辜苏历程（鲁滨逊漂流记）1902年版，第二章，粤语版

原著：英国，丹尼尔·笛福

翻译：英国传教士，英为霖

抄录：常ならむ

第二章

    我得到毋使沉死，系多谢神恩。今应当返去归，怕父母听闻沉船嘅事，毋知我生死，必定好赑屃（bai3ngai3)咯(lok3)，但系我心好硬，毋多想返去归，仍然上伦敦城，箇(go3)处(syu3)遇着一个船主，佢只船往来阿州西便基尼国，贸易大发财，所以佢想早日再去，佢好欢喜我，请我同埋去，佢话办啲货物，定可赚钱，我即时应承佢，趁呢个机会，就办齐各货，值银三百两，呢啲银系亲戚帮助我嘅，可惜我未会学过驶船嘅工夫，如今船主教我识算学，与及行船嘅法子，会做水手共埋客商，真好彩咯，到基尼将货共土人交易，赚得二千两银，计过咁多账，独系呢账发财呮(zek1)，呢阵算我系基尼嘅大商啰𡃓(lo3bo3)，我地得到返回伦敦，冇耐箇船主过世，但我立定主意去基尼搭返箇只船，谁知呢水大不幸，遇着贼劫，我地共佢打，到岸，拉入内地，箇贼头见我系后生合使，独系留住我嚟服事佢，我悔恨到极，知父亲嘅说话，如今应验呀，我呢阵独系望有一缐知生路呮，想佢带我喺船处，或者遇着有西洋兵船嚟打赢佢，我独系望噉样，得放回归就好喇，但系毋得遂我心，因为佢出海毋带我去，使我喺佢屋企打埋花园，同埋箇啲奴仆做下贱嘅功夫，约莫经历两年，有个境遇令我生出有啲多想望，箇贼头久不久使佢箇只大艇，叫我攞鱼，有一日，佢请三个上等嘅人，同埋去游耍，先一晚吩咐我带便多啲食物，与及整便火柴枪码，𢬿嚟攞鱼共打雀用嘅，我照依佢嘅命预备箇人客落船，第朝箇贼头到大艇𡂪，话箇人客适值有事，毋得闲去咯，我今晚请佢食餐，你快啲去攞啲鱼返嚟喇，箇阵突然间有至好嘅机会，我见船又有咁多嘢喺𡂪，今可以逃走，脱甩呢啲艰难咯，噉就我设条法子，免致人思疑，有两家嘅嘢，你返去带一箱饼干，三埕淡水喇，我带啲蜡有半担，与及斧头，把锯，铁锤，亦有啲线，呢几件迟日好合用𡃉，但系蜡箇一样，重要紧咯，我心里慌到火药码子将来毋够使，我对箇大嘅话，东家有枪喺处，我地毋好使东家嘅火药，你返去带啲火药码子嚟，等我地打雀，同埋有得食好呀，噉就攞齐嘢就开身，到澳口经过一个寨，箇寨嘅人识得我，所以由得我地出去，出到约莫三里路，落𢃇（帆）抛锚，嚟攞鱼，箇阵系东北风，毋合我心，若系南风，可以直去西班牙，但我一定要离开佢处，毋论乜嘢风，任从吹去箇处，就去箇处，噉就鱼攞毋到，对箇大嘅话：“呢处毋得，要去远啲”。佢依照我话就扯𢃇，我去揸舵行一堂汛，我叫箇细嘅暂时揸舵，我诈作去船头揾嘢，就行埋箇大嘅后，便出其不意，掽（bing3）佢落海，谁知箇人好会游水，至好游上岸喇，佢听闻我噉话，就游上岸去哓咯，我对箇细嘅话：“若系你真心跟从我，我是必有好处畀过你，要你誓过愿，若毋系，我亦𢫕（wing3）你落海，佢即时誓愿，满口应承，我信佢系老实，就冇啲思疑佢，佢名叫苏理，自后真系一路服事我咯，箇大嘅跌落水时，我船向北驶去，到夜晚黑，我转过南便去，免致后来人知到嚟追我，我慌到极，五日五夜冇停船，后来逆风，我心内话：“我逆风，佢亦逆风，我停佢亦要呀，噉就驶埋岸，我虽然毋想见人，但系至紧要攞啲淡水，离冇远有个澳，想夜晚然后上岸，到晚黑时，见有好多野兽，走来走去，有啲揾嘢食，有啲跑到海边饮水，又听闻佢叫喊嘅声，令我嚇崩胆，箇啲声成晚都有，故此我毋敢上岸，想下日头亦系难，怕有野人，若系俾野人捉到，亦系好似俾猛狮老虎所害一样呮，但系冇淡水，无奈何都要上岸，到第朝我地上岸，我去冇远，因要看住只艇，苏理拈个水埕去远啲揾水，歇冇耐，见佢走返嚟，我估有野人来追佢，故此我走前去帮助佢，到佢处，见佢膊头孭住一只嘢，好似山兔噉，佢嘅肉似几好食，苏理极欢喜，毋见有野人，亦揾到水，喺处住哓几日，后来开身咯。