西游记（粤语讲古，林兆明版）文本，第二回
箇只美猴王得佢祖师同佢安咗个名叫做孙悟空之后，就欢天喜地叩头答谢。祖师就吩咐小仙带孙悟空出去外边拜见大众师兄，安排好佢个住处。从此以后，孙悟空就收心养性学语言，学礼貌，讲经论道写字焚香，每日如此。得闲箇阵，就扫地锄草，养花种树斩柴烧火，担水运浆。
不知不觉喺洞中又过咗六七年。有一日，祖师又登坛讲道。箇个孙悟空就听到入晒神，就喺度眉开眼笑，岌头岌脑，逳身逳势。俾祖师一眼望见就问佢：
「悟空，点解你手舞足蹈，无心听讲。」
「师傅师傅，毋系，弟子喺处诚心听讲。不过听到师傅讲到神妙之处欢喜得哜，所以先正会噉，万望师傅恕罪。」
「你既然听得明白，我问你，你嚟到洞中几多时日。」
「弟子都懵懵懂懂嘅，毋知时日过。不过只系记得厨房烧柴，毋够柴火。我时常去后山斩柴见到后山生满桃树我喺箇度食过七次桃。」
「箇座叫做烂桃山，你既然食咗七次，噉就七年。如今你想跟我学啲乜嘢？」
「紧系任从师傅教导啦 我乜都想学。不过最好跟住师傅学道，学返多少都好。」
「道字门中有三百六十傍门，傍门皆有正果就毋知你想学边一门？」
「梗系任凭师傅主意，弟子一定用心听从。」
「我就教你个术字门中之道。」
「师傅，乜嘢叫做术字门中之道？」
「即系请仙扶鸾问卜，能知未来，趋吉避凶。」
「师傅，噉得毋得长生不老」
「噉就毋得。」
「师傅，呢啲都毋实际，我毋学毋学。」
师傅又话教过第二样，一连换咗几样。箇个孙悟空一时又嫌呢样毋得长久一时又话箇样毋够实际。其实，佢一味嫌弃学毋到长生不老之术就真，问得几次，祖师就发火。企起身就跳落方台，手攞住支戒尺指住孙悟空话：
「你只马骝，呢样毋中意，箇样毋愿学，你想点？」
讲明之后用戒尺照住孙悟空嘅头上嚗嚗嚗。嚗咗三下，然后翘起双手喺背后，一句说话都毋讲，转身就行入里便，仲顺手闩埋箇道中门。嚇到箇班听讲嘅弟子，个个心惊胆跳喺处埋怨孙悟空：
「你只马骝，真系吔，你都毋识天高地厚，咁难得师傅教你道法，你点解毋学？仲同师傅顶嘴，而家冲撞咗师傅，毋知几时佢先肯再出嚟。」
大家喺处责怪佢。箇孙悟空佢一啲都毋着紧，一咪喺度笑笑口喺处赔礼认错。原来呢只美猴王真系心水清，佢已经估中师傅出嘅谜语，明白师傅嘅心意，所以佢忍住毋出声毋同大家争吵。师傅打我三下，即系要我记住三更时分要留心，师傅将手翘喺背后，行入里便，仲闩埋道中门，即系叫我运后门入去，佢喺密室中传道畀我，所以师傅走咗之后，孙悟空个心就㦬㦬挛，只得快啲天黑。
一到挨晚。佢就提早上床，眯埋双眼诈谛瞓着咗。其实喺度养足精神，准备去听取师傅传经授道。到咗子时前后，孙悟空轻手轻脚爬起身着好衣服，偷偷地开门出去，然后运旧路一直去到后门，果然箇道门半开半掩，原来师傅真系有心，师傅果然系想传道畀我，故此打开后门等我入去孙悟空就一直入到师傅床前，见到祖师瞓着咗孙悟空就毋敢惊动师傅就跪低喺床前。一阵间，祖师醒咗，床上叹咗口气：
「难难难，想揾人传道，确实系艰难。」
「师傅师傅，弟子跪喺度等候师傅已经好耐。」
