一声跳落水。又怪喇，箇啲水即刻分做两边变成一条路噉，一直行到去东洋海底。半路，巡海夜叉见到就嚟截住问：
「行紧嚟箇位边个？系何方神圣？请你讲明白我地好迎接。」
「我系花果山天生圣人孙悟空，你海龙王嘅隔蓠邻舍，噉都毋认得我呀？」
箇夜叉听到就快啲转返水晶宫，报畀海龙王知。
「大王，外便有个花果山天生圣人孙悟空话系大王嘅隔蓠邻舍，要嚟水晶宫探访。」
东海龙王敖广听到噉禀报就即刻起身带埋龙子龙孙、虾兵蟹将去宫门迎接。
「上仙驾到，有失远迎。上仙请入里边坐，请。」
孙悟空一睇，海龙王年纪老迈，讲说话都好似中气不足噉，大家齐入到水晶宫，坐定饮一杯茶，海龙王就问：
「请问上仙系几时得道，学咗啲乜嘢仙术？」
孙悟空谂起菩提祖师吩咐过毋准讲佢个名。所以佢就嗯嗯啊啊噉。
「我，我出生之后出家，从小修行，练咗个不生不死长生不老个术，近来因为我教啲儿孙学武艺保护山洞，点知争件兵器用嘅兵器，久闻我地龙宫里便大把宝贝，所以走嚟借件使下啫。」
海龙王见开到声，噉又毋多好意思推迟，就吩咐底下：
「是但拣件嘢出嚟，畀佢算啦。」
一阵间托咗把大刀出嚟送畀孙悟空，孙悟空一睇就拧头。
「毋啱，我都毋识使刀，多烦你同我揾过件。」
于是海龙王又叫龙虾大尉，黄鳝力士两个抬支九股叉出嚟，呢两个力士抬到嗍晒气先抬佢上嚟。点知孙悟空轻轻求其噉揈咗几下。
「毋得，毋得，太轻太轻。」
「上仙，你睇真下，呢条叉三千六百几斤重。」
「系咩？」
海龙王见佢噉个样就惊起上嚟，乜咁大力㗎，于是又叫个鯾鱼提督，同埋鲤鱼总兵去抬支方天戟出嚟，足足有七千二百斤重。孙悟空上前搦起上嚟，摆开个架势一连舞咗几十个回合（几十下），然后插喺地下度，咚一声，地下当堂穿个大箍窿。
「毋得毋得，轻得哜，仲系轻得哜。」
海龙王就更加怕。
「上仙，我地呢度最重系呢支戟，再冇其他兵器。」
「笑话，俗语都有讲，你又惊海龙王冇宝贝咩？快入去再揾，再揾，揾到啱我心水，老孙毋会亏待你嘅。」
「实在冇，上仙，」
海龙王正喺处同孙悟空讲数口，个龙婆龙女就嚟到佢后面，轻轻拍咗佢一下，就将海龙王拉侧嚟到讲：
「大王，我睇呢位神圣非同小可，我地海底有条铁柱，好重嘅，都冇人逳得嘅，呢几排毋知点解，金光闪闪，莫非系有咩兆头，整定系呢位神圣攞嘅？」
「箇䊆系大禹治水箇阵用嚟定江河深浅嘅，一块神铁嚟嘅，有咩嘢用？」
「你理佢咁多，理佢有用定冇用，你 求其畀咗佢就送佢出门噉咪算啰。」
海龙王一听，谂下又系㖞，于是佢就对孙悟空讲，孙悟空一听就成个跳起身：
「好，你即刻攞出嚟畀我睇下。」
「上仙，你真系讲得咁容易，攞出嚟睇下㖞，好重㗎，几个人撬都撬毋逳，点攞得出嚟，如果上仙要睇，就多烦上仙自己行前去睇。」
于是海龙王就带埋孙悟空去睇，果然见到海底金光万道，孙悟空上前一摸，原来系一条铁柱，足足有坴大𥮾咁粗，两个手箍都箍毋过，长有成两丈几长，孙悟空就话：
「好，不过呢个粗咗啲，长咗啲，如果短返啲，细返啲就好喇。」
讲完啫，个宝贝果然短咗几尺细咗圈，咁得意嘅，会细嘅？孙悟空又话：
「再短啲，再细啲就好嘞，」
真系又细咗几分又短咗几尺，孙悟空十分欢喜，一手就将佢掹出嚟，原来一条铁棍，两头有两个金箍，中间系一橛黑色嘅铁，上面有行字，如意金箍棒，重一万三千五百斤，孙悟空心中暗暗欢喜，个海龙王原来都毋识宝嘅，呢个系宝物，仲会顺我意伸缩，于是佢一边行就一边谂一边讲：
「细啲就好喇细啲就好喇。]
