西游记第一回（粤文版）
第一回
灵根育孕源流出，心性修持大道生
自从盘古开荒，三皇治世，五帝定伦，世界之间，就分做四大部洲。即系：东胜神洲，西牛贺洲，南赡部洲，北俱卢洲。呢一部神话故事西游记讲嘅就系东胜神洲嘅事。箇阵海外有个国家，叫做傲来国。呢个地方近住大海，离傲来国好远好远嘅大海上边有一座大山，呢座山有高又大，四便都系海。山上生满青松翠竹，奇花异草。
仲有一样嘢出奇，正正喺山顶上便有䊆大石。本嚟山箇度有石头就冇乜出奇嘅，之䊆石就得别毋同，你睇下，足足有三丈六尺五寸高，氹氹圈有二丈四尺，点解有三丈六尺五寸咁零丁，原来三丈六尺五寸就正合周天三百六十五度，二丈四尺正合正历二十四气，石上仲有九窍八孔，系按九宫八卦，喺石头上边，冇道树木遮荫，受到天尊地秀，日精月华，天长地久喇，就有咗灵通之意，箇䊆石润育咗个仙胎。有一日，䊆石突然间裂开，爆咗个石膥出嚟，圆辘辘滑浖浖，一见到风，就即刻变做一只石猴，虽则系石头变出嚟嘅马骝，但系又好似真马骝一样，五官俱备，四肢齐全，一出世就学爬学走，向住东南西北四方拜咗拜，箇双眼放出两道金光，哎吔，呢两道金光真系厉害，一直射到上九重天上惊动咗玉皇大帝，玉皇大帝见到凡间有金光闪闪，就喺凌霄殿上下令叫千里眼同埋顺风耳两个天神打开南天门睇下到底发生咗咩嘢事，千里眼就睁大双眼一睇，顺风耳就侧住个耳仔嚟听。一阵间佢地就返嚟禀报。原来东胜神洲大海嘅东便，同埋傲来小国之间有座花果山，山上有䊆仙石，生咗个石膥出嚟，一见到风就变咗个石猴，而家喺度拜四方，双目射出金光，一直冲到上天上。饮咗几啖水食咗啲嘢，双眼嘅金光就快消失㗎喇。玉皇大帝一听：
「哦，原来系下方之物，乃系天地精华所生，不足为怪。」
从此，箇只石猴就喺山中会行会走，会爬树，又会打跟斗，肚饿箇阵，就食草木，采山花，摘野果嚟充饥，口渴就饮山泉嚟解渴，晚黑就喺石山悬崖之上瞓觉，日头就喺山峰岩洞箇度玩，真系山中无甲子，寒尽不知年。快活不知时日过。
有一日，大热天时，石猴就同埋成班马骝喺大树脚下边敨凉，马骝边处定得落嚟咖，成班喺处跳跳扎扎，有啲爬树，有啲辘地沙打跟斗，有啲喺处理毛衣捉虱乸，有啲喺处咬手指揸耳𢯎腮，有啲玩泥沙有啲掟石仔，有啲捉塘𧋦，有啲扑蝴蝶，有啲叠罗汉，有啲打千秋，玩到成身大汗就走去山水箇度冲凉。
呢股山水系喺山顶一直冲落嚟，水花四溅，清凉透心，箇班马骝就吱吱嘲嘲喺度嘈咿巴闭。俗语都有话：禽有禽言，兽有兽语。我地听佢就吱吱嘲嘲毋知喺度做乜，其实箇班马骝喺度倾偈。其中有一个就话：
「呢一股山水都毋知系边度流落嚟嘅，今物我地得闲无事，不如顺住呢条山水爬上山箇度，一来可以玩下二来可以睇下啲水源头喺边度。」
经佢一讲，成班马骝都赞成，于是拖男带女，呼兄唤弟，你挨我迫，争先恐后，顺住山水就爬上去，一直爬到山上。哦，原来一股瀑布，箇班马骝就高兴啰，七嘴八舌：
「喺度喇喺度喇，原来 山水喺呢度流出嚟嘅。」
有啲就讲：
「咁大嘅瀑布，梗系一直通到大海定喇。」
其中有只马骝就大声讲：
「喂喂喂，边个有本事，如果能够蜎入瀑布里便又蜎返出嚟，揾到个源头又毋伤身体嘅我地就拜佢为王，好毋好啊。」