祖师认得孙悟空把声，就起身着好衣服，大声喝佢：
「你只马骝，你毋喺前边瞓觉，走嚟我呢度做乜嘢？」
「师傅，昨日喺坛前你当众应承，叫弟子三更时分运后门入嚟，传经授道畀我，所以我先至咁斗胆入嚟，喺床前听候。」
祖师一听就心中欢喜，呢个家伙果然系天地生成，居然能够猜破我个谜语，估中我个心意。师傅就毋出声住，孙悟空又喺下面肯求：
「师傅师傅，而家冇到第三个人净系徒弟一个人喺度，望师傅大发慈悲，传畀我长生不老之道，我永远不忘师傅大恩大德。」
「好，算系你有缘我亦合意。你能够估中我个谜语猜中为师嘅心意，你行前啲行前啲，留心听等为师传授你长生不老嘅妙法。」
悟空叩头多谢，然后跪喺床边细心听祖师传授长生不老嘅口诀。箇孙悟空真系心灵福至，字字听入耳句句记入心，听完祖师讲授。佢出到后门𫖵高头一睇，东天色已经渐渐发白。佢就快啲走返入去自己嘅房，静静爬上床，上到床之后仲出力𨂽咗两下床板 打咗个瞌浪。
「天光喇天光喇，真系好瞓，起身。」
成班师兄仲喺度瞓到腍晒，点知孙悟空已经学到长生不老之术喇。
眨下眼又过咗三年。有一日，祖师又登宝座同大众讲道。讲到一半，祖师就问：
「悟空，你近来修道修得点啊？」
「弟子近来心水清咗好多，根基好似逐渐坚固噉。」
「好，你既然能通法性，会得根源噉就好。不过。你要防备三灾利害。」
悟空听师傅叫自己提防三灾利害，心中就不以为然。
「师傅，噉你都讲过㗎啦，只要道行深就与天地同寿长生不老，不惧水火，百病不生。边有事怕咩嘢三灾利害。」
「你有所不知，长生不老非系正常之道，所以鬼神难容。过咗五百年之后，天降雷灾劈你，你要预先避开，避得甩你就与天齐寿，避毋过就一命呜呼。再过五百年，天又降火灾烧你，呢啲毋系凡间嘅火亦毋系天火，呢个叫做阴火，由自己脚板底烧起，五脏烧成灰，四肢变成碳，将你千年苦行化为虚幻。如果你避得过，再过五百年，天又降风灾吹你。呢啲毋系东南西北风，亦毋系海上嘅台风，山上嘅旋风，呢啲风运脑笋吹入嚟，穿过五脏六腑，使你皮肉骨头化成水。所以话，雷火风三灾利害。」
孙悟空听到呢度，真系心都实晒。弊啦，三灾咁厉害。噉我仲要学咗长生不老之术都冇乜用啫。于是乎佢快啲走上前便，跪低嚟哀求师傅师：
「傅师，望你怜悯弟子，将躲避三灾之法教畀我，弟子永世不忘。」
「噉亦毋难，不过你同其他人毋同，所以毋传授得畀你。」
「师傅，我都系头顶天脚立地，一样有五官四肢五脏六腑。噉又点同其他人毋同至得㗎。」
「系，你虽则系似人，不过你系冇腮。」
原来马骝个样确系古怪，扁鼻突额，尖嘴兼夹冇腮。孙悟空听到祖师噉讲，伸手一摸。
「师傅师傅，噉你又毋公道嘞，我系冇腮。不过我畀人当过数袋。噉都补返条数啩。」
咩嘢叫做数袋？原来马骝食嘢系最擒青，惊死执输，快手快脚将食嘅嘢塞晒入个嘴度，噉嚼都毋嚼。将啲食物塞入边度？原来佢嘴里便有个数袋。系专门装食嘅嘢，等到个数袋塞到满晒，马骝先至行埋一便慢慢噉𦧲返出嚟，用牙嚼过先至吞入肚。祖师听孙悟空讲话佢有个数袋，忍毋住就笑起上嚟：
