鲁滨逊漂流记·第一章（粤语版）

翻译：常ならむ 生活·历险   1632年，我喺英国嘅约克城出世。我嘅父亲系德国嘅不莱梅人，佢初初喺赫尔定居经商，后来先至到咗约克城娶咗我母亲。我母亲姓鲁滨逊，喺当地亦系一个体面嘅人家。我父亲亦由此有咗一份家业。   我跟母亲同一个姓氏，本名系鲁滨逊·克鲁兹拿，但系农村人讲话嘅语音有啲特别，佢地都叫我克鲁索，而且亦系噉样书写我屋企嘅姓氏，后来我嘅一啲朋友亦系噉样叫我。   我有两个大哥，大哥系驻佛兰德嘅英国步兵团中校，效力于大名鼎鼎嘅罗加特上校嘅时候，战死于与西班牙人喺敦克尔克进行嘅箇场战役中。我二哥嘅下落到而家我都毋知，就似我父母后来毋知我嘅下落一样。   我冇乜嘢特别嘅本事，亦冇学过任何手艺，反而个脑一日到黑谂来谂去，有遨游四海嘅想法。父亲箇时已经年纪大咗，要我去念免费嘅乡村小学，叫我薄有学识，喺屋企同我督课，并立意要我做律师，但系除开去海上，我对一切嘢都毋感兴趣。呢种偏好令我对父亲嘅意志、命令同埋心愿，母亲朋友嘅哀求与劝告完全毋理。好似冥冥之中有乜嘢，夹硬将我就快遭受嘅箇种不幸嘅生活挃畀我。   父亲明智而稳重，佢遇见咗呢个计划嘅结果，对我提出咗精辟嘅忠告，有一日朝早就将我叫到佢嘅房间度，热心噉劝咗我一次，佢问我究竟日间喺度谂啲乜嘢，要离开自己嘅屋企同埋生身国土，居然毋顾及事理，喺呢度靠刻苦勤奋，我本来得好好噉跨入社会，得发家致富，过得逍遥快活。佢同我讲，涉险到海上，靠冒险发达，只有贫困潦倒嘅嘢同野心非常大嘅人先会靠呢种非常嘅举动扩大名气。而呢两者对我来讲，毋系高，就系低嘅啫。佢讲我属于中等阶层，呢个阶层最适宜幸福，即系毋似卖体力噉，要受得不幸、艰辛、劳累同埋痛苦，亦毋似得上层人噉，备受傲慢、浮奢、野心同埋妒忌嘅攻心之攰。据佢嘅阅历，呢个系最好毋过喇。佢讲，人地都好羡慕呢一阶层，净系渴望自己落喺呢两极之间，既毋贵盛，亦毋寒贱；仲讲箇个所罗门曾经祈求上帝令佢毋穷毋富，由此可见，呢一个阶层系真正幸福嘅标准。   佢叫我擘大眼望下，下层人同上层人生活中嘅灾难好多，但系中间地位嘅人却好少有，而且毋似得贵人同贫民噉大起大落，过于贫困或者过于富有；毋单止系噉，佢地仲冇好似一啲阔佬噉，被穷奢极欲搞到身心交困，亦未有因为缺、劳累、缺衣少食而似病咗噉；仲讲各种快乐同德行，就系为中等地位嘅人准备嘅，富裕同平静系中产之家嘅随身侍女。中庸，克己，乐朋好友，健康宁静，所有赏心乐事，所有可人嘅娱乐，呢啲福分都属于中等阶层嘅人；又讲，人嚟到世上，只有喺呢个阶层先至系行得舒适，来得安稳，毋至于搞到身心交困，亦毋至于为咗每日嘅面包过紧奴隶嘅生活，或者成日困苦不堪，搞到身心毋得安宁；欲望嘅怒火，想成名嘅野心，都苦佢毋到，只系舒舒服服过完一生，品尝住生活嘅甜美滋味，与苦无缘，觉得无比幸福。   讲到呢度，佢慈祥而诚恳噉劝告我毋好发细伩仔脾气，毋好将自己搞到好似惨到要死噉嘅款，以我嘅出身，按道理，事情都毋应该系噉样；讲我毋需要自己去揾饭碗，佢会尽量让我入佢向我推荐嘅箇个阶层，佢会戥我好好揾下嘅；如果我毋得安适幸福，噉就全怪我命仔毋好，或者我本人妨碍咗佢。