讲完之后，底下粒声毋出，静嘤嘤，冇个敢去，梗系啦，马骝你叫佢爬树十几丈高都闲闲地，打跟斗一百几十个都毋keoi1，之呢个瀑布嚟个噃，吙吙声好似千军万马噉喺山上冲落嚟，跳落去，容不易一直冲到入大海，连嗌咗三声，冇个敢应。突然间，远远喺树脚下边跳咗只石猴出嚟：
「我去，我入去。」
正系『今日芳名显，时来大运通，有缘居此地，皇遣入仙宫。』你睇箇只石猴眯埋双眼踎低一牚，咚一声就跳咗落瀑布里便，入到去佢擘大双眼一睇，咿咦，奇怪喇奇怪嘞，一啲哆水都冇嘅，明明朗朗有条桥喺度，再定一定神睇真下，原来系一座铁板桥，桥下便吙吙声啲水冲落嚟，撞落石罅箇度然后倒挂流出去变成一股瀑布，又有咁啱得咁巧噃，瀑布又啱啱遮住条桥，所以你喺外边睇呢，就只见瀑布就睇毋见道桥，石猴过咗桥再行入去，哇，咁靓个㖞，原来系一座好大好大嘅岩洞，顶上嘅钟乳石好似挂住一串一串珍珠噉闪闪发光，周围嘅岩石就好似白云一样咁雪白，好似俾打磨过嘅大理石一样咁光滑，洞口旁边，有几棵大青松，仲有竹树梅花，石洞入便，石炉石灶石床石台石凳石盘石碗样样齐全，哎吔，佢睇到眼都定晒，哎吔，哎吔，咁好地方嘎，于是佢再行前几步，见到有个石碑，上面凿住一行大字，花果山福地，水帘洞洞天，石猴睇到呢度真系欢喜到成个跳起上嚟一连打咗几个跟斗佢拧转身就走，走桥头眯埋双眼踎低一牚，就跳出水外，出到嚟佢揈两下身上嘅水，𢯎两下腮，一边笑就一边讲：
「大造化大造化。」
箇班马骝，见佢上咗返嚟，大家就欢天喜地噉围住佢问：
「点啊点啊，里便点㗎，啲水几深。」
「冇水㗎冇水㗎冇水㗎，里便有座铁板桥，入便天造地设一副好家当嚟㗎。」
「乜话，奇怪喇，入便冇水㗎仲有个好家当添。」
有啲就讲啰㖞：
「你咪喺度眲人，有副家当。」
「咪嘈咪嘈咪嘈，你地听我讲，呢条瀑布系铁桥下边嘅水冲撞石罅倒挂出嚟㗎咋，佢啱啱遮住道桥，所以喺外面睇毋到，过咗桥里便呀，有花有树仲有座大石屋，屋里面石炉石灶石碗石盘石床石凳，样样都有。中间仲有块石碑，上便凿住字：花果山福地，水帘洞洞天，我睇箇处系我地真正嘅安身之地，里便好阔洛，容得落一千几百口老少，不如大家搬入去住啦，免得系处收老天嘅气，关公有个地方避落雨有个地方匿吖嘛。」
箇班马骝听到呢度，个个欢喜到跳起上嚟，大家齐声话：
「好啊好啊，你带我地入去，带我地入去。」
石猴又试眯埋双眼踎低大声噉嗌咗声：
「大家跟我嚟。」
讲完就唪一声跳落水，箇班马骝有啲大胆嘅，就眯埋双眼硬住头皮摏落去，有啲胆小嘅咧，一个个喺处伸头缩颈，咬脷𢯎腮，𢯎头𢯎髻，有啲就得把声喺处噍噍噍噉嗌，逳都毋敢逳半步，哎吔，嘈嚟嘈去足足搞咗半日，卒之，一个一个叮叮㕪㕪噉跳晒落去，好喇，入到一睇，原来咁多嘢㗎，于是喺度你争我抢，有啲争盘夺碗，有啲就爬上床，有啲就跳上灶头，有啲就将啲石台石凳石盘搬过嚟抬过去，哎吔搞到八国咁乱，总之江山易改，本性难移，马骝边度会有安宁之日，等到佢搬到筋疲力倦喇，然后先至停手坐低嚟敨大气，箇阵，石猴已经端端正正坐喺上便开口：
「各位啊各位，人而无信，不知其可。你地头先话㗎，你话边个有本事入得嚟出得去不伤身体就拜佢为王，而家我入得嚟出得去，出去又入嚟，揾到呢个洞天福地畀大家落脚，可以安居乐业，各享成家之福，大家要讲口齿，你地应该要拜我为王先至系。」
