雪螢SiqYin个2022年终报告

吾篤總歸會長大，總歸會褪脫純粹嗒青蔥，總歸會變成吾篤覅變成个模樣。

咕咕咕咕！

大家長遠弗見哉，吾是連年終報告也想鴿脫个屑螢。

想吇箇一年年个過去嘖，當別人家儕欣然於「今年亦寫吇蠻多个詞！」「嘗試吇新个風格，認識吇新个朋友」个辰光，吾正直直个瞪吇天花板，然後玩弄點嘸人好讀懂个文字，再盯吇百來个播放量發愣。自知經年實無值得稱道之處，縱使真發出吇箇篇無人理解也無人願理解个「年終報告」，也弗過是聊作自娛自樂罷哉。

但不過，亦如何？

現在想來，吾踏入Vocaloid圈漸習詞作，已經六年餘哉。雖說也寫吇些許讓自家滿意个作品，但終是人事世事兩相催，或是嘸不畀甲方發表就畀遺忘埋沒於俚个廢紙堆，或是快煞泯然衆生不得畀誰聽見哉。一轉轉希望復失望个吾漸漸也尋弗來初次作詞時个興奮嗒熱情嘖，「既無才豔驚羨天下，弗如寄情江南一葉放浪於江湖，」自行風雅事，莫問與誰知。倒頭來，曾經竭力想讓更多人瞭解自家个詞作雪螢，反而開始有點顧影自憐、傷春悲秋哉。

然而吾仍願再寫。寫詞，寫意，寫吳語，寫吾心。儘管弗會有多少人來讀，儘管弗會有多少人來聽，儘管少年意氣將畀消磨殆盡，儘管吳語嗒蘇州閒話已是死期既定个方言。吾想寫好初高中時歸點綺麗个幻想，寫好夢中个亭臺樓閣、漢宮唐闕，寫好風華依舊卻與今朝越來越遠个「中國」，寫好吳語留畀箇世界个最後一點記憶。箇或許是吾弗切實際不自量力个妄想，但吾有試試个勇氣。

2022是個「大」年份。叻嗨箇時代弗畀注視个某個角落，吾走向吇大學，走向吇成年，走向吇朆想象過个城市嗒專業。身邊个同學各奔東西，各負前程，各自行自家个路，彼此變得陌生。吾篤總歸會長大，總歸會褪脫純粹嗒青春，總歸會變成吾篤覅變成个模樣。歸一日總會到來——弗叻過去，弗是現在。

箇篇遲到个年終報告，寫畀吾自家。願倷步過山水，歸來仍弗負韶華。

2022年一共投稿14次，7個視頻，7篇專欄。因爲高考及大一新生事務繁忙，着實嘸不辰光寫詞，再加哴沉迷原神（劃脫）音韻學、語音學、吳語詞彙語法个整理嗒甄別，作爲詞作个成績嗒2021/2020相比簡直是天壤之別，是肉眼可見个大退步。

年初个辰光還是喇衝刺高考。歸時因爲西安个突發疫(yuq8)情吾篤儕開始線上上課，吾也得以忙裏偷閒个調教投稿點作品（逃）。

1月9日，詩岸(ngoe6)吳語版《驚鵲(tshiaq7)》投稿。叻投稿後發現最後一段音量出吇問題，中途進行過換源。箇隻歌个調教還算蠻好个，成曲也較爲滿意，但是由於當時吾個人个能力問題個別字音擬音出現吇問題：

一，吳語蘇州閒話中見組聲母iq韻(yun6)字嗒其他聲母iq韻字个iq讀音弗同。大抵是見組(ciq chiq jiq shiq gniq)个iq讀如ieʔ而其他聲母配iq讀如iɪʔ,吾喇該版中拿所有iq韻均擬作ieʔ。日後个吳語擬音投稿進行吇糾正；

二，該版因追求押(aq7)韻、認知有誤(ngou6)等對於同字弗同音个選擇相當混亂，如「間」字出現過ke1、cie1兩種讀音，而選擇標準是押韻用cie弗押用ke！日後个吳語擬音投稿進行吇糾正。

1月12日，海伊/詩岸版《灼(tsaq7)之花》投稿。箇隻歌調得一般，由於《灼之花》是吾个入坑曲，調俚主要是一種懷念。除此意外唯一值得一講个就是俚是今年投稿个唯一一隻普通閒話曲(??!)。