因为佢已经尽晒义务，佢睇到咗呢一步嘅害处，并且警告过我，所以与佢无关嘅。一句话讲晒，如果我听佢嘅，喺屋企揾食生活，佢会助我一臂之力，但系我想要搞坏自己，佢亦毋负责一切责任。讲晒啲话之后，佢又要我以大哥为戒，佢当年亦曾经噉样认真噉劝过佢，教佢呒去参加低地国家嘅战争，但佢毋听，一定要持住自己后生血气之勇去参咗军，结果命冇咗；如果我一定要行呢条死蠢嘅一步，佢当然仲系会为我祷告嘅，但系上帝就毋会保佑我喇，当我叫都冇人应时，我自然会定落心嚟，后悔我当初系如何毋听佢老人讲嘅。   我后来先至发现，佢嘅后一段谈话，实在系有先见之明，虽然照我睇来，尤其系提到我箇个战死嘅大佬时，眼泪系噉忍毋住彪出来。当佢讲到我之后肯定会悔恨，会求告无门时，佢十分之悲伤，突然就讲毋落去，佢讲我知话佢心啰啰挛讲毋出嘢来。   父亲嘅话深深令我非常感动，边个又系铁石心肠咧？于是我毋再想出洋远游嘅事。但冇过几日，呢个决定又被我丢到后背底；简单来讲，几周过后，为咗避免父亲再来吟谮，我决定静鸡鸡走佬。但系我却冇讲做就做，我专登等老母比平时开心嘅时候，对姖讲，我就系想出外见识下世界，我系冇心机彻底做呢件事嘅，所以父亲不如索性应承我，免得我不辞而别。我都已经18岁啰，去做乜嘢学徒，或者系做乜嘢律师嘅秘书，都系晏咗啰。我信我就算我去咗，亦做毋耐嘅，都毋使等学齐，我肯定又要瞒住师父走去出海；但系姖如果跟父亲倾下，畀我出海一次，等我返嚟之后，毋中意呢件事啰，我就再亦毋出去喇，我保证追回我失去嘅光阴，以双倍嘅勤劳。   呢句话令我母亲非常之嬲。姖讲我知，佢知得一清二楚，攞呢类嘢跟父亲讲肯定冇用，事关我利害嘅事，绝对毋会同意呢种对我有害嘅事情，又讲姖觉得奇怪嘅系同父亲倾过之后，喺父亲深情意切噉教导过我之后，我居然仲喺度想呢件事。咪讲喇，我系特登搞坏自己，噉人地亦冇办法，但咪旨意佢地嘅同意。至于姖自己，姖先至毋帮我好等我自取灭亡挪。免得之后如果提及呢件事，讲父亲毋同意，但系母亲同意。   就算母亲拒绝咗向父亲提及意见嘅事，但系我后来却听讲，姖仲系将我地之间倾嘅嘢，讲畀父亲知。仲听知，父亲显得好焦虑，然之后叹咗啖气对姖讲，我毋得同意呢件事，呢个细路要留喺屋企，佢会好幸福嘅，但系如果出海嘅话，佢就系天下之间最命苦嘅人。   呢件事过咗毋够一年，我就私底下走咗佬。而喺呢一年间屋企里头几次向我提议，要我做啲正经嘢，我固执噉加以拒绝，一概扮听毋见，而且冇停过噉围到父母讲，咪再夹硬反对我想出海嘅嘢喇。但系，有一日，我去咗赫尔城（我去箇度四围走下，并冇走佬嘅谂法），喺箇度撞正我嘅一个正要坐父亲嘅船出去嘅伦敦嘅伙计，佢使出招募水手嘅老方法，鼓动我跟佢地一齐走，讲今次航行，毋使我使一文钱，我连一个口信亦冇畀到佢地，理得佢地听毋听知啰，毋再同父母商量，冇求父亲嘅祝福，冇求上帝嘅祝福，更加冇谂过乜嘢前因后果，去听天由命啰。1651年9月1号，箇个黑仔嘅时辰，我踏上咗一艘开往伦敦嘅船。我谂自古以来，仲未有边个后生嘅冒险者嘅灾祸比我早、比我长。船啱正开出恒比河呮，就撞啱咗得人惊嘅风暴，海浪连天，异常嚇人。