箇班马骝听佢噉讲，个个心服，于是按老幼辈分，排班拜见千岁大王，石猴从此就高登王位。佢就将啲将军大臣官吏仆从分派好，而家封王嘞，个名要讲究下㗎，石字毋系几好听，所以就改名叫做美猴王，从此美猴王就带领成班马骝，里便有言猴利猴马猴，有长尾嘅，掘尾嘅，松毛挛捞嘅，总之品种齐全，样样都有，佢地日头就喺花果山上游山玩水，晚黑就喺水帘洞内高枕安眠，悠哉游哉真系十分快活，光阴似箭，日月如梭，转下眼已经过咗三五百年。
有一日，美猴王同埋成班马骝喺度欢宴，大家高高兴兴，有讲有笑，忽然间美猴王心中烦恼，左思右想，流出眼泪出嚟，箇班马骝见到大王突然流眼泪，就十分奇怪。
「大王，点解突然间咁烦恼？」
「我虽然而家过得高高兴兴，只系谂到日后有啲担忧。」
「大王，你又真系有啲不知足啰，我地日日喺处欢乐聚会，住喺仙山福地古洞神洲，无拘无束，不服麒麟管，不服凤凰辖，又毋归人间皇帝所约束，自由自在，正所谓无量之福，仲担心乜嘢将来至得㗎。」
「你地毋知得咁多，今日虽然我地不归人间王法所管，亦毋受猛禽恶兽威逼，之但系将来年老体弱箇阵，暗中有阎罗王老子管到实吖嘛，终需有一日要死㗎，噉岂不是枉生世上。」
箇班马骝一听，觉得有道理㖞，于是一个个你望我我望你，揞埋面喊起上嚟，佢地惊住毋知边日阎罗王派无常嚟揾到自己头上，正当成班马骝喺处痛哭流涕箇阵，有只通背猿猴跳出嚟禀报。
「大王，大王，而家你谂得咁长远真系所谓道深开法啰，我地有福喇，大王，如今世上唯有三等人不受阎罗王老子管。」
「系咩系咩，有呀，你讲你讲系边三等人。」
「就系神仙佛祖，同埋神圣三者，佢地能够避过轮回，不生不灭，同天地山川齐寿。」
马骝王一听就欢喜喇。
「真嘎真嘎，呢三者而家喺边度啊？」
「佢地系出入喺人世之中，住喺仙山府洞之内。」
马骝王听到呢度真系眉开眼笑。
「好啊好啊，我听日就辞别大家，我下山去走遍天崖海角，一定要揾到呢三者返嚟，我要学一个长生不老之术，等我地大家避过阎罗王箇关。」
箇班马骝个个拍手称赞。
「好啊好啊好啊，听日我地翻山越岭去揾啲果品返嚟大排宴席，欢送大王。」
第二日，成班马骝就分头去采仙桃摘异果，真系样样齐全应有尽有整整齐齐噉摆喺石台上，龙眼荔枝琵琶雪梨苹果鸡心香桃青杏杨梅大西瓜大红子石榴仙桃银杏椰子葡萄，甜橙柑橘，仲有薯仔芋头黄精茯苓，石台上面仲摆住好多呈酒，呢啲酒系用葡萄椰子做成嘅美酒，真系人世间纵有山珍海味，点比得花果山上嘅奇花异果味道清新，大家就请美猴王坐喺上座，其他就按辈分排列坐喺下边，一个个轮流上前敬酒献花奉果，呢一餐足足食咗一日。
第二日一早，美猴王起身就吩咐要斩啲松树嚟扎个木排，斩支茅竹嚟做撑船之用，准备好啲果品喺半路充饥，一切准备好晒喇，美猴王就跳上木排，大成嗌咗声：
「我走喇。」
然后出力一撑，只木排就飘飘荡荡，一直使出大海，向住南赡部洲驶去，真系算佢时来运至，自从佢登上木排之后，一连几日都系吹东南风，将佢送到大海箇便一直送到西北岸，箇度已经系南赡部洲地界，岸边有好多人喺处捉鱼， 挖蚝，髧虾摸险，美猴王出力一撑就将木排泊岸，箇只马骝王真系蛊惑，佢一跳上岸就整蛊整怪，瞪大双眼擘大个嘴，大声㖡㖡噉嗌，个样得人惊啰，好似想食人噉个怪样，嚇到海边上箇班人渔网都掉埋，竹蓠都揈晒，走都走毋彻，有一个已经俾佢嚇到脚都软晒，毋识逳，箇个美猴王一手称住佢就将佢啲衣服剥落嚟，自己着上身，哎吔，你睇佢着一件人嘅衣服，摇摇摆摆穿州过府就去到人烟稠密嘅市井之中，马骝就好精㔹个㖞，何况呢只系有灵性嘅，毋使几耐佢就学会行人礼讲人话，由朝到晚，到处去揾神仙，一心想学到长生不老之术，点知到处见到人世间，都系为名为利劳劳碌碌。