童星張預東細個為避債搬屋 曾做邊青加入黑社會

90年代《閃電傳真機》的精靈童星「東東」張裕東（現改名張預東），鏡頭前是永遠的開心果，但鏡頭後的童星生活，原來過得一點也不快樂。「唔知點解，好多人覺得童星就係有錢仔，其實我剛走（離開無綫），有啲朋友都話『你唔怕㗎啦你』，我都唔知點解我唔怕，好似覺得我發咗達咁。」

東東是名副其實的「屋邨仔」，自幼家庭環境複雜，日前重返成長地方，用熟悉的聲音導航，彷彿稚氣未脫：「呢度係小西灣邨，我長大嘅地方，小西灣分上邨同下邨，我就巴閉嘞，上邨下邨都住過，點解呢？因為以前細個欠人錢，被迫要搬屋，所以住過兩間公屋。」東東沒有開口說出「欠錢人」是誰，心中顯然仍有一根刺，「媽咪一個人湊大我同家姐，屋企人爭人錢，後來離晒婚，某程度上有經濟負擔，呢件事（童星）都幫到屋企。但之後自己曳，家姐乖，湊我好辛苦，所以童年日子唔係過得好舒服。」

5、6歲入行做童星亦有段故，「當年高班升小一暑假，扭計要媽咪帶我去電視台玩遊戲。媽咪買咗份《TVB周刊》，幫我同家姐梅花間竹咁填晒全版報名表格，咁橋嗰一期唔係玩遊戲，而係走入大染江招考小演員，咁啱寫咗我自己。」東東由一千幾百位小朋友中脫穎而出，之後加入《閃電傳真機》做小主持，由於夠醒目又口齒伶俐，當年拍劇、拍電影以外，還以「東東大師」之名出碟及客串主持電台節目，非常忙碌。

感激肥姐後台鼓勵

當年東東大師和陳奕合唱的《Bala Bala Bu》更成為1997年度兒歌金曲頒獎典禮十大金曲之一，他緬懷過去亦表現得很雀躍：「嗰時兒歌好多人聽㗎，觀眾同表演者都好期待個頒獎禮，唱live又載歌載舞，仲有好多明星，張學友、郭富城、Twins、陳奕迅……，嗰時玩兒歌真係正。」不過，令東東最難忘，並不是一班紅星出場，而是已故藝人沈殿霞，東東說：「其實以前上台前都會好緊張，一緊張隻腳就震，自己都呃唔到自己。一次好深刻，有次《兒歌金曲頒獎典禮》，肥姐係司儀，原本布幕一打開，我就要講大約一分鐘嘅稿，我係超緊張，嗰刻我就知道乜嘢叫大將風範，肥姐拍一拍、攬一攬我話：『東東唔使驚，做返你頭先full dress rehearsal嗰個就得。就係一句說話令我個人冇咁緊張，你會覺得係一個大姐姐、一位前輩撐一撐你，佢咁有經驗，真係睇得出，而佢一句說話又真係幫到我，勁呀勁呀！」

東東曾誤入歧途

每個人都有自己的路，80年代出身的童星柏林仔，離開娛樂圈後選擇投考督察，比柏林稍遲入行的東東卻誤入歧途。曾有報道指東東19歲那年縱情玩樂，過着荒唐歲月，東東沒有說清前因後果，但直認自己雖然是名校華仁書院舊生，但曾經學壞，荒廢學業，中二、三已經開始食煙，他引用網上潮語笑着說：「壞過凱婷！加入黑社會？都有㗎，過咗去唔怕講，嚟到我長大嘅地方幾好，屋邨仔又點，壞過咁又點，知道自己唔好就改咗佢，我係壞過凱婷好多倍，但冇傷害人，只係傷害自己啫。」有沒有坐過監？他說：「冇試過……總之係一啲年輕人可以做嘅壞事都做晒，但我又返到轉頭，人大自然諗通。」

