辜苏历程（鲁滨逊漂流记）第一章，1902年版

英国传教士：英为霖翻译

常ならむ抄录

第一章

    我辜苏西历一千六百三十二年，英国约城出世，父亲名叫辜苏，本系别国嘅人，喺英国造生意，因此居住好耐，后来取英国女子卢边信氏为妻，所以称我名为辜苏。我父亲系公道嘅人，好大生意，我有两个大佬，个大嘅当兵，共西班牙人打仗，被佢打死，个第二嘅出外，毋知佢生死，我系至细嘅，因为父亲产业甚多，故此我年纪将近二十岁，都毋肯学事业，父亲想我学造状师，望将来得尊贵嘅职，但系我至喜欢出外游玩，时常自己话，父亲虽然要我学上等事业，但我毋想，母亲亦屡次劝我，但我主意必要去游玩嘅咯，又思想下，我父亲系聪明聪明正直嘅人，冇乱讲说话㗎，独系我想出去游玩箇件事，佢不歇阻我，毋准我去，后来父亲有病，叫我行埋面前，对我话：“仔呀，你想出外有乜益呢，喺屋企有事可以照应，若系出外，就容易学坏，因噉作恶犯罪嘅，亦毋少，你喺屋企守分造事，亦可以发财而且亲戚朋友，大众聚埋一处极之快活，你若系必要出外，实在毋听父亲话咯，毋论喺边处地方，有好人，亦有毋好人，若话出外，怕未必尽系好人，人系有大多钱财，佢嘅忧虑是必多，我家中如今得饱暖，亦可以过得去，你喺屋企好食好着，冇忧冇虑，仲话毋安乐咩，何必出外呢，父亲又𢬿好多说话嚟劝我，又讲起大哥嘅事，话佢因毋听话，定要当兵，致到被枪“石驳”打死，你若系真正毋听我话，将来必有悔恨，但父亲虽然系有心讲出呢啲说话，实系后来嘅应验，父亲共我讲及大哥嘅事，箇阵时满面眼泪，我心亦见赑屃，故此当时立定主意，依父亲嘅说话，从此毋想出外咯，谁知过两三日之后，个心忽然改变，毋记得父亲嘅吩咐，因想出外嘅心，好似先日一样，我想毋出声，静静去，但个心毋忍得，故此去到母亲处话，父亲叫我学状师，毋合我心，怕嘥时候，又嘥钱财，求你劝父亲畀我出外一次，嚟试下点样，若系毋好就依从父亲话喇，母亲听闻我噉话，辘起双眼，睇住我话，你想我𢬿你出门嘅事，劝你父亲咩，系枉费唇舌呮，你若系出门，必定有毋好嘅事做出，我就两三賬求佢，究竟母亲有爱仔嘅心，应承肯话过父亲知，但毋肯劝佢，我父亲听闻母亲讲，就叹息话，我嘅仔喺屋企，可以做好人，若出外，必定有非常嘅患难，我实在毋准，谁知日子过得好快，不觉又上下一年咯，因为不能出外，致到极之赑屃，偶然一日行到海边，遇着一个朋友，搭佢父亲嘅船，上伦敦城，佢请我同埋去，毋使水脚，我一听闻呢啲说话，正合心水，故此毋对父母话，就私下上船，箇日系一千六百五十一年，九月初一日咯，开船之后，初七日逆风，毋驶得船，就湾泊箇处几日，但觉风渐渐大，到第八日越发关系，晏昼时候，见咁大波浪打过船面，即时抛多一个锚，及到挨晚，又斩去两枝桅，望只船定啲，毋会咁逳，谁知后来仲更交关，我了不得咁慌，箇啲水手亦估系绝望咯，到半夜，有人落去舱底睇下，见已经入水有四尺深，众人快啲用机器“抯”去箇啲水，叫我帮手，点估箇啲水一自“抯”一自多起上嚟，怕必会沉咯，故此船主不歇烧炮，招人拯救，离冇远，有一只船，使一只三板嚟救我地，但系呢啲功夫十分危险，极难做嘅，好彩箇啲人毋顾自己嘅生命，极之落力，救我地各人，落佢三板，冇耐见箇只大船就沉咯，我地喺箇只三板处，想埋去救我箇只大船处，因浪大如山，总毋埋得，噉就掉到岸边，各人上岸，箇处啲人，待我地极好，样样事得佢照应。

注：箇（go3）