攞出外面一睇，剩返两丈长碗口（古代杯嘅另一个称呼）咁粗，箇个孙悟空真系跳起上嚟，攞住支棍，就施展武艺左打右扫，前推后挡，一直耍到返水晶宫，嚇到海龙王心惊胆跳，龙子龙孙魂飞魄散，虾兵蟹将抱头缩颈，好喇，孙悟空返到水晶宫箇度，然后将箇宝贝放低对海龙王讲：
「你隔蓠邻舍真系毋话得真系毋话得，多得晒喇，」
「毋敢当，不过噉，呢䊆铁虽然好，之仲系有样嘢同你商量下。」
死喇，攞一件都仲毋够，仲有嘢商量。
「上仙，请问你仲有咩事商量。」
「如果冇咗呢䊆铁，噉冇咩嘅，不过而家你睇我攞住呢䊆铁，呢身噉嘅打扮，边度相衬，好毋登对，你呢度如果有披甲，噉不如送埋一件畀我，噉我更加多得你。」
「我呢度边处有披挂啱你着，好难揾」
「一客不犯二主，有嘅，我坐喺度等你，等你揾到为止。」
「多烦上仙你再去过第二度，或者其他地方有，」
「你咪同我讲笑，俗语都有话，乞食求三家，不如坐紧一家来等，我毋走喇，我旨意晒你喇，靠你喇，」
「冇咧，有我仲毋畀你咩，真系冇」
「真系冇？」
「冇啊，上仙，」
「好，你咪走住，你睇下我呢支针一万三千五百斤嘅铁棍系咩滋味先。」
海龙王最冇胆，一嚇佢就口软。
「千祈咪逳手，等我去睇睇，睇睇舍弟箇度有冇，如果有我就即刻奉送一副畀你。」
「令弟系边度㗎，」
「舍弟系南海龙王敖钦，北海龙王敖顺，西海龙王敖闰，」
「你想揾我老孙笨呀，我去揾你细佬，到时佢又毋畀，噉我咪两头叹？毋哜，总之你随高就低，送一副披挂畀我，噉咪万事大吉啰。」
「上仙，你误会啫，我毋敢麻烦上仙自己去，我呢度有一面铁鼓，一口金钟，如果有紧急嘅事，我就擂鼓撞钟，噉舍弟就会嚟。」
过咗一阵，果然间钟鸣鼓响，惊动咗三海龙王即刻嚟到，一齐喺外便相会。
南海龙王敖钦就问：
「大哥，有咩咁紧要嘅事擂鼓敲钟叫我地嚟。」
「贤弟，一言难尽，箇个花过山箇个乜嘢，天生圣人，头先嚟到呢度，最初话隔蓠邻舍嚟坐下开口问我借件兵器，送把刀畀佢，佢话毋识使，送支钢叉，佢又嫌细，送支方天戟畀佢，佢话嫌轻，卒之将一䊆天河定底嘅神铁，自己撬咗出嚟，喺处耍弄一番，佢坐喺后面赖死，要攞件披挂，我呢处冇，所以就鸣鼓敲钟，叫你地嚟商量下，睇你地有咩披挂冇，送翻件畀佢。赶佢走就算。」
箇个南海龙王敖钦火气最猛，一听就火嘞。 「等我几个兄弟点啲兵马嚟捉佢返去先。」
「咪咁大声，俾佢听到毋得了㗎，你千祈毋好讲话捉佢，佢箇䊆铁一万三千几百斤重，一劈落嚟变成肉饼，撞亲都断骨，挨下都甩层皮。」
西海龙王敖闰又话：
「二哥，都系毋好同佢动武，算喇，畀副披挂佢打发佢走，我地去玉皇大帝箇处告佢，等上天嚟收拾佢」
北海龙王敖顺就话：
「系噉，我呢度有对鞋，系藕丝步云履嚟嘅，畀佢算喇。」
西海龙王敖闰就话：
「噉我带咗副锁子云金甲嚟。」
南海龙王敖钦就话：
「我有一凤翅紫金冠，畀埋佢算喇。」
海龙王就带埋佢地入去水晶宫里便同孙悟空相见，献上披挂，孙悟空一啲都毋客气，戴上金冠穿上锁金甲，着上云履，攞起箇条如意棒，走都就毋彻，梗系啦，佢惊住人地拦阻，佢飞舞一支如意棒，好似风车噉𪠳𪠳噉转，转出去，一边行就一边讲：
「真系噉点系啊，多得晒毋好意思，噉点系啊，点系啊」
四海龙王无可奈何登大双眼，掬埋一肚气，大家商量过，要去玉皇大帝处告状，箇个孙悟空攞到个宝贝，欢天喜地分开水路一直就返到水帘洞，铁板桥头，箇四只老马骝同成班马骝仲喺桥边等侯，见到孙悟空喺水底处跳上嚟，身上湿都毋湿，成身金光闪闪，嚇到佢地成班跪低。
「大王，你返到嚟成个都毋同晒，够晒光鲜。」
