辜苏历程（鲁滨逊漂流记）1902年版，第七章，粤语版

原著：英国，丹尼尔·笛福

翻译：英国传教士，英为霖

抄录：常ならむ

第七章

    又睇见有只野猫，踣倒箱上，猫见我行近，就走去，冇几远，仍然拧转望下，我𢬿火枪向住嚇下佢，佢亦毋怕，因此可知呢个岛，实未有人，我见就欢喜，因第一账见生物，好似朋友一样，攞一块面包畀佢食，只猫就闻闻下食咗，仍然毋去，有再要嘅意思，想下自己怕毋够食，毋畀佢，佢见我无得畀，冇耐就去哓，噉就𢬿火药一桶拆开，每包分开搬上岸，因为大桶好重，一个人嘅力，毋搬得起呀，到搬晒，然后𢬿篷𢃇嘅布遮住，用木撑起搭成一个帐幕，免落雨热头晒，物件坏哓，又𢬿空桶四围趸住，好似一幅墙，提防野兽佢，又𢬿板做一度细门，𢬿桶顶住，后𢬿床被共褥整好晒，火枪挤在身边，手枪放在枕边，就瞓到箇处，觉得好暖，好软熟，就欢喜话，咁好嘅床铺，我好耐冇嘅，真好彩喇，后来因搬物件辛苦，了不得咁疚癐，一瞓就瞓着，醒时已经天光咯，就起身执埋箇啲军器，有好多可以用，毋嘥，但火药一大桶，已经潮湿，毋使得咯，又常时去到船处攞物件，可惜不能攞晒，因为毋知几时离开，呢处绝望嘅地方，得到有生路，第三账去攞得篷布，大细绳索，粗幼嘅麻线，一啲都系有用嘅物，又揾得白糖饼干，每样一桶，极欢喜，就𢬿篷布包好，搬到岸上，第二日见船中仲有极大嘅缆，可惜粗重毋拧得逳，用刀斩断哓，又有细小嘅船桅，将来亦可以造屋嘅用，就攞哓毋使要锯要刨嘅力，噉喺岸上十三日，到船攞物件，共十一账，到十二账，船中细小，可以带得嘅物件，尽地攞晒，所剩独系箇啲好重嘅物，一个人嘅力毋能拧得，又见一个架，放有几把小刀，一把铰剪，匙羹，羹叉几支，总攞埋，又开一柜桶，有欧洲所用嘅金银钱好多个，叹息话，我今独自己喺处，金银我冇乜用，不如一把刀仲好，就毋要，又再想下，后来若得到返去归亦少不得要呢啲物，故此亦攞埋，仍然钉一个大木排，𢬿各物挤好晒，忽见天黑暗，好似又系风嘅样子，而且风共水都毋顺，急啲将木排撑返转头，正话到岸，偶然间毋仔细，木排撞仄（zak1），人、物跌落水，出力爬起，因有物件在身，见系好重，故此觉得好出力，我就将各物捞起，箇啲铁链，共重嘅物，沉落水底，等到闲时捞起，亦无妨，但要收藏各物件，系紧要，箇晚夜，又大风，又大雨，至到第二朝早，

去睇下箇只大船，毋知去边处，但系可以带得嘅物件，已经攞晒，所剩下嘅，亦冇物紧要，故此毋使可惜，所可惜嘅，呢只船共我做伴系好耐，今又离开去哓，真正叫做孤独喇，想下岂毋赑屃咩。