東東年幼時亦遇過不少霸凌事件，「以前細個做童星好慘㗎，喺街頭已畀人話《12隻恐龍》，街尾又笑你《閃電傳真機》嗰個，但諗返又冇乜嘢，依家想俾人笑都冇啦，其實都幾好。」但有一件事卻令他氣上心頭，「以前上連登成日俾人鬧，最嬲一次係有人話見我喺月台打阿媽，嗰陣未有網絡欺凌呢啲字眼，話我學壞唔緊要，傷害自己啫，但話我傷害我阿媽喎，呢個真係頂住！吹水，我俾阿媽打就有，我點敢打阿媽！」

現年33歲的張預東（東東、原名張裕東）幾歲就加入娛樂圈，但童星路不能長久，攞完無綫10年長期服務金牌便離開。青春期的東東一度迷失方向，誤入歧途，幸得資深配音員May姐謝月美提攜加入配音界，「其實我細個都有幫迪士尼做配音，可能有啲天份，但呢行最緊要係勤力同專注。我又唔敢講自己好鍾意配音，唔想美化到好夢幻，但呢份工搵到錢，所以我做咗咁耐。」

最怕叫扮鄭子誠tone

東東曾聲演逾千個角色，包括有大家熟悉的動畫《反斗奇兵》聲演主角「安仔」、韓劇《來自星星的你》聲演「都敏俊」、卡通片《銀魂》聲演沖田總悟等等，他自言每位配音員都有一把屬於自己的獨特聲線：「成日俾人問你有幾多把聲呀，我聽得最多：『東東呀，錢就得咁多，你可唔可以扮到鄭子誠個tone呀？』我話冇得扮，你搵返鄭子誠啦！其實配音員得一把聲，但我哋可以運用唔同嘅語氣同聲調作出變化，好似演員咁，演員都係得一個樣，但靠化妝、服裝等，就塑造出好多唔同角色。」

斷斷續續在無綫工作22年，早前東東拍片宣佈裸辭，有感「一個人改變唔到TVB，TVB都改變不了我」決定外闖。「好多朋友話『恭喜你跳出comfort zone』，但真正comfort又點解要離開呢，好似朝早7點幾起身，你唔會想跳出被竇，但當一位女士嚟月經唔小心整污糟床單，咁就會即時想跳出去，因為嗰度唔係一個comfort嘅地方。」

賺過年薪近百萬

一個艱難決定，或許大家都意想不到一位資深配音員年薪可達百萬元，東東笑着說：「Chur到盡兩、三年啫，接近一百萬，但未到。其實嗰時我同做4份工冇分別，TVB正常工作，第二份喺幫TVB寫配音稿，一來搵錢，二來提升自己配音技巧，仲有廣告，同出面接啲production嘅工作，都辛苦㗎。」近年配音界走下坡，無綫又不斷裁員，他有點意興闌珊說：「大家合作開嘅同事冇晒，一啲管理層或行政嘅人，唔識製作就去干預製作，咁唔製作啦不如，搵返你哋控制到嘅人去製作。」他將TVB比喻成一間工廠，自己只是一粒細小的螺絲，但自覺即使是螺絲亦有選擇的權利。有沒有後悔裸辭？他堅定地說：「近兩年係搵少咗，但我又唔係好差（人工），所以都諗咗好耐，但後來諗通咗一樣嘢，唔係樣樣嘢同錢有關，有啲嘢你得到咗錢，但失去自己，一世都後悔。我已經後悔，我應該早啲走！」

沒有想過食回頭草？東東決絕說：「我諗有機會再做都未必會做（配音），走得就預咗從頭嚟過！我離開TVB係拋棄好高人工，好多嘅錢，但如果走返入去出面嘅配音行業，係主動去投入一個搵好少錢嘅行業，哈哈，其實出面配音好低人工。」東東不介意由低做起，想過揸的士、想過進修、想過做YouTuber，相信天無絕人之路。