欢迎光临散文网 会员登陆 & 注册

西游记粤语(林兆明讲古版)第六回

2023-02-07 11:04 作者:常ならむ  | 我要投稿

第六回

孙悟空听到话玉皇大帝要见佢,就高高兴兴走到上殿。


「陛下,召老孙有乜赏赐?」


「朕见你得闲无事,想重用你,要你嚟管辖蟠桃园,你要留神在意。」


孙悟空仲意为玉皇大帝咁信得过自己,就欢天喜地噉应承。


美猴王做嘢系最性急,一出凌霄宫殿,就连大圣府都毋返去,即刻去蟠桃园上任,蟠桃园箇个 土地公就拦住佢问:


「大圣,你去边处?」


「我奉玉皇大帝旨意,代管蟠桃园,而家嚟查点。」


原来守蟠桃园箇土地公仲未收到圣旨,所以就毋知到孙悟空嚟,听到佢噉一讲,连忙施礼迎接,叫晒箇班锄树力士,运水力士,修桃力士嚟到拜见孙大圣。然后请齐天大圣入园巡视,箇个孙悟空入到嚟一睇,真系花团锦绣,万紫千红,梅廊曲折,亭台楼阁华丽非凡。


最映眼嘅就系一片桃树林,分做三排,整整齐齐,桃红叶绿,老树婆娑,彩蝶纷飞,清香扑鼻。


「呢个花园咁靓㗎?」


 「禀报大圣,呢个蟠桃园就毋同一般风景名胜,呢啲桃树系瑶池王母亲自栽培㗎。一共有三千六百棵,分开做三排。前面箇排就一千二百棵,箇啲仙桃三千年先至熟一次,人食咗佢就成仙得道,体健身香。中间箇排,又系一千二百棵,六千年先至熟一次啊,人食咗佢,会腾云飞天,长生不老㗎,后便一千二百棵,九千年先至熟一次㗎,人如果食一个呀,与天地齐寿,日月同庚。」


「噉难得难得,你小心看管。」


自此以后,孙悟空就真系用心照应。


每隔三五日就嚟到蟠桃园巡查。得闲就嚟呢度玩赏,亦毋外出交朋结友,亦懒得去云游四海。


    有一日,美猴王就喺桃树下边巡来巡去,𫖵高头睇下。老树枝头,箇啲仙桃大半都熟晒,一只只好似拳头咁大,胀卜卜,圆碌碌,红当当,香喷喷,咪讲话食啦,睇下都心逳,闻到都开胃,马骝食惯生果,点忍得住吖。


    「几千棵咁多,噉玉皇大帝一家人点食得咁多,摘佢一只食下,都得啩。」


    之佢一谂,而家做齐天大圣喇,毋同当年喺花果山做马骝王,兼夹又系负责看管嘅,监守自盗偷桃食俾人知到毋好听,于是吞咗几啖口水,咬住牙关忍住。

又过咗几日,又嚟到桃树下便,行行下,企下,睇下,闻下,呢次忍毋住喇,想逳手去摘,拧转头一睇,个土地公同埋成班齐天府嘅仙官仲跟紧后便,毋方便,箇美猴王多计仔,佢打咗个呷噜。


    「老孙都有啲眼瞓,我喺亭箇度敨下,你地喺外面等我啦。」


    箇班仙官同埋箇土地公,成日噉跟住孙悟空噉巡查到脚都软晒,天时又热,恨毋得悟空出声,于是成班出晒外面,饮香茶,倾闲偈,孙悟空见到啲随从走晒,啱晒,佢即刻除咗顶帽,脱咗箇套大圣官服,即刻上树。

上树正系佢老本行,呢啲系佢看家本领,上到去之后,左挑右拣,拣咗个最大只,最熟嘅仙桃,一啖就咬落去,成嘴香喷喷,吞落肚甜到入心,同花果山箇啲比真系天共地,几乎连核都食埋,食完之后舐舐嘴噉跳返落嚟,着返好衣服,大摇大摆噉打道回府。