正所谓「争名夺利几时休，早起迟眠不自由，骑着驴骡思骏马，官居宰相望王侯，只愁衣食担劳碌，何怕阎王就取勾？继子荫孙图富贵，更无一个肯回头！」
又算系佢有恒心，喺南赡部洲，足足揾咗八、九年都未揾到神仙，之佢都仲毋心死，一直揾到西洋大海边，佢谂，呢度冇啫，海外箇便一定会有嘅，于是佢又照以前嘅办法，做个木排，又试漂洋过海，一直去到西牛贺洲地界，上岸之后又系到处去揾。有一日，行到座大山脚下，呢座山又高又大，深山林密不见人烟，知佢又毋怕豺狼虎豹，又毋惊毒蛇虫蚁，一于上山顶睇下先。
上到山顶，哇，果然好风景，正系睇得入神，忽然间听到有人声，佢就快手快脚匿埋入树林里便，侧喺耳仔嚟听，原来有人喺度唱歌，箇人唱到最尾箇几句系相逢处，非仙即道，静坐讲《黄庭》。美猴王听到呢几句，成个欢喜晒，原来神仙匿埋喺呢度，佢即刻跳出嚟，一睇，原来一个人喺处斩柴，一边斩一边喺度唱，美猴王就三步夹埋两步走上前，大声对讲：
「老神仙啊老神仙，我揾到你喇揾到你喇，老神仙弟子有礼。」
斩柴箇人一听，拧转面一睇，哎吔，就连斧头都𦈞埋。
「你千祈毋好噉讲，我斩柴嘅，衣食不全又点敢当得起神仙两个字。」
「你，你喺度眲我，你毋系神仙，你毋系神仙又点解会讲神仙嘅说话？」
「我，我讲咩神仙嘅说话啊。」
「你仲喺处眲我添，我头先听住你讲㗎，相逢处非仙即道，静坐讲《黄庭》。你估我毋知吔，黄庭就系道德真言，你毋系神仙系乜嘢啊，你讲。」
斩柴箇个人听到呢度就咔咔声笑起上嚟：
「老实对你讲，我呢首词嘅名叫《满庭芳》。确系一个神仙教我嘅，呢个神仙同我系隔蓠邻舍，佢见到我屋企贫苦，成日烦恼，所以佢就教我，烦恼箇阵念下呢首词，一来散下心，二来提神。头先我做到攰晒，所以随口念下，点知俾你阁下听到。」
「你真系，你又系，噉你住喺神仙隔蓠，你点解毋同佢学个长生不老之术。」
「你有所不知啰，我一生命苦，父母养育我到八，九岁先至懂事，点知老窦病死咗，靠老母守寡凑大我成人，又无兄弟姊妹，净得我一个人喺处服侍老母，而家姖老人家年岁大嘞，我又点离得开姖，而家又碰上荒年，衣食不足，所以只好每日上山打柴，担去卖揾返几个钱，籴几升米，粗茶淡饭嚟供养老母。你话，我又边处跟得神仙去修行。」
美猴王听到呢度真系十分敬佩。
「原来你系一个孝顺君子，日后你必定有好报应。但求你指点我去神仙箇度，我去揾佢嚟学修行。」
「冇几远嘅啫，嗱，呢个山就叫做灵台方寸山，山上有座斜月三星洞，洞中有个神仙，就叫做须菩提祖师，箇个祖师，教出嘅门徒不计其数，而家仲有三四十人跟佢修行，你顺住呢条小路，向南行七，八里路左右，就到佢屋企。」
美猴王一手拉住箇个人。
「喂喂喂，老哥老哥，你为人为到底，你带我去啦，弟子第日得到好处，一定毋会忘记你指引嘅恩德，老哥，帮下手帮下手。」
箇个人一推推开佢双手。