我从来未有出过海，所以自己身体有种讲毋出嘅恶顶，心中十分之恐怖，我开始检点自己嘅行为，心谂我就噉离家出走，不尽子职，个天惩罚我，亦系罪有应得，真算得系自己揾嚟嘅。父母嘅忠告同母亲嘅哀求，父亲嘅眼水，呢个时候一齐涌入咗我个脑中。我嘅良心亦开始责备我毋应该漠视忠告、放弃我对上帝对父亲嘅应该有嘅忠节。   风暴越来越猛，海浪汹涌异常，呢一场风暴，固然不及我以后多次经历嘅箇啲，亦毋及几日之后我见过嘅箇此，但系对一个啱出来捞嘅新人水手来讲，噉亦已经系够触目惊心㗎喇。我觉得每个浪头揰上来，船都跌入咗浪底，都要将我地吞晒落去，我净系觉得系再亦都上毋到来。我心中非常之痛苦，发咗好多誓言，暗落决心讲，上帝如果让我从今次航行中有命嘅话，我就直接返屋企见父亲，我绝对毋再噉样攞来衰。而家我已经清楚噉睇到，佢箇啲关于中等阶层生活嘅言谈真系信到冇花假。佢呢一世人，活得几咁舒服旨在，既冇喺陆上遭遇过麻烦，亦冇喺海上经历过风暴。我觉得要似一个真正嘅回头浪子噉样，落定决心返到屋企，守喺父亲母亲嘅膝头哥下。   呢啲明智而清醒嘅谂法，喺风暴发作嘅当口一直喺我心中兜来兜去，而且仲持续到咗风暴过后嘅一段时间。但系到咗第二日，风平浪静，我开始对大海稍微有啲适应咗。可能成日我都有啲冇嚟精神，而且仲有啲晕船。临近挨晚，风完全停晒，天气变得晴朗起身；跟住，就系一幅靓又得意嘅黄昏景色。太阳晴朗噉落下，第二日又晴朗噉升起，阳光照喺水平好似镜一样嘅海面之上，呢个景色，我一世人咁大个都未见过。   第一日晚刻，我瞓得好冧，呢个时候一啲都毋觉得晕船，所以心中十分之开心。我睇紧第一日仲狂暴得人惊嘅大海，一时之间竟然变得平静得意，不免心净系觉得惊奇。将我引诱来嘅箇个伙计，行到我跟前，大概惊我嘅决心仲喺度，拍下我嘅肩膊讲：“老友，而家觉得点啊？寻日箇一场细风嚇到你发冷震啩。”“你将箇个叫一场风仔？”我讲，“箇个系一场得人惊嘅风暴吔！”佢回答讲“咪傻啦，乜嘢风暴。如果系船坚海阔嘅话，我地先至毋睬噉样嘅细风咧。不过亦怪毋之得，你仲未见过盐水个嗬，我地去整碗甜酒嚟饮下咧，嚟啰，伙计，然之后将呢件事彻底毋记得咗佢，你睇下天气而家几咁正。”仲系讲少啖气啰，我呢一节伤心嘅古仔，行咗所有水手嘅鞋底路。酒调好之后，我饮到不省人事。箇一宿嘅仆街行为浸晒我嘅所有悔恨，我对过去嘅行为嘅全部反省，以及对未来嘅全部决心。总之，当风平浪静、海面返到咗往日嘅平静时，我箇种思绪乱立立，担心同恐惧亦全部毋记得晒，都全部影都毋见埋，以前嘅欲望又覆转流返来，我喺危难中做嘅许诺，发过嘅誓言，如今毋记得个一干二净。箇啲正正经经嘅反省同谂头，又真系想翻转重来，但系都被我揿咗返去。我似匿瘟神噉样匿住佢地，只顾班朋友，饮到乱晒大隆，好快趣就将呢一个心病（我当时就系噉样称呼佢地）压咗落去。毋到五六日，我就似箇啲决心毋叫良心打搅嘅后生仔一样，完全战胜咗自己嘅良心。但正因为呢个缘故，注定仲系要经历一场磨难，对我呢种人，个天自然系要弃置不顾嘅。既然我毋将今次甩身当成上帝嘅一次宽恕，等到咗下一次，自然就会变本加厉，就系人群中箇啲毋怕天毋怕地嘅人遇着佢亦会惊到跪低求放过嘅。