呢啲系仙桃嚟个噃,闻到就想食,食过就返寻味。食完之后,马骝王成日心思思,隔两一就去偷食一次,越食越上瘾,越食越猖狂。第一次食一只半只试下味道,食食下就一啖一只,zaang6到饱为止,最初拣熟嘅嚟食,熟嘅食完喇就食半生半熟嘅,大嘅食晒细粒都毋拒啰。


    有一日,王母娘娘准备设宴,大会群仙,要喺仙宫里便嘅瑶池箇度做“蟠桃胜会”,又叫做瑶池大会,姖就叫七个仙女带埋花篮去摘桃。箇七个仙女七种打扮,着住七种毋同颜色嘅衣服,就系红衣仙女,青衣仙女,白衣仙女,黑衣仙女,紫衣仙女,黄衣仙女,绿衣仙女,七个仙女就一齐嚟到蟠桃园,就见到土地公,仙官同埋力士喺门前把手。


    「我地系奉王母旨意,嚟摘桃设宴㗎。」

    箇土地公就上前讲:

    「七位仙姑,今岁不比往年,玉帝派咗个齐天大圣嚟呢度监督管理,要报畀大圣知先至摘得。」


    土地公就带埋呢七个仙女入去揾孙悟空,点知箇亭箇度只系放住大圣嘅衣冠,根本毋知佢去咗边度。七仙女就心急嘞。


    「我地奉旨嚟㗎,揾毋到大圣,噉毋通我地空手返去吔?」


    「噉既然系奉旨嚟嘅,噉就算啰算啰。我地大圣梗系去咗揾朋友,噉啦噉啦,我作主先,你地先摘,等阵大圣返嚟,我再报畀佢听。」


    于是箇班仙女就入到桃树林里便摘桃,先喺前便箇排摘咗两篮,又喺中间箇排摘咗三篮,再去到后便箇排一睇。


    「死喇,树上花果稀疏,剩返啲冚嘭唥都系青咇咇嘅。」


    梗系啦,俗语都有话:坐食山空。何况孙悟空箇个神仙桃,枕住嚟食,有乜法子毋食清光正得㗎。

七个仙女左揾右揾,几辛苦先至有棵老树嘅横丫箇度有只半红半白嘅仙桃。青衣仙女就跳起身将箇树丫拉落嚟,红衣仙女就趌起脚摘咗佢落嚟,箇青衣仙女一放手,箇树丫就弹返上去,突然间,上面跌咗只马骝落嚟,一手揸住一支二丈长,碗口咁粗嘅寓意金箍棒。


    「何方怪物大胆敢嚟偷桃。」


    原来大圣啱啱食饱咗肚,变咗只二寸长嘅人仔,匿喺箇树丫处瞓觉,俾箇青衣仙女将树枝一弹就嚇醒咗佢,所以现咗原型出嚟干涉,嚇到箇七个仙女脚都软晒,一齐跪低。


    「毋好啊毋好啊,大圣,大圣,我地毋系妖怪嚟㗎,系王母娘娘派嚟嘅七仙女,嚟摘仙桃做蟠桃胜会㗎,头先揾大圣揾毋到,我地惊误咗王母娘娘嘅旨意,所以未等大圣返嚟,先喺呢度摘住先,大圣,大圣,请你恕罪。」


    「哦,噉呀,冇嘢,冇嘢,起身起身起身,系呢,噉王母娘娘摆酒设宴,请边啲嚟赴会㗎」


    「有规定㗎,请西南东北中五方五老,即系西方嘅西天佛老,菩萨,圣僧,罗汉,南方嘅南极观音,东方嘅崇恩圣帝,十洲三岛仙翁,北方嘅北极玄灵,中央嘅黄角大仙,仲有五斗星君,上八洞三清,四帝,太乙天仙,中八洞玉皇,九垒,海岳神仙,下八洞十殿阎王,仲在凡间嘅散仙,各宫各殿大小尊神,通通都请嚟,请佢地嚟食仙桃,所以叫做蟠桃大会。」