「你呢个人真系点极都毋明，我头先已经讲咗好白㗎啦，你都仲毋醒悟嘅，如果我同你一齐去，岂不是误咗我嘅生计，我老母边个奉养啊，好喇好喇，我要斩柴，你自己去，去啦。」
美猴王听完，只好行礼多谢佢，就照住佢指嘅路一直行去，行咗约摸有七，八里路，远远一望，果然有一座洞府，行到埋去，只见洞门闩到实，周围静嘤嘤，人影都冇个，𫖵高头一睇，上面有座大石碑，约摸有三丈几高，八尺几阔，上边一行十个大字：『灵台方寸山斜月三星洞』美猴王十分欢喜，呢度啲人真系朴实，头先箇个人就冇指错路畀我行，真系喺呢度㖞，佢喺门口行嚟行去，硬系毋敢去敲门，行咗阵攰嘞，就跳上棵松树敨下，顺便摘返几个松子嚟食下充饥，忽然间，𡃀一声，个洞门打开，里便一个仙童走出嚟，个仙童真系生得丰姿英伟，相貌称奇，同一般凡夫俗子大不相同，仙童出到嚟就问：
「边个喺处骚扰啊？」
美猴王噗一声就喺树上跳落嚟。
「仙童啊仙童，我系嚟访道学仙嘅弟子，绝不敢骚扰。」
「你系嚟访道嘅？」
「系吔系吔系吔，毋怪得啦，头先我师傅啱啱开始登坛讲道，仲未讲出缘由啫，就吩咐我出嚟开门，佢话外边有个修行嘅嚟咗，叫我嚟接待，照噉睇，系你都毋定啰。」
「冇错冇错，就系我。」
「噉好，你跟我入嚟。」
美猴王肃整衣冠，跟住仙童一齐入洞府，一直去到菩提祖师讲道嘅地方，佢见到菩提祖师坐喺台上，台下边有三十个小仙，企喺两边。
美猴王一见到祖师啫，就跪低一味喺处叩头，辟辟卟卟，都毋知叩咗几多个响头，一边叩头一边讲：
「师傅啊师傅，弟子专心朝礼，专心朝礼。」
祖师就讲：
「你咪叩头住，你系何方人士，你将你嘅姓名，籍贯，讲明白先至再拜都毋迟。」
「弟子乃系东胜神洲傲来国花果山水帘洞人士。」
「来人，同我将佢赶出去，呢个系奸诈之徒，讲咩修行学道。」
「师傅师傅乜你噉讲㗎，我句句都老实冇半点虚假。」
「你仲话老实？你讲你系东胜神洲人士，箇度离我呢处隔两重大海，一座南赡部洲，你又点嚟得到？」
「师傅师傅，你听我讲，我揾你揾得好辛苦㗎，弟子漂洋过海足足揾咗十几年先至揾到呢度。」
「哦，原来系噉嘎，你姓乜嘢啊。」
「我，我冇姓㗎，如果人地闹我，我都毋嬲，刮我两巴掌我都毋发火，只要佢认个错我就乜事都冇，所以我冇火性。」
「毋系问你脾性嘅性，我问你，你父母姓乜嘢。」
「我冇父母㗎。」
「乱讲，连父母都冇，毋通你树上生出嚟？
「毋系树上生㗎毋系树上生，我系石头爆出嚟，师傅，我净系记得花果山上有䊆仙石，有一年䊆石裂开我就出世。」
祖师听到呢度，心中就欢喜。
「原来你系个天地生成嘅，好好好，你起身行几步畀我睇下。」
马骝行路就核突，你睇佢，左摇右摆，东倒西歪，行咗几步，祖师忍毋住笑起上嚟。
「好喇好喇好喇，我睇你行路咧，有啲异像，十足似个食松果嘅马骝，马骝即系猢狲，猢字去咗个兽旁就系古月胡，古者老也，月者属阴，老阴不能化育，不如就姓孙好喇。」
美猴王一听到就满心欢喜，行过嚟就叩头。
「好啊好啊师傅，我今日先至知到原来我姓孙，望师傅慈悲，既然畀个姓我，不如同我安埋个名咧，有名有姓叫都好叫啲。」
祖师谂咗一阵。
「我地门中按12个之分派起名，轮到你已经系十辈小徒，排到你正系个悟字，好喇好喇，同你安个名，你就叫做孙悟空，好吗？」
「好啊好啊师傅，从今以后我就叫做孙悟空。」
