辜苏历程（鲁滨逊漂流记）1902年版，第九章，粤语版

原著：英国，丹尼尔·笛福

翻译：英国传教士，英为霖

抄录：常ならむ

第九章

    讲掘沙嘅工夫，仍然冇减少，所掘出嘅沙泥，堆在木墙侧边，好似岸边噉，容易上落，起屋嘅事，虽然略略做成，但系厨房炉灶仲未做到，点煮得食呢，正在打算，忽然想起，我喺呢个荒僻嘅海岛，总冇别人，比较犯罪嘅人仲苦楚，呢处嘅地，离开成千里咁远致有人，我今举目无亲，天上嘅神，做乜咁刻薄待我呢，又想下我比较船中众人，系点样呢，佢地死哓好耐，我就独自己得生，都话得神刻薄待我咩，况且大船毋即时沉，亦系神恩，若毋系噉，就我日中所用嘅都冇咯，点好侮慢神，嚟加多自己嘅罪呢，又想下我喺呢处，若使晒各样物件，就点算好呢，火药衣服各样，若毋俾雷火烧着，足够一世所用，但要悭俭至合，又想下我今喺呢处，要记住年岁，噉就想到一条至好嘅法，喺海边竖一条木杆，好似十字架噉，𢬿刀刻字在杆处，记落得救嘅时，系一千六百五十九年，九月三十日，到呢个岛时，箇太阳啱啱当正，𢬿量天嘅法嚟推测，故此得知呢个时候，木杆嘅样，系四方嘅，四便都可以刻字，毋止记年，亦可以记日，每一日画一条细痕，每七日画一条大痕，满一个月，就画一条长痕，系做一年嘅记号，若我死在呢处，就后来嘅人，见呢枝杆，亦可知得咯，又想下我船上亦有纸笔带嚟，可以写落每日嘅事，独系墨水有限，若使晒，就毋写得咯，又记得箱里有英文圣经三簿，葡萄牙文嘅书毋少，又有行海嘅图，测量海线嘅书，共测气候嘅器具三副，系行船不可少嘅物，又带嚟一只狗两只猫，猫系抱住佢嚟，狗系自己游水跟住嚟，狗嘅性好，又肯出力帮助，独系可惜毋会讲呮，带嚟使用嘅物，但系冇针线共布，又冇戙鍫，锄头两件，故此做木墙时，要出好多力，喺山中攞木连根拨起，削哓啲枝，锯断刨光，要三日致造好一条木，做墙起屋工夫，约莫一年，实在一人嘅力，做呢啲亦要好耐，但喺呢处造事冇人催迫，故此迟慢啲亦毋紧要，因为起好屋之后，就可以得闲咯，但人毋做事，心中必定毋自然，噉就点样好呢，现今有一个舒畅嘅法子，将我所遇着嘅事写出可以解闷，古人有话，小人独处不善，故此必遇着人将自己嘅事对佢讲及，然后致觉自然，但我如今对乜谁讲呢，独系自己写字，自己警醒，或者可以警醒后来嘅人，所写系照依功过格式，做成问话嘅说话，问我今独喺呢处危险嘅地方，想离开呢处有生命去归，怕毋得咯，答：你如今得生，箇啲船中嘅人点样呢，岂毋系好过佢咩，问做乜喺世上，独拣我出嚟，漂流呢个海岛受苦呢，答：虽然系拣你出嚟，但神用大能救你，系得生，毋系死嘅，问我漂流呢个绝岛，告诉无门，果系点呢，答：呢个生活嘅岛，生物极多，比较全石嘅死岛更好呀，问我如今衣服冇几多，答：呢处系热地，衣服多亦冇用嘅，问若系野人野兽，成队嚟到，我虽有火枪，一人点能敌得咁多呢，答：呢个岛冇野兽，亦冇野人，比较喺阿非利加洲，系安乐得多咯，问我今冇一个人同埋讲，答：系有神共你讲，况且神使大船近岸，畀你得有咁多嘢，一世都毋使得晒，以上所写，虽有毋好之处，但好处极多，所以话人毋细想下，箇啲好处，亦毋知呀，故此跪处多谢神恩，但凡人见我噉样，亦当多谢神恩呀。