    「哦,请咁多人㗎,噉有冇请我老孙啊。」


    「噉,噉我地又未曾听到㖞,」


    「我系齐天大圣,就算请我老孙嚟坐酒席又有咩毋得啊。」


    「噉我地又毋知到,不过呢啲系上次个规矩,呢次毋知请边个咧。」


    「系嘅系嘅,呢啲毋关你地事嘅,你企喺度等我先,等老孙打听下消息,睇佢有冇漏咗我先。」


    讲完之后,佢对住七个仙女一指,嗌咗声「定。」,箇七个仙女突然间呆晒喺度,半醒半瞓,擘大眼睇毋到嘢,擘大口毋识讲,手脚毋识逳,一个一个栋笃企喺度好似七个木头公仔摆喺桃树脚下边噉。


    原来孙悟空用嘅系定身法,俾佢定定咗喺度,就有牌都毋识逳,箇齐天大圣,定完箇七个仙女,就跳出蟠桃园,一路就去瑶池,行咗一半路,迎面就撞到箇赤脚大仙摇摇摆摆噉嚟紧,孙悟空一谂,“乜佢请箇啲客人嚟紧个𡃓,紧系漏咗我定喇,岂有此理,平日就叫我管蟠桃园,做有份做,食就冇我份?咁偏心?睇我老孙毋起,你毋请我系嘛,我冒名顶替,去开下眼界,食翻餐都好,”


    于是,佢就走上前对赤脚大仙行咗个礼。


    「老道,老道,去边处」


    「王母娘娘相请,去赴蟠桃胜会。」


    「好在我撞到你咋,老道,你有所不知,玉帝因为老孙翻筋斗快,所以派老孙去请各位,玉帝话,请老道先去通明殿箇边行礼谢恩,然后先再返嚟瑶池赴宴,好在我撞到你啫,毋系你咪行错路?」


    箇赤脚大仙系个光明正大嘅神仙,点估到孙悟空佢咁鬼马,就信晒,拧转头就去通明殿,一边行就吟吟沉沉


    「咁古怪嘅咧,今年换地方嘅?」


    箇赤脚大仙行转背啫,孙悟空就摇身一变,就变做赤脚大仙噉嘅样,飞咁快就趯去瑶池。


    入到里便一睇,齐齐整整摆好晒台,上面放住龙肝凤肉,熊掌猩唇。珍馐百味,异果嘉肴。


    正睇到眼都定晒,忽然闻到阵阵酒香,拧转身一望,原来喺右边走廊箇度,有几个造酒嘅仙官,盘糟力士,带埋几个担水道人,烧火童子,喺箇度将一埕一埕嘅仙酒搬出来,箇啲毋系凡间一般水酒,箇啲系九重天上,仙宫里便嘅玉液琼浆,纯浓佳酿,美猴王一闻到就已经口水都流晒啦,佢仲左望右望。


    「而家仲未有一个神仙到?有牌都未得入席啦,要等几耐啊,万一畀个赤脚大仙赶咗返嚟,噉咪穿晒煲?咪啦咪啦,不如我食咗先」



    点知箇班做紧嘢嘅小仙就毋通气,成日喺处执头执尾,摆台摆凳,硬系冇一个行开,孙悟空急到挠头挠髻,毋知点好,卒知俾佢谂到条计,一掹就掹出条毫毛出嚟,放入嘴度嚼咗几下,就pu一声喷出嚟。


