与王家卫有缘千里能相会 张国荣为补水传闻激动不已(旧闻)
Ming Pao Weekly（1998.08.12）
资料转自张国荣艺术研究会
林：(望住走近来的张国荣，用愉快的声音说)呢！辣士里，面口好好睇喎，近来一定精神愉快啦。
张：冰姐，你面口都好睇啫，乜股票无损手咩？
林：蚀咗就唔谂佢啰。吃几多着几多，整定，以后都系唔好搞咁多野，又呢又路，到头来，结局－样。
张：我都系咁话，所以，我股票都唔买，你知我点解唔买股票嘛？就系受石天影响。记得多年前有一天，股灾，石天拍紧戏，打个电话问完价，呆咗成一个几钟头，唔埋得位拍。见过石天果次的情形，今生都唔敢买股票。你话得啱啦，吃几多，着几多，整定。
林：嘉云台有层楼最近卖咗呀？香港D物业卖晒，唔睇好前景呀？
张：嘉云台层楼系卖咗，系唔睇好物业前景，重有物业未卖，我阿妈住紧果层都系我嘅，未卖晒。
林：听讲你最近心情好靓？
张：系呀，系番禺拍《九星报喜》好开心，呢个戏，会得嘅，因为拍时我有感觉，有感觉，就会收得，我唔系时时有感觉o架。
拍西片收到足
林：难得你肯赞，你哥哥周时唔俾面人，未拍先闹都时常有o架啦。
张：要多谢百鸣，呢个时候开戏，为不少演员同工作人员提供就业机会。咁淡个市，好难得o架。
林：系唔系都要多谢你哥哥添呀，无你肯减价，百鸣计唔掂条数开唔成，大家都有机会就业啦。(坐在旁边的张国荣的亲戚黄小清插嘴：冰姐讲呢句最啱哥哥听嘞。)
张：(笑)冰姐呀，《九星报喜》好快就杀青，一月份，我上上海拍一部西片，今次无折头呀，收到足，人地一毫子价都无减。嗳，杨嘉珍你识佢，系佢搵我嘅，一阵佢会来。本来我要去柏林影展做评判，依加唔去啦。
林：做乜唔去喎，柏林影展评判噃，都几抵去，可以同导演告假，佢叫乜名呀？
张：佢叫叶缨，大陆人，佢拍的电影系大陆好卖座，今次拍的系西片，百分之八十讲英文，二十讲中文，我演一个三十年代的中国共产党员，系知识分子来o架。柏林影展要去成十三日…下次先啦。
评审普遍心理
林：下次, 你估次次都搵你来评咩？下次另一班人甄选，未必睇上你。
张：我，好多戏拍啫，明年搵我拍戏的有许鞍华、严浩，嘿，唔知系唔系D人知我想搵退休金，所以猛搵我呢？
林：退休金你就唔使搵啦，我净系想间你，你卖咗龟背湾间屋，又卖咗嘉云台层楼，加上一百场演唱会的收入，咁多现金，如何处置？
张：唔理呢D架啦，冰姐，咁唔得闲，边度理得呢D现金呀？
林：系唔系有个『银行家』代你处理现金咁呀？
张：吃咩野呀，叫野吃吖。
林：我吃烟三文鱼。
张：哈，你谂嘅同我一样，我都谂住吃烟三文鱼，你叫个汤吖，洋葱汤好唔好呀？
林：好，我想问你，台湾电影金马奖，你估你系唔系得梗影帝呢？
张：得梗！？梗系唔系啦。
林：系呀嗬，人人睇好梁朝伟，竟然连提名都无，可见评审团同普通观众始终唔系一伙，咁，你又觉得何人会系你对手呢？
张：以我咁多年经验，我地D热门嘅最怕两种人，一系老野，一系新丁。始终有D人情分嘅，老野就谂住，佢都做咗几十年，今次唔俾，无机会啦；新丁则认为佢咁新，做得咁好，不如俾佢。我好记得UFO一次，我同梁朝伟都有提名，大家都系 UFO 嘅戏，阮世生唔经意话：俾(选票)伟仔啦，辣士里唔志在嘅，话我唔志在喎，提得我名，我梗志在o架。连阮世生都咁话，可见普遍心理认为：佢攞咁多奖，佢唔志在嘅。今次金马奖，苗天机会都几高，苗天，系得o架。
不喜欢做棋子
林：辣士里呀，我记得《春光乍泄》公映时，你迟迟唔去睇，你好似有D怕面对呢部片。因为你同王家卫拍的时候唔开心，你担心佢将你的戏剪到好似一个大配角，搞到自己唔开心，所以，侧侧膊，迟迟唔去睇片，差不多落画，兼且听大多人讲你表现好，你至去戏院睇。
张：系呀，小清陪我去睇嘅。果日我迟到，同伟仔床上果场始终未睇过，我唔担心佢剪我戏！我表现咁好，佢舍得剪咩。康城系我自己唔去之嘛，我同王家卫唔开心，主要系因为我唔钟意佢的方法，演员喺佢手上始终只系棋子，你做乜，你唔知，边场系开始，边场系结局，你亦唔知，任佢摆布，我喜欢有剧本，知道自己做乜。
林：但，你喺佢(王家卫)手上，最见光芒噃，你有今日，到依加仍有咁多好导演想用你，都同王家卫拍咗一连串你有份的电影有关啦。
