滩簧《上海景》唱词

偏要发!!! 原词里用“吓”表示“呀”，我都改成了“呀”。

一段：

鼓板与胡琴呀，我要吿诸君，大家坐下来静呀静静心呀，我来末唱一枝上海景呀，唱小曲倒也好算顶呀顶时新。

小小上海城呀，自古到如今，从前不过城里向市面兴呀，城外末处处是荒坟呀，就是那市面浪冷呀冷淸淸。

外国人来通商呀，第一到上海城，城外头夷场改呀改端正呀，大洋房五层替七层呀，从此末上海滩渐呀渐渐兴。

上面有天堂呀，下有苏杭城，过歇顶好要算上海城呀，各国末才要上海来呀，马路浪真闹猛，一夜到天明.

东面黄浦江呀，歇仔个大火轮，泥城桥畔边就是跑马厅呀，场化末大得无淘成呀。四通围有到那十呀十里零。

一到跑马讯呀，实在眞眞兴，红男绿女轧得来弗相信呀，衣裳末换得簇来来新呀，到那第三日跳浜闹盈盈。

二段：

电车替汽车呀，快得勒像腾云，一路电车直到小东门呀，城里向城隍庙闹盈盈呀，两边摆个摊头末密呀密层层，

还有桂花厅呀，生意眞眞兴，得意楼相对柴呀柴行厅呀，还有末九曲桥荷心亭呀，点春堂大架山好呀好风景，

夜里城外头呀，堂仔里闹盈盈，长三时髦红呀红倌人呀，出堂差打扮得眞漂亮呀，新包车纲丝轮耀呀耀眼睛。

可惜要抽籤呀，才要来关门，要分三期禁呀禁乾净呀，抽着个已经是来关门呀，可惜那多多化漂亮好倌人。

大英大马路呀，修作得杀辣淸，先施永安开勒笃两对门呀，房子未高得来造七层呀，还有那花园末造呀造屋顶。

四马路浪向呀，野鸡密层层。老娘姨专门拉呀拉客人呀，一大半才是个江北人呀，掽掽俚杀千刀无呀无良心。