網絡專欄 | OTT / YouTube / 電視的聯繫（台灣、香港TVB&VIUTV）
今屆第56屆台灣電視金鐘獎喺10月2日已經完滿舉行，當中除咗有由細睇到大，三度提名金鐘獎嘅小薰終於得到「迷你劇集/電視電影女配角獎」之外，仲有兩個入圍單位好在意；曾寶儀憑《我們回家吧》入圍「益智及實景主持人獎」五強、黃路梓欣Lulu兼任主持同製作人嘅《畫說Lulu》入圍「綜藝節目獎」五強。
兩位一線主持人嘅節目入圍，本來冇乜特別，但呢兩個都唔係喺電視台播嘅「電視節目」，而係喺OTT平台同埋YouTube播嘅「網絡節目」！今屆金鐘獎其中一個突破，就係接受喺網絡影音平台（不包括Facebook及YouTube）公開播放、一季達8集或以上長度嘅「綜藝節目」、「益智及實境節目」報名參賽。
台灣文化局話考慮到民眾收睇節目方式嘅改變，綜藝節目、益智及實境節目喺合法網路影音平台播放已成趨勢，今屆開放報名係為咗鼓勵業界製作更多優質多元嘅綜藝節目。另外，金鐘獎唔再限制參賽節目必須喺台灣首播。喺台灣以外電視頻道、網絡影音平台公開播送傳送嘅作品，只要喺指定期間喺台灣有播放，亦符合報名資格。兩項改動都回應咗台灣網上節目愈來愈多人睇、愈來愈高質素嘅走勢。
睇返香港嘅OTT平台，myTV SUPER近年有拍綜藝節目同劇集。拍開劇嘅hmvod最近有真人騷《敗者重生戰LOSER REBORN》。一路有拍清談、綜藝嘅喱騷就拍咗處境劇《在觀塘下體現愛的故事》。AMMHK一路拍同播緊綜藝、音樂節目，仲有戚其義拍緊嘅劇集。以上三個OTT平台都向全方位發展，希望愈做愈好。黃Viu OTT平台亦都開始拍香港嘅製作，最新有麻利同ToNick恆仔主持嘅清談節目《同煲同BLOW》，杜之克主理之後希望會拍埋港劇。YouTube方面，都有唔少有質素嘅遊戲節目、短片、劇集、音樂節目。YouTube channel同OTT點樣好好互相帶動，互相將支持者引流、共享支持數字，係成個生態再發展嘅重要一步。
上次試當真、小薯茄、熊仔頭、啱Channel嘅「四台聯播」雖然被唔少人評為內容乏力，但數字所見，聯播的確令到各台粉絲互通，各台嘅subscriber數上漲，可惜近半年都未再有動作，亦都未見到YouTube channel同OTT有啲咩crossover。不過相信呢日會好快出現。
