辜苏历程（鲁滨逊漂流记）1902年版，第四章，粤语版

原著：英国，丹尼尔·笛福

翻译：英国传教士，英为霖

抄录：常ならむ

第四章

    我上岸时，身上有二百几两银，船主毋(m4)使我畀水脚，我有啲嘢毋多合用，故此毋搬去，船主定要畀返(faan1)银过我，我见佢咁仁爱待我，我永远纪念佢大恩咯，船主有个朋友，喺箇(go3)处(syu3)做耕园嘅，系种蔗制糖嘅事业，佢举荐我喺箇人处学造，我见箇样事业好容易赚钱，故此极想造咯，我买一笪地嚟造园，我本钱毋够，可惜冇苏理帮手，我仲有啲银，先日寄落箇英国船主嘅妻处，如今西洋船主第二水去欧洲为我打理呢件事，佢船返嚟时，带来耕园所使嘅器具，样样齐备，兼之有英国嘅货物，系呢处人所中意嘅，好多带来，故此好容易卖晒，赚得好多银咯，我喺箇处住哓(hiu1)四年，生意甚好，积埋好多钱，自从出门以来，算呢账至耐，箇国嘅说话，已经晓讲，常时好多朋友嚟坐，故此人毋当我系下等嘅人，冇学问嘅，箇处嘅朋友，好欢喜听我讲经历嘅事，我话讲买卖要喺阿洲西便之基尼国，黑人处系至好，因为箇处人毋会做生意，时常𢬿(kaai1)印花布，玻璃球，洋镜，铰剪刀仔各样物件，装去佢处，黑人一见，十分欢喜，𢬿黄金珍珠，或象牙嚟换，故此得利钱毋止几倍，但总毋似得买卖人口嘅利息更多，旧日有人买到，到别国地广人少之处，种蔗园，种烟叶，开矿淘金嘅事，黑人个个会做，因为箇处人多，而且俱系愚蠢，毋多值钱，若能买到来卖过别人，得好多利息，众人听闻我讲，十分欢喜，到第二朝，有三个朋友嚟坐，问我话，昨晚听闻你嘅说话，我地想哓一夜，噉嘅买卖，实在难得，毋好失哓噉嘅机会，我地已经立定主意，买一只大船到箇处买人返嚟，但系呢件事要静静做，若系俾人知到，必定撞板，如今我地各人出本钱同埋买一只船，，你有分，但系毋使出钱，独系出力呮，赚到就大众同分，因为你已经做过几账，熟悉箇处土话，生意必定兴旺，若系你算呢啲事毋好做，就我地独做一账，得到利息，就罢手毋做，因为我地亦知呢啲系犯法，故此毋敢多做，慌怕危险，我听闻呢啲说话，心极欢喜，买卖嘅事，冇有好过呢啲咯，因毋使出本钱，亦得到有股份，咁便宜嘅事，好难得嘅，但我喺呢处，钱财田地亦毋少，自己嘅事不能做晒，点样又舍哓呢啲，谋度别样，但系我嘅性情，最喜欢出外得闻呢啲说话，即刻应承，就将家私样样写落，所有钱财田地，尽交过朋友管埋，噉就定个日期开行，三个朋友定哓九月初一日，我听闻，个心见好出奇，因为八年之前，离别父母，上船箇时，亦系九月初一日，记忆箇阵时，好似在眼前噉，时候好容易过咯，独系毋知父母生死点样呮，不觉流起眼泪嚟，至到船开身，我上船，见箇只船好大，可能装货二万担左右，水手十四名，船主共我与及箇啲跟随嘅人十七人，所有货物，俱系玻璃，古玩，刀仔，洋镜，细花布，与及玩耍嘅物件，即时开身，初时向北便，近巴西海边嚟行，后来向东便嚟行，过哓十二日，天色甚好，独系好热呮，忽然间转西南风，后西北风，后有东北风，箇啲风渐渐猛，浪渐渐大，成为风䊆(gau6)，毋见日，毋见星，几日咁耐，漂流无定，船中嘅人，个个无哓胆，以为毋得生咯，有一个后生仔，共一个水手，被风吹落海，有一个病死哓，因心里头慌到了不得，毋知点算好，到第十二日起首见天略好啲，有热头出，船主𢬿个罗经测度，话呢账行哓，虽然有好多日，受咁多艰难，但系仍然在巴西国北便，如今船已经漏水，依我意见，要即时返去巴西国，我就查察地理图，知到离呢处毋系十分远，有英国管理嘅海岛，望到得箇处，可以修好只船，众人见我讲得着，就转舵向东便行过几日，又遇着大风，向西便吹嚟，船行极险，毋知方向，正在危急个时，忽然有一人话，前便好似有一个山，话远冇耐，听闻一大声，撞埋一个山石处，船即时破烂，箇啲水嗱嗱声流入船，大众好慌，因毋识呢处系乜嘢地方，或系大洲，或系海岛，或有人或冇人，即使有人，又毋知系大国嘅人，抑或系野人之类，正在思想箇阵，箇只船被风吹在石上，箇啲水乱冲，两只三板已经沉哓一只，众人慌到了不得，剩下一只，就即时落去，风仍然毋息，勉强开行，大众话呢处若系海岛，冇人住，就我地一定毋得生咯，讲紧箇阵时，被横浪一冲，船细人多，就跌落海，箇时想讲一句说话都毋得，好彩我会游水，有一账被水冲上岸，急得想上岸，又被浪打翻入水，噉有几次，箇身冇晒力，差不多死，后来被浪打埋一䊆石上，快啲𢬿两只手抱住毋肯放，出力爬上去，因箇石被水冲得好滑，好辛苦，致爬得上，就到一笪草地，得到㪗（tau2）下，回头睇下只大船，相隔约有五里咁远，同行嘅人，个个被大鱼食哓咯，睇见水面独有三顶帽，两对鞋呮，所剩独系我，好似由死翻生一样，心里头十分欢喜，即时跪下，多谢上天嘅神，后来欢喜到极，几乎似发癫噉。