「哈哈，你把嘴真系尖。好，我有个天罡数系三十六变，有个地煞数系七十二变，你想学边样？」
「师傅，梗系多啲着数啲。」
「好，噉我就教你地煞数七十二变。嚟嚟嚟，等我将地煞数嘅口诀教畀你。」
祖师就喺孙空耳边静静噆噆噉细声喺处毋知讲啲乜嘢妙法，只见孙悟空一味喺处岌头岌脑，呢只马骝真系一理通百理明，听完之后，自修自练。将七十二般变化样样学成。
有一日，祖师同埋成班弟子喺三星洞门前敨凉，祖师就问：
「悟空，近来本事学得点？」
「师傅，我啲功夫学得差毋多，学会腾云会飞。」
「系咩，你试下飞畀为师睇下。」
孙悟空以为自己好架势，本事高强。听到祖师要自己飞畀佢睇下，一心喺师傅面前演下嘢，你睇佢，一踎低一䟫就打个冇头筋斗，离地有五六丈高，大概煮熟一餐饭咁耐时间，就飞咗来回约摸有三里路左近，然后落返地下。
「师傅师傅，点啊，我啲腾云飞天之术点啊，请师傅指点。」
「哈哈哈，我真系畀你笑死我，你噉就叫做腾云飞天？你连爬云都毋算。煮熟一餐饭咁耐，然后先至走得箇来回三里路。仲学人叫做飞天？你听讲过冇，古人话：神仙朝游北海暮苍梧。」
「师傅，点先叫做‘朝游北海暮苍梧’？」
「系神仙腾云架雾，朝头早就喺北海起程，经过东海、西海、南海，然后又返翻嚟苍梧。苍梧即系北海噉解。即系一日之内云游四海，周游世界。」
「死嘞，噉就难嘞。」
「难？世上无难事，只怕有心人。」
孙悟空听到师傅噉讲，即刻上前跪低喺处哀： 「师傅师傅，求你为人为到底，大发慈悲，将呢个腾云之法，传授畀弟子，弟子终身不忘师傅嘅大恩大德。」
祖师毋出声，孙悟空一味喺处哀求，祖师见到佢咁诚心，就话：
「神仙腾云架雾，都系一𨂽地就飞上天，你，你头先个冇头筋斗，缩头缩颈，弯腰缩背，好似只挛公虾米噉，边度䟫得几远，箇至多就叫做爬云，而家我传授你一个‘筋斗云’，呢个筋斗云，一个筋斗翻过十万八千里路。」
于是，祖师就喺孙悟空耳仔边细细声将筋斗云嘅口诀传授畀佢。传授完之后，祖师又返翻入里便。箇班弟子就成班围住孙悟空笑。
「悟空，你真系得福，学会师傅呢个法术，第日，就系你当权练兵，送文书，递报单，都毋使忧揾毋到啖食。」
从此，孙悟空运神练法，学会咗筋斗云，一个筋斗云就十万八千里路程，又过咗一排，已经系到春归夏至。有一日，祖师又冇出嚟讲道，成班弟子就喺棵大松树脚下谈经论道。谈论到攰晒，大家就敨下，箇阵有一个就讲：
「悟空，你真系毋知边一世积嚟嘅福，师傅咁中意你嘅，前箇排喺你耳边传授你躲避三灾变化之法，你学识未？」
「噉就老实对各位兄长讲，一来多得师傅传授，二来我孙悟空肯学，日夜噉修炼，箇几个本事早就学会。」
另一个师兄就讲：
「倒不如趁师傅毋喺度，你施展下畀我地睇下，等我地开下眼界都好！」
孙悟空最中意认㔹，听到有人赞自己就成身都松晒，毋记得咗祖师嘅教导，佢一心喺人前演下嘢。
「得得得，你边位师兄出个题目，你地想我变乜嘢？」