    「变」


    即刻变做几十只眼瞓虫,不知不觉,喺每一个小仙身上,轻轻针咗一下,成班仙官、道引,力士同埋烧火童子个个打个喊路,捽捽下双眼就瞓着咗。


有啲就踎系酒缸旁边,有啲伏喺个灶头,有啲辘地沙,有啲扒喺台上,瞓到稔晒,呢次毋使你请喇,我自己招呼自己啦。


箇个美猴王,逐围台睇过,先拣最靓嘅嚟食,逐埕酒闻下,专揾箇啲最香醇嘅嚟饮,食到饱,饮到醉晒,企都企毋稳,行都行毋逳,就想瞓返一觉,㪗下。


    一谂:弊喇,一阵间王母娘娘请返嚟嘅客人到晒之后,见到啲好嘢都畀我食晒,噉边度肯放过我,畀玉皇大帝知到,袭怪落嚟噉咪死,咪喇咪喇,我都系走返去齐天府里便,避一避瞓番觉先至得。


    箇个齐天大圣,一摇三摆走出瑶池,去东门一个筋斗就走返齐天府,点知到抹眼一睇,呢度毋系齐天府?原来系三十三天之上,兜率天宫,箇个马骝王饮酒饮到醉晒,打筋斗都打歪咗,行错路吖嘛,一路就去咗三十三天太上老君箇度,呢度咁热个㖞,睇样返翻齐天府都有排,算喇算喇,横扂都撞到嚟呢度喇,顺便揾个太上老君倾下偈噉都好吖。


    于是佢就带住几分酒意横冲直撞,喺宫里便揾太上老君,咁大个宫殿冇见到个人嘅,呢一座兜率天宫,系三十三天之上最高嘅地方,神仙都难到,所以十分幽静, 又碰啱今日太上老君同燃灯古佛喺三层高阁朱陵丹台上讲道, 所有嘅仙童、仙将、仙官、仙吏去晒听讲,所以冇晒人,箇个大圣盲摸摸,一直摸到入太上老君炼丹房箇度,只见丹房中间,放住一个好大好大嘅炼丹炉,炉中仲烧紧火,两边嘅墙壁上,挂住五个葫芦,孙悟空知到,太上老君道行高深,德高望重嘅老神仙嚟,葫芦里边梗系有好嘢㗎啦,攞起嚟就𢳆咗几下,沙沙声响嘅,孙悟空就拧开个盖,倒啲出嚟睇下,一粒粒金光闪闪,发灵嘅药丸,原来呢啲系太上老君用文武火喺八卦炉里便,经过千年嘅修炼,先炼成嘅金丹,孙悟空一睇到呢啲金丹,就欢喜到懵晒喇,真系算我老孙好彩数啰,啱先偷完食仙桃,饮完御酒,又俾我揾到呢啲太上老君炼嘅金丹,呢啲正系仙家之致宝嚟㗎。好难揾㗎哇,趁住个老家伙毋喺度,等我老孙嚟揾几粒试下先,一倒就倒咗几粒出嚟食,一落到肚,阵阵清凉,觉得成身舒服晒,于是佢成个葫芦倒晒出嚟,一扎一扎嚟食,好似食炒豆噉逼嚗嚗,一阵间啫,成葫芦金丹就俾佢食清光,横扂都食开,干脆,冚嘭唥同佢食清光佢,于是五葫芦嘅金丹,就俾佢食晒,难为箇个太上老君,用千年嘅工夫修炼出嚟呢五个葫芦金丹,一心想嚟献畀玉皇大帝做丹元大会,点知一个毋该就俾呢个马骝王食清光,孙悟空食晒呢五个葫芦嘅金丹,即刻酒都醒晒㖞,噉系㗎,细细粒一粒金丹,食咗就长生不老,百病不生,心静神宁,噉你孙悟空一扎一扎噉嚟食,有乜办法毋酒醒至得㗎,孙悟空醒咗之后,一谂:弊喇,饮醉酒箇阵毋知惊,一醒咗就识死喇,弊喇弊喇,呢会闯下弥天大祸喇,不得了喇,不得了阿,偷食仙桃已经系重罪,大闹蟠桃大会,噉咪实死,噉而家连金丹都俾我偷食晒,呢回性命难保,弊喇弊喇,走,走,走,三十六着走为上着。喺天宫当受气神仙,我不如返花果山做甩绳马骝王好过啦,于是佢就走出兜率宫,佢毋敢行旧路,就运西天门箇边使个隐身法,一个筋斗就就返到花果山。


