辜苏历程（鲁滨逊漂流记）1902年版，第五章，粤语版

原著：英国，丹尼尔·笛福

翻译：英国传教士，英为霖

抄录：常ならむ

第五章

    谁知过哓一阵，忽然又想到我自己一人嚟到呢处，点能得生呢，冇得食，衣服又失晒，身上所带嘅，独系一把刀仔，与及一枝烟筒，一盒烟叶呮，防身嘅器械，亦未会带来，若遇着恶兽，岂毋系被佢食哓咩，毋系被水沉死，就系被兽咬死，真毋抵咯，噉就想起嚟，好忧好怕，一阵间赑屃，好似癫嘅噉，箇阵将挨晚，见一樖(po1)树好秀茂，想上树歇宿，嚟避兽伤害，箇时见颈渴，就揾到清水饮饱，正想上树，但见树身好多簕(lak6)，极难上去，又想下树，咁多簕，或野兽睇见毋敢上，我可以得稳阵咯，故此定意上树，虽然难亦毋怕，出尽力爬上树顶，就拣枝叶浓密处，喺箇处瞓，而且𢬿刀仔斩一尖利树枝，做家伙使，又将烟叶切碎，含在口嚟止饥饿，疚癐，即时瞓着，过哓一晚，瞓醒个时，已经天光咯，热头都出咯，擘开眼周围睇下，就见自己所坐箇只大船，已经被风打到昨晚抱石上岸箇处，离呢处不过三里咁远，心好欢喜，又见五六里之外，有大船所遗落三板一只，抗在岸上，亦系被潮水涌上嘅，就更欢喜，以为有呢只三板，就不难到大船咯，即时落树去揾，谁知到箇处，有条大河隔住，箇条河好阔嘅，箇啲水流得箭咁快，毋过得，无奈何返转头，等到潮水退，然后致算，因为潮水退，露出沙滩，游水到大船处，箇条路近啲，故此立定主意，等潮水退，用力游到船边，但船身高大，不能上得，好彩有条细绳髧(dam3)落，就揸住嚟上咯，觉得好疚倦，上到船就周围睇下，见船头被浪打穿一个孔，陷入沙内，船尾拮(gat6)起，船上货物齐全，独系毋见一个人，记起先时岂毋伤心咩，就觉得赑屃，好彩各样物件，俱喺后舱，箇阵时已经肚饿，就开个食物舱，攞饼干挤入袋处，一自行，一自食，想𢬿在船中所有嘅搬上岸，但一人嘅力，又冇船只可搬运，船上虽有两只三版，但一只被水冲去，一只已抗喺岸上，离五六里咁远，毋攞得返，若再迟迟慢啲，冇耐水大，就不能行咯，于是想得一条计，𢬿一条木，用绳绑住，抛入水中，又一连抛几条，就落船扎成杉排，自己落去试过，谁知杉排轻，只可载人，不能载得物，噉就再到木匠嘅房，攞铁凿铁锤，𢬿箇啲木，钉成主固嘅木排，当作船只用，𢬿绳绑实，再到船中攞空木箱，先将面粉面包，羊肉干，大麦，米粉，各样挤在箱处，𢬿绳吊落去，箇阵听闻水大嘅声，自己嘅衣服在沙滩处被水冲去，就急啲入到船舱里头，攞自己嘅衣服，共别人嘅衣服几件，挤入箱内，又攞鸟枪手枪，各样两支，与及木匠所用嘅各物，尽地搬落排上，好怕大船即时沉哓，就呢啲物件比较黄金仲贵重，，因为黄金有买卖嘅地方，然后见得宝贝，今我在呢个海岛，虽然有，亦不能养命，反转不如呢啲物件，得嚟帮助做各样嘅技艺，藉赖呢啲可以养生，故此定意再到船中，揾各样物件，虽然辛苦，亦毋怨咯，就寻到旧刀两把，火药三大桶，一桶已经湿哓，毋用得，又揾得两把锯仔，一把斧头，总挤落木排上，想撑回去，惟系冇舵冇桨，又冇桅𢃇，冇竹篙点行得呢，就再到船上揾得三枝坏桨，好得意咯，即时解缆开身，忽然箇天好黑，落大雨，慌怕又试有风，好在潮水大满，冇浪而且顺风，噉就向前直驶，后来觉得木排行使，有啲弯曲嘅样子，就知到近住前便，必有细河，冇耐，果然系咯，箇心好欢喜，谁知木排一头已经撞埋岸，成排擲仄，就慌起嚟，怕木排摇动添，就所带嘅物件，又辛苦半日，总毋系嘥晒，而且性命亦不能保咯，噉就𢬿个身挨住木箱，用力𢬿桨撑住，毋致到擲仄，约莫半点钟水大定，然后脱出危险再驶前去，到小河湾曲箇处，就想上岸，可以望下海中船只，呼救都易，若离得远，虽有船只来往，亦毋知到歇一阵间，就潮水退，现出平地，用桨撑住，等潮水退干晒，然后得平安无事，但系怕木排流动，急啲用木撑住一头，嚟做锚使，等到搬晒各样物件，就将木排拉上岸，但系箇身了不得咁疚癐咯。