失明人杜焕忆往(一)

好啦，座上各位，今日星期四，咁又处向各位贵客拿一小时左近个时间嘈吵下各位先，咁嘛嘈吵各位发财耳呢，歌词，样样个故事都听得多啦，今日我所唱嘞，就毋系古播，又毋系今，你估唱物嘢嘞？我相信各位都未明听惯箇理由的个，系唱我本人我咁，我本人箇之鸡生法，点样物咁一齐唱出来。唱得毋好嘞，望座上贵客各位多多包涵。呢啲系特别个，因为唱嘢之中，未试过人地唱野唱返自己本人个故事个，咁我试下。咁嘛鄙人系杜焕啦，系电台都系出杜焕个名，咁嘛我啊出呢个名称呢，就系失明人杜焕忆往，好啦，咁嘛系咁献下丑，唱下先。 好啦今日歌词唱，不是古，又毋是今。 唱出事情一切，就系，系我本人。 我想，我本人，乃系三不幸： 一不幸者，我自小家贫，系贫贱出身。 二者，生来时乖兼命蹇， 在于幼年惨遇，做咗个失明人。 因为以往，箇之医术，未有今时咁掯， 所以往常，亦很多，失明人。 因为，第三者，究竟如何不幸， 近来世上，个个毋钟意南音。 因为近今 ，此种个歌词，真系无人，少人帮衬， 时势毋同，我地之旧人。 故此真正，三不幸，好啦唱完，又讲幼时箇阵， 因为，我三个月，三个月时期，就要挂新灯。 每个新丁，皆要，做此礼行。 正月十五时 ，系人人一样咖， 我想嘞，系周围，都系，系挂新灯。 咁不过，各处，系村乡，各用品， 因为敝乡，都系习惯，系有一样行。 每个新丁，都要用油糖兼共粉喔， 煮其，叫做茶蛋，往去众分。 谁知，我生来，大体该定毋好命运， 箇之为我，做功夫，冲犯了神。 致令，一夜，双，双目又闭合， 因为娘亲，开过，我之便知因。 是回，所谓是月，十七去把医生揾， 虽然揾到有一个医生， 咁就得佢，医得我，双目都渐将，系明朗箇阵啊， 我地爹娘，见此，亦都暂放人神。 唉，谁料，大体天注，注我今生，系苦命挂， 大体该定，我们系个破伤身。 箇日，娘亲欢喜，抱住我去将医生揾， 睇啦，谁料去到，去到佢医馆，睇啦，箇个医生，系松咗人。 （流水） 实系，不知何故，医生佢逃了， 定然，该定，我一生， 因为家贫，只有，陈色药品， 把丸散，各般，揾揾揾。 由此，双目，系残废矣， 无非，所净，仲有光明两三分， 娘亲，思想，佢会谂， 佢为着，为着我一生，去作人。 至有，慌我，我二分，个光明，系毋揾阵， 佢去，买之珍珠末，畀过我吞。 将我，光明，来令到稳阵， 免使，年老，完全，系看毋能。 如今，系光黑嘞，曾看到， 都完全，感谢，我地亲娘，佢厚恩， 感谢，我在幼年，佢会谂， 使我目前 (坠慢)目前光明略有，都系系佢当日谂心几寻。 哈，目前嘞，有三几分光明暗啦，好彩我阿妈嘞，稳阵过底，所以，好方便过甩，眼睛上箇之木嘞，越老越大，大个就咁大啦，所以嘞，虽属家道贫穷，佢亦都不舍□□，吞口水养命，佢都买之珍珠粉，来到畀我食，至有定实我二分光明之线，呢之系感谢亲娘厚恩，使我至一生啊，行路方便。如果毋系，我到二三十岁箇阵时就无埋呢之光线啦，咁就更惨。如今看得天坑，都系箇之三不幸之中还有幸。呢之父母爱子之心之至啦，谁料家贫难过，兄弟姊妹又多，民国一到，民国三年，初次水崩围，我地之田地，略有些少崩溃去了，点想连起两年，闭咯，所谓被佢闹完我咁，中国嘞最大就系西水啦，当堂讲田园尽冲破，整所屋宇楼房一切冲为平地，变咗，先业一切化为乌有，箇阵净落，我地父母养着姊妹五人，真系，惨过白上加巾都毋止。行得至到，七岁时已过，先父去世，不幸咯，好在先父在生之前曾识一个失明之人，叫王分(音)，在金利墟处有些名誉。各位，我想打发子女啊，出身搵食啊，真系认真要三思又三思，我曾我畀呢一个，我地头一个师父嘞，叫做王分，佢嘞，所谓医卜星相，无乜畀人睇，但得佢行运，就旺啦，旺嘞，外人就咁系以为佢好，好嘢啦，咁啦，人人送送失明人，一定送去畀佢教导。