The Rock踢爆 DC本来唔想亨利卡维尔再演超人

人称The Rock嘅Dwayne Johnson，主演嘅新片《黑亚当》上星期全球戏院票房已经超越3亿美元，计埋iTunes网上销售条数，相信巨石可以提早收炉过圣诞。不过佢仲好勤力咁玩TWITTER同fans沟通，仲拍咗条片爆料。
Dwayne Johnson喺twitter放咗条一边揸车一边讲嘢嘅片，佢梗系有提《黑亚当》，仲话想令角色成为DC宇宙最强而有力嘅一角，之后就将话题扯到佢老友、「超人」亨利卡维尔。The Rock大爆，DC好唔想亨利回归再演超人，但系佢「接受唔到啰」，仲话呢个决定唔合符逻辑。「石哥」后来极力要求之下，DC终于都揾返亨利再演超人，仲话有呢位超人，「可以建立更妥当、有策略同聪明嘅DC宇宙」，呢下都几霸气。
DC同华纳呢一年嘅高层大执位，我地都写过好多次，之前提过Dwayne Johnson绕过DC前高层Walter Hamada同上层沟通，要求留住亨利卡维尔。月初又有消息指，本来黑亚当一角安排喺另一套超级英雄片《沙赞2》先出场，但系敲定做黑亚当嘅Dwayne Johnson出口术话唔制，而且《黑亚当》剧本更无安排沙赞同黑亚当激战。
睇到FF10因为Vin Diesel疑似「热烈参与」搞到导演林诣彬都劈砲唔捞，似乎拍过FF系列嘅Dwayne Johnson都要以此为鉴，唔好搞到《黑亚当》要换人执导。