    花果山箇班马骝一见到佢返嚟又试围住佢嗌喇,大圣大圣,你真系忍心阿你,上次去咗十几年,今次仲耐啲,百几年先返嚟嘅,百几年阿,噉又系噃,天上一日,凡间一年,不知不觉,老孙就喺天上过咗百几日啰噃,大王,你呢处喺天上又封咗咩嘢官返嚟,齐天大圣就从头至尾,将佢拜受齐天大圣嘅官衔,看管蟠桃园,偷食仙桃,大闹蟠桃胜会,同埋偷食太上老君嘅金丹,一一二二讲畀大众知,大家就十分欢喜,将椰子美酒斟满一勺碗,就敬大圣,呢个齐天大圣饮咗半啖,就咿牙扮齿,咁难饮嘅,崩巴二将就讲:大圣,你喺天宫食仙桃,饮仙酒,食惯咗好嘢,所以椰子酒就毋入得口,常言道:美不美,香中水,系

噉我地系亲个亲故乡人吖嘛,我今朝,喺瑶池箇度饮宴,见到长廊之下仲有好多仙酒,都系玉液琼浆,你地都未试过,等我返去,再去偷几埕嚟,等大家每人饮一啖,个个长生不老,好一个美猴王,富贵不忘患难之交,有福同享,有仙酒共醉,难得。


孙大圣走咗出洞门口,一个筋斗一个隐身法,就到咗蟠桃会上,入到去瑶池宫,只见箇几个造酒、盘糟、运水、烧火嘅仲喺处瞓觉,佢就揾咗几埕成个人咁高嘅大酒,每边夹一个,一手拧一个,一共攞咗四大埕酒返嚟,就喺花果山上,嚟一个仙酒会,再讲箇七个仙女,自从受咗大圣嘅定身法术之后,足足一日,先至醒咗解脱身出嚟,姖就返嚟报畀王母娘娘听,话大圣用定身法困住姖地。


    王母就问姖地摘咗几多桃,箇啲仙女就禀报,得两篮细桃,三篮中桃,我地去到后边,箇啲大桃半只都冇,我地谂系箇个齐天大圣偷食咗,正喺度揾呮,箇齐天大圣走咗嚟,喊打喊杀,又问到设宴请边个,我地讲畀佢听,佢就定住我地,如今不知去向,搞到我地现在先至醒咗先返得嚟呢度。


    王母听咗之后,姖即刻报畀玉皇大帝知,都未讲完呮,就见到造酒箇班人,同埋仙官嚟禀奏。


    万岁,毋知咩嘢人捣乱咗蟠桃大会,偷食晒啲玉液琼浆,同埋百珍百味。


    跟住有四个大天师嚟奏上,太上道祖到,玉帝就即刻同王母出迎,太上老君朝礼完毕,之后就讲,老道喺宫中毋见咗啲九转金丹,要侍候陛下做丹元大会,点知,俾贼偷咗去,特此嚟讲畀陛下知,玉帝听完之后,又嬲又激气,一阵间呮,又有齐天府嘅仙官嚟叩头禀报,孙大圣不守执事,自从昨日出游,至今未归,不知去向。


    玉皇大帝就更加心烦意乱,只见箇赤脚大仙又上朝禀奏,臣蒙王母召,昨日会,偶遇齐天大圣,对臣言话万岁有旨,叫臣先到通明典演礼,再去赴会,臣依佢言语,即刻到通明殿外,不见万岁驾临,所以急急来此拜见,玉皇大帝听到呢度就确系有啲心惊。


    呢个家伙假传旨意,欺骗群臣,快啲叫纠察灵官去辑访佢踪迹。


西游记粤语(林兆明讲古版)第六回的评论 (共 条)

分享到微博请遵守国家法律