「呢度有棵松树，不如你变棵松树嚟睇下。」 孙悟空吟吟沉沉噏咗几句咒语，摇身一变，就变咗棵大松树，同呢棵真嘅一模一样，都分毋出边棵真边棵假，箇班师兄见到噉嘅样，有啲就喺度拍掌，有啲就爬求一笑，有啲就大声嗌：
「好嘢好嘢好嘢。」
有啲就讲：
「箇只马骝真系几有本事。」
大家就越嘈越高兴，越讲越大声，弊喇，呢回惊动咗祖师。祖师扶住支禅杖走出嚟大喝一声：
「放肆，边个喺度大胆喺处嘈吵不休。」
呢班弟子嚇到慌晒，孙悟空亦嚇到即刻现出原型，缩埋喺后边。
「师傅师傅，我地喺度讲道，冇跟外人喺度嘈吵。」
「不成系统，喺处大乎小叫，边度仲似个修行嘅样子？修行嘅人，口开神气散，舌动是非生，点能够喺呢度嘈吵不休？」
有个师兄见到师傅发嬲。
「师傅师傅，噉嘅，头先系孙悟空喺度变法，系我地叫佢变棵松树，佢真系变咗，噉我地大家高兴得哜，拍掌喝彩，所以惊动师傅，求师傅恕罪。」
「好，好喇，你地通通出去，悟空，你咪走住，悟空，我问你，你喺处认乜嘢㔹，学人变乜嘢松树，我再三吩咐你，你呢啲本事点能够喺人前卖弄，而家人地见到有本事，一定求你教佢，如果你怕得罪人，你就要教，如果你毋教人地就会加害于你，你嘅性命难保。」
「师傅，弟子知罪。」
「我亦毋加罪于你，你亦不能再留喺我身边。」
悟空听到师傅话要佢誃，当堂泪流满面，佢毋舍得离开师傅。
「师傅，求下你留返我喺度。」
「你无谓多讲，走吧。」
「师傅，噉你叫我去边度好至得。」
「你从何处来，返回何处去。」
孙悟空一听，突然醒悟。
「师傅，我系东胜神洲傲来国花果山水帘洞嚟嘅。」
「噉你就快啲返去，我保全你嘅姓名，但系呢度断断不可留。」
「师傅，老实讲，我都离开家乡二十年，我都想返去睇下，不过，师傅，你对我嘅大恩大德我都未能报答，我毋舍得离开师傅。」
「算啰算啰，讲乜嘢恩德，以后毋好惹祸，毋好连累我，我就多得你。」
孙悟空无可奈何，只好流住眼泪拜别师傅，起身行咗几步，师傅又叫佢返转头。
「悟空，你呢次一去一定惹出好多是非，之无论你以后惹出乜嘢弥天大祸，不管你行凶作恶，不准你讲出嚟话系我嘅徒弟，如果你讲出半个字，我就知到，到时我将你只马骝剥皮拆骨，将你嘅魂魄贬落十八层地狱要你万劫不得翻身！」
「师傅，弟子知到弟子知到，以后绝不敢提起师傅，如果有人问我话我自己学会自己会噉得喇。」
孙悟空拜别咗师傅，佢念起口诀，一个筋斗就飞返翻去东胜神洲，而家返去同嚟箇阵就大不相同，嚟箇阵就凡胎凡骨，漂洋过海历尽千辛万苦先嚟到，而家，经过祖师传道，都毋使一个时辰已经返到花果山，孙悟空按落云头一睇，呢度本嚟观光秀丽，山花开遍地，马骝满山走，点解而家冷清清，一片凄凉景色。佢大嗌一声：
「孩儿们，我返嚟喇。」
山上山下，石窿石罅，乱草丛中，树林里便，碧碧嚗嚗成千上万只马骝跳出嚟，一围就围住孙悟空喺处嗌：
「大王，你真系忍心，你一去去咗咁耐，掉低我地喺度，我地望大王返嚟望到颈都长晒，大王，你毋知到，最近嚟咗位妖魔，好凶恶，喺处行凶作恶，强占我地水帘洞洞府，我地本死同佢斗，之佢好厉害，我地毋系佢手脚，俾佢打到一仆一辘，连架撑都俾佢抢埋，仲抢咗我地好多子侄去。搞到我地食冇啖好食，瞓冇觉好瞓，匿埋晒喺啲山窿山罅度嚟看守家业。好在大王你返嚟，你再迟啲返嚟，我地连山洞都冇埋。」