然後是長達8個月个辰光里向吾朆再投一個視頻，一口氣鴿吇兩百多日。其間投稿過一通關於未來普通閒話衍(ie3)變方向个分析——後來因爲有多煞疏(sou1)誤偷偷改過一轉；投稿過《Paper Bouquet》个吳語翻譯——當時還嘸不將方言正字規範化。

高考完也是一堆事體，再加哴吾生性慵懶(yon2le6)，蠻多事曉得也弗想做，想做也懶得做（快逃），最終做成个事也殊(zyu2)爲有限。

爲數(sou5)不多个投稿是專欄里向个一篇《See Tinh》吳語填詞。說是填詞，其實是按原文意思逐字逐句翻譯，吾自家是寫弗出箇末風格迥(cion3)異个原創詞个。

9月9日，吾投稿吇專欄《憶紅蓮 改良普通話註音》，並於兩日後久違个投稿吇對應視頻。雖說是「改良普通閒話」，但吾可嘸不讓普通閒話強行復古个打算——除反駁「灤(loe2)平論」外我對普通閒話弗煞關心——而是正在爲當時已經開始策劃个「大活」作準備。吾叻嗨箇隻歌中嘗試吇「六尾咸(ye2,鹹ghe2)存」(m,n,ng,p,t,k)官話音系个可能性與相應个聽感，並立刻投入吇實踐。

10月吾因軍訓等原因嘸不辰光投稿。

11月初，吾得到吇《姑蘇爲期》各位staff个吳語翻調許可，並收到吇midi、伴(boe6)奏音軌等，迅(sin5)速完成吇吳語版个翻譯嗒調教。《姑蘇爲期》曾喇高中時代畀吇吾蠻大个觸(tshoq7)動，用蘇州閒話翻調該曲也是良久以來作爲吳語調教up个夙(soq7)願之一。其詞非出吾手，但亦可視作吾對吳語、對姑蘇个自白。

11月18日，「未定a」音系誕生。11月19日，第一隻由未定a演唱个歌《四萬秋》投稿。

「未定a」是吾對人造音系个第一次嘗試。俚雖然嚴(gnie2)格來講是一種人造方言，但喇吾自家个設定哴弗畀使用於當代中國，而只是一个極其滯(zyu6)古个假想音系罷哉。箇音系是晚期中古漢語个直系後代，理論哴屬於官話——如果當代官話敢認箇个兄弟是（笑）。未定a个音系、字音、詞彙、語法今朝儕處於極弗完備个狀態，我會喇新個一年裏繼續(zoq8)完善(zoe6)。

12月19日，Mai版《下弦の月》投稿。箇一版主要是爲吇試用Mai聲庫，無他用意自然也反響平平。

2022年吾做吇三樁有意義(gni6)事體。

第一，是《姑蘇爲期》吳語个投稿，是將一個句號劃喇吇過去。

第二，是「未定a」个草創，是寄希望於將來。

第三，是至今尚朆投稿个，《吳語常用詞彙》。

《吳語常用詞彙》是吾根據多種吳語蘇州閒話相關資料包括(kuaeq7)字典、教材、錄音、語料等蒐集(ziq8)整理个以蘇州閒話基礎(tshou3)詞彙爲主，兼採多種吳語方言詞彙个吳語代表性常用、基礎詞彙表，隨表有吾整理个雪螢版蘇州閒話方言正字。箇个表從11月初開始整理，由於內容過多，截(ziq8)至發表本文檔仍叻嗨整理完善中。約莫2023年可以與大家相見。

以上，是我對過去箇一年个全部總結。箇一年辰光弗長弗短，年中世事紛繁，足以喊我篤嘻噓感喟，也好讓我篤笑忘後繼續前行。文字會畀修改，但人心弗會。吶哼講只是形式，呢喃細語亦可振聾發聵。

最後，將一首題畀吾欣賞煞个一位詞作先生个次韻詩留喇文末。詩中嘆个是先生，亦何嘗弗是歎自家㖏？

身寄江南外 微漪泛独舟

始逢同叙客 终喟共情秋

字句留风骨 心神映鹭鸥

山川依旧是 泼墨画沉浮

PS：箇可能是全B驛最長个純吳語文之一。