张：咁又唔净止一个王家卫拍得我好，陈凯歌都拍得我好。
林：要有好多好电影，才足够证明你系一个好演员。如果净系得一部《霸王别姬》，人地话撞彩啫。
张：咁又系。王家卫有咁多好演员… 你唔好唔记得，佢唔系一个人的功劳，但有张叔平的剪接，有杜可风的摄影。
激动倒泻咖啡
林：咁，你都系王家卫手上特别有光芒啫。我最钟意的电影叫《阿飞正传》，你呢？你觉得自己表现最好系边部？
张：(谂咗成两分钟)我觉得我系《胭脂扣》表现最好。
林：唔系嘛，哥哥，因为唔钟意王家卫，唔情愿赞《阿飞》呀？我问你咯，以后王家卫搵你拍戏，你会同佢合作嘛？
张：有缘千里能相会。
林：听讲，系阿根廷的时候，戏未拍完，你赶住返香港搞演唱会，佢地留你，你话无时间，最后，你提出补水五十万，至俾多咗期佢地…佢地当时谂：你张国荣唔系无期吖，不过想补水……。
张：无件咁嘅事(但面有不悦之色，咖啡竟倒在餐巾上，很有仪态的张国荣，这是罕见的。)你边度听来？好易啫，可以叫佢将账目摊开来睇o架，我有攞呢笔钱，实有账目。你信佢地唔会俾我现金的啦。(辣士里一边抹去桌上的咖啡，一边向我解释。因为他的激动，令我以为佢系掩饰果五十万的事，不过，后来查问过，张国荣并无多收王家卫五十万补水。)
拒义子进娱圈
张：你知我当初点解肯拍《春光乍泄》嘛，你知王家卫系点同我讲的嘛？佢话想拍－部同性恋的电影，太多的同性恋电影歪曲咗同性恋，佢想拍一部，用正面的角度去探讨。我话你咁钟意金城武，点解唔用金城武？佢解释话，想拍一部香港人的同性恋电影，我至应承佢。不过，后来佢都无做到，佢用咗张震，总之，我唔理佢咁多方法拍，我系乜野讲到明，佢系明明想咁，讲成另一样，等你以为系咁。
林：辣士里呀，你做乜煞有介事咁收个契仔呀？你怕百年归老无人担幡买水，故收个义子来供书教学呀？
张：我细个时无嘅野，大个咗好想俾到人，就系亲情。阿正呢个仔好乖，读书又叻，佢好听我话，我无收错佢。我真系供书教学o架，佢一年返香港三次，几幸福呀，我系英国读书时，几难得至返来一次。
林：阿正依加成六呎高，又靓仔有型，会唔会入娱乐圈呢？
张：张国荣义子咁名义咯喎？唔俾，唔俾入娱乐圈。
林：人地亲生仔，爹地妈咪都未敢话唔俾？你不过是义父，咁霸道？
张：读得书，点解唔读书呀？读得书，唔使入娱乐圈。
林：从而可知，纵使是天王巨星，亦有一篇娱乐圈血汗史。
往柏林做评判
(褟嘉珍到，拿来一个英文的电影剧本。本来不打算去柏林影展做评判的张国荣，不知是否是受我林某一番话影响，竟同褟嘉珍讨论起档期来。最后，期好似度掂，张决定去柏林，并对小清说会去英国探望义子，并同埋佢一齐去睇歌剧。)
张：(对禢嘉珍)你做监制指那部由叶缨执导的暂名《红色恋人》的电影)，我至接的咋。
(禢说：吓？咁要同尔冬升讲吓啦。因为尔也在筹备开戏，亦褟嘉珍监制。)
林：尔冬升将会拍咩野戏呀？
(褟说是关于日本帮会的，现正在做资料搜集。)
张：(很愉快同自信的掹吓手)男主角又系我添。
林：哥哥，你搬去加多利山，D传媒又如影随形咁追踪你到加多利山。你的感觉系点呀？会唔会觉得好讨厌呀？
张：无所谓，如果唔系黎某英，佢地搵地产入屋影咗我屋企，我未必咁快卖咗间屋。间屋卖咗赚咁多，我都要多谢黎某英啦。（不给过审，所以名字不全打，🍎日报就他搞的，非常针对哥哥，经常乱写哥哥私事。他带坏了传媒风气，为人缺德）
演戏无关身材
林：再问你一个问题，你成日话唔去荷李活拍片，又话佢地去到荷李活，拍亲都重复旧时，应该拍D荷李活无嘅，有中国特色的，你估同你人仔细细，唔够大件头，拍埋去D鬼处，唔够件头，唔够好睇有无关连呢？
张：唔够件头？林冰，演戏喎，你估段秤呀？你知唔知汤告鲁斯有几矮呀？你知罗拔烈福拍《俏郎君》同巴巴拉史翠珊平行，要挖条坑俾巴巴拉史翠珊行嘛？德斯汀荷夫曼、阿尔柏仙奴又有几矮嘛。林冰，演戏唔系讲件头嘅，系讲呢度(用手将自己个头，上、下、左、右圈咗一个圈来示意，带着激动的，冰姐，霎时间也变了林冰，林冰。)
林：(我钟意张国荣，因为佢有呢份激动，但时常口讲心果句。时常暴露内心世界，都是我喜欢的。)
