何麗全承認勁歌金曲收視不理想，星夢與聲夢區分TVB創立新廠牌

星夢歌手谷婭溦親自作曲填詞歌曲《倔強》，成功打入多個流行榜冠軍歌曲位置，而首張個人專輯《哭牆》於實體及數碼平台銷售數字更達到金唱片成績（1.5萬張），為此她所屬公司今午（5日）特地為她舉行祝捷會，星夢娛樂行政總裁何麗全、香港唱片商會主席林錫堅，及歌手吳若希（Jinny）等齊齊現身支持。活動上谷婭溦特意送上嬰兒衫予Jinny的小朋友，答謝Jinny一直對她的支持及教導。

谷婭溦表示對專輯獲得佳績感到高興，亦難忘曾經歷失意的日子，她說：「曾經畀外間批評我廣東話唔得，話我廣東話都唔正唱咩歌，因為咁幾乎畀公司幾雪藏，之後停咗兩年，依家算係翻生啦。（何生係咪應承咗開騷？）係，不過仲部署緊，因為嚟緊要應付比賽（《聲生不息》）先。」她感激所有的高低起伏經歷，坦言是她的創作靈感來源，是她的「財富」，成就了今日的她。Jinny除戥對方高興外亦大讚唱功一流，她説：「佢係我心目中星夢唱將NO.1，一直都有留意佢，咁唱得嘅人值得行更遠嘅路，一路都好希望佢出到自己嘅歌。」

吳若希接受訪問時坦言自己見證著Vivian在音樂路上的高低起伏，對她得到好成績感到高興。說起之前教Vivian咬筷子讀報紙來練習廣東話，她憶起一點與Vivian交流練咬字方法的畫面：「其實係喺一啲好休閒嘅場合，係大家等緊埋位嘅時候，佢同我講起自己遇到一啲唔開心嘅嘢，我就同佢分享下細個嗰陣，我嘅伯樂伍樂城先生點教我練咬字，因為呢個方法係佢教我嘅。呢個方法會令你讀每一個字嘅時候都會特別用力，到你唔咬筷子嘅時候就會讀得好啲，冇咁容易有懶音。」

談起今年Jinny推出的作品主要以非劇集歌曲為主，她坦言自己感受到公司在音樂創作上給予的自由度更大：「唔好話係轉緊方向，我覺得係開放咗，畀多啲自由度歌手選擇。其實公司除咗我哋平日聽到嘅劇集歌之外，都一直有做緊其他類型嘅音樂，只係冇重點宣傳。依家可能會係重點宣傳非劇集歌曲，所以大家會覺得我哋轉咗方向，但係我哋一路都有做唔同類型嘅音樂。」

有打入內地市場大計

何麗全表示已有全盤大計，為谷婭溦打入內地市場作準備：「溦溦入咗嚟差唔多10年，今年完全發力，依家做實體碟真係好難，佢能夠攞到金唱片我哋真係好開心，佢係多類型歌手，唱國語唱Rap都好好。」提到有指谷婭溦覺得公司只照顧星夢學員，感覺自己受冷待，他指曾親自致電對方：「佢話冇呢個問題，係啲人驚我哋偏重咗學員嗰邊，其實歌手同學員係兩批人，兩邊我哋一樣咁照顧。」他大讚這位女將非常勤力，並答應將為她籌備演唱會，強調過去也同樣重視星夢歌手發展：「呢個係我哋嘅責任，唔係淨係學員，我哋都希望照顧到星夢歌手，如果啱時間嘅我都想幫佢哋開個人演唱會。歌手最大嘅兩件事就係出碟同開演唱會，胡鴻鈞11月已經開演唱會，出年1月都會有另一位星夢歌手開演唱會，遲啲會公布，阿溦就一定要開，依家搵緊邊個時間最合適。」

被問到近期TVB音樂節目「勁歌金曲」縮水至只剩5分鐘，何麗全稱只是因為節目調動，強調目前依然維持分開星期六、日播放15分鐘的安排。他解釋這個決定並非因收視表現未如理想：「至於是否《勁歌金曲》收視差才有此調動，何麗全坦言︰「其實依家嘅做法同過往半個鐘係冇分別，但係完整版本都係會放喺J2同myTV SUPER度播。我哋覺得音樂節目都係後生仔比較鍾意睇嘅，擺喺J2會係最適合，但係翡翠台真係多觀眾睇嘅，我哋變咗喺翡翠台推介呢個音樂節目，推介啲歌，想睇其他歌手表演就可以去J2度睇，都係一個安排。至於是否《勁歌金曲》收視差才有此調動，何麗全坦言︰「之前的時段是有壓力，節目調往新時段後，收視有回升，比之前高很多，同埋睇返呢兩個禮拜嘅收視率，其實調咗新時間反而會高咗，所以呢個安排都適合嘅，證明決定是正確的。」

何麗全指主要是作歌曲推介，完整節目仍會在J2播出，新時段收視比以往好，沒有壓力，而新安排亦有向唱片公司說明，以後翡翠台都沒有足本版看了。

說到目前姚焯菲（Chantel）以「愛爆音樂」名義出歌，何麗全也透露更多新音樂品牌細節：「呢個新品牌係畀《聲夢》學員，之後所有佢哋出嘅歌都係歸呢個音樂廠牌。所以唔係只得Chantel，之後Gigi（炎明熹）、Yumi（鍾柔美）都會回歸呢個品牌。因為我想區分一邊係《聲夢》學員，一邊係星夢歌手，有個新嘅品牌就會好啲，聽眾、歌迷都會容易啲分辨。」

至於會否全力協助Chantel和Gigi作最後衝刺，力爭今年樂壇新人獎，何麗全則指不會給予他們太大壓力：「對佢哋兩位都係咁講，佢哋都係啱啱加入樂壇，唔想畀一個太高嘅目標畀佢哋。當然對佢哋嚟講可能壓力唔係咁大，但係對我哋嚟講，攞到獎固然高興，但係最重要嘅都係聽眾鍾意呢啲歌。我有同佢哋講過，佢哋都唔係志在要爭新人獎，唔好畀呢啲壓力佢哋，得到觀眾認同先係最緊要。」