点想嘞，就错咗咯。啊，为着此人有名，咁就将他投去，竟然畀佢误却三年将止。 真正系为子弟，出门，要三思， 千祈，咪毋听，贪一时。 因为，我本人，曾经此， 爹娘，佢不明白，我又投错师， 谁料，卜算，卜算箇层，王分，总系毋晓， 佢不过运鸿日值，系咁指地指天， 我地双亲，见佢，有咁好生意， 至有将吾，送去，送去投学，无辜就误我三年。 箇阵，系居乡，所谓人事都不多晓， 咁就任佢，之事，各种就，毋知。 想佢实学，实学个全无，渐渐就无生意， 不过几载在墟场，欠了街坊好多钱。 佢立即，又要逃亡，他方去， 咁就师娘无奈，走去广州先。 佢就带埋，我去，贪我有少少见， 出入方便， 咁就一齐同走，走出到城池。 初到，一到河南，去到聚龙城箇便， 咁就曾到长庚里住居。 因为在此，一齐同埋，咁就过不少日子， 啊，因为当时，各样，我都未，未知时。 咁到，音乐，音乐箇层，咁就全不晓， 日日，揸两块毛竹，系人个门边。 无非，唱来，句词，有十一语， 求他，方便，两文钱。 好彩，箇阵，百物，都犹贱， 柴米，又平，共油盐。 日中，生活，就易极了， 无非，两百钱，足够两三天。 咁，在此流年日日，日过了。 转瞬光阴，又两年。 刚刚，交到，我年，年十岁， 我就清闲无事，往外边。 晚间，走去，把之行中人交便， 咁就夜里，走上，箇度环(横)珠桥。 河南，环珠桥，这上边， 晚晚，箇之行家，有人叫唱嘢，坐在两边。 因为，当时，我就年纪小， 所以受人差遣， 晚晚嘞，咁就听人使唤，在此桥。 做人嘞，就毋怕事底个喔，总要，做细路啊，听人使，咁嘞，一定系有着数个，我，初出广州时，同埋呢个冇学识个师父王分，大众河南系处捞，各有各去，佢就佢去，我有我去，佢去占打算命，我就去赚钱过日，呀， 咁呀不过年下有多哩， 我就夜晚哩走上横珠桥。 因为河南环珠桥哩， 好多旧时 个人就知道嘞， 箇之盲人呀晚晚系处等人叫唱嘢。箇度桥哩，就系河南潘老三建造，所以盲人哩， 晚晚系处坐， 有人叫盲公去唱嘢哩， 就梗去箇度桥处叫， 咁个。 咁我哩， 食完饭嘞， 日日去凭馆哩， 赚得百零二百钱， 咁就够食有馀， 好丰裕添，系咯，因为虽然我毋识弦索啫，我系细路啊，咁嘛好似人地唱山歌咁嘞，你地家下睇到唱山歌箇之啊，箇之客(家)人啦，系啦，我地就类似系咁，不过就系山歌，我就系木鱼书，系啦，一日就畀两个钱啦，個之畀过先，咁嘛日中有呢二百钱好生活个咯，得闲无事嘞，就天热起啦，上环珠桥斢凉 ，识得一个行家啦，好啦，系河南个行家嘞，个个都识得自己啦，因为我听人使啊嘛，所以细路啊，就毋怕事底啦，总要听人使，因为系环珠桥坐处有十多廿个盲公系度吖嘛，有老有嫩吖嘛，系嘛，若为去小便喎，行到好远喎，好人逼个噃。嗰阵时箇之街道呀，好窄嘅个啫。系哩，咁我又拖佢去哩，我恃住自己睇到吓吖嘛，咁呀拖佢嘞，有时又买熟烟喎，买两个仙烟，又陪佢去嘞，咁不论边一个，系系环珠桥，系桥处坐系处听生意个人哩，一样呀，听佢地使，咁所以得佢啦环珠桥众行家，人人将己来到称赞，赞听人使，所以得咁个优点，咁嘛得到物嘢好处呢？哈，各位啊，都相留意吧， 自古幼儿人最要，最要广量留心， 首先，毋好念精学玩，咁就祸失众人。 若系听人，差遣，咁就来做成品， 至有众口，一词，把你好丑来分。 呢，(若)我系当日，学人，立坏品， 又到断无人，肯教我，系有今日做人。 (流水)你估，如何，认识，得，恩师亲近， 究竟如何，得佢，动起慈心， 因为，我在河南，所谓无亲无近， 系无□□啊， 我地师尊，個之父母，最忌箇之江湖人。