孙悟空一听真系怒从心上起，恶向胆边生。
「边个妖魔鬼怪咁大胆，你地快啲讲佢嚟畀我听，等我去揾佢报仇。」
「大王，呢个妖魔叫做混世魔王，喺北便箇便嚟。」
「离呢度有几远？」
「我地毋知到，大王，佢嚟亲都系腾云驾雾，毋系翻大风就系落大雨，毋系打雷就系闪电，都毋知佢点嚟点去。」
「有我喺度，你地毋使怕，你地敨下先，等我去揾佢。」
于是孙悟空一个筋斗向住北边飞去，见到有一座大山，箇座山又真几得人怕，阴风阵阵，怪石轮轮，悬崖峭壁十分险恶。马骝王就按落云头，睇真下点个样至得，忽然间听到下边有声音，原来喺悬崖峭壁之下有个山洞，呢个就叫做水脏洞，洞门口有几只小妖怪喺处巡查，忽然间见到天上跳咗个人落嚟，箇几个妖怪拧转身就想走，孙悟空大声喝住佢：
「咪走住，我毋杀你，我留翻你把口同我入去报信，你话畀你洞住听，我系正南方花果山水帘洞洞住，你箇咩混世魔王，居然敢欺负我儿孙，我而家上门寻仇，要同佢比个高低。」
箇班妖怪听完嚇到失晒魂，连爬带滚飞咁快趯入去。
「大王，不得了，弥天大祸嚟喇。」
「咩事咁慌张？」
「洞外边有只马骝，话系花果山水帘洞洞主，话你屡次欺负佢儿孙，而家特地嚟寻仇，要同你比高低。」
混世魔王听见就一谂：系㖞，听花果山箇班马骝讲话佢地有个大王，出身修行，毋通就系佢而家返嚟揾我？
「喂，你地见到咩打扮，有冇带兵器？」
「冇，冇见到咩嘢兵器，光住头，着住件红衫勒住条黄色丝带，着对黑鞋，古灵精怪噉，又毋似和尚又毋似道士，又毋系神仙，又毋系妖怪，赤手空拳喺外边嗌打嗌杀，好得人怕！」
混世魔王一听，话孙悟空冇带到兵器，个胆就定落嚟。
「马骝咋嘛，有乜咁怕，同我抬兵器同盔甲上嚟。」
箇几只妖怪就抬住兵器盔甲上嚟，混世魔王着好盔甲，一手揦住把大刀，就带埋一班妖怪出去门口，大嗌一声：
「边个系水帘洞洞主？」
悟空𫖵高头一睇，呢个混世魔王，样确系几得人惊，足足有三丈高，头带住顶乌金盔，身披黑战袍，仲着件黑色嘅盔甲，兼夹黑口黑面，攞住把大刀，系威系势噉企喺度，马骝王大喝一声：
「又话你叫做咩混世魔王，我话你混帐魔王就真，望你生咗对好似牛眼咁大嘅眼，老孙企喺度你睇毋见呀。」
混世魔王一睇。
「我以为你何方神圣，原来一粒色噉企喺度，得箇四尺高矮，企喺度都未够我膝头哥，嘴上连条胡须都冇，你至多咪三十岁，两手空空，居然想学人地登门打斗，几多条命得够死，你吔。」
孙悟空一听就火滚。
「你真系有眼无珠，你以为我矮细，我要变几高就得几高，你以为我冇兵器，我两手托住天边月，毋同你讲咁多，打你两锤就知味道啊你。」
讲完就扑上前，兜口兜面就打过嚟，混世魔王就退后一步，大声嗌：
「咪住，我睇你咁细粒，我神高神大，要我揸埋把大刀嚟同你打，噉杀咗你都俾人地笑话我，好，等我劈低把刀，两拳将你撘扁，等你死得眼闭至得。」
「睇毋出，你都好似好汉噉嘅样。」
「嚟嚟嚟，我地嚟比试下拳脚！」
