辜苏历程（鲁滨逊漂流记）1902年版，第八章，粤语版
原著：英国，丹尼尔·笛福
翻译：英国传教士，英为霖
抄录：常ならむ
第八章
船上嘅事，现在已经造完，但想起屋嚟住，因为帐幕毋系长久之计，再想下，或依靠山洞藏身，或搭茅屋嚟住，两样都好，独系地方要拣择，一件要离岸冇远，毋怕潮湿，而且容易攞淡水，二件要向阴背阳，因呢处近赤道，热头极猛，三件要避野兽野人伤害，四件要望得见海，若有船嚟，可以望叫佢拯救，呢四件不能少一件，就周围揾下，忽然见一处有一座山，山之前有地，后便系山，前便近海，箇山就系有啲凹入嘅，好似一个洞略浅啲，面前系一片平阳地，阔约五百尺，深二百五十尺，有天生成嘅石级，可以通到海，而且面向西北，其地在南半球，故西北即系北半球嘅，东南热头好少，又可以聚风，箇处地极好，就照山尽地，做个半边月样子，阔五十尺，深二十五尺，𢬿木削尖做柱，照半边月样子，排密地上做墙，共两层，中间离开六寸，𢬿船上斩断嘅大绳，挤入去整实佢，又怕被风吹倒，故此再𢬿短木撑住，箇啲短木每条长二尺五寸，做好之后，好似城墙一样，十分坚固，将各物搬入去，毋设门户，怕出外冇人看管，故此用梯出入系稳阵，即使间有人嚟暗算，亦毋怕咯，但我造呢个坚固嘅城究竟无谓，因自始至终冇人嚟窥探，又喺城上中间开一个帐幕，𢬿油漆布遮盖外便，免致雨漏，再喺内便盖一个细帐幕，好似屋有一层楼噉，𢬿嚟收藏贵重嘅物，后来将船上拧嚟嘅大网绑紧，四只角，𢬿嚟造床，各样造完，就起首将山凹处掘深啲，因呢个山嘅沙，又松又软，好易掘嘅，做呢啲工夫时，忽然睇见乌云四起，又有雷有电，箇啲电闪得好光，箇时我就想起呢处藏埋有火药，若遇着电火，一时爆裂起嚟，噉就我嘅性命，共所有嘅嘢，都变为碳罅，点算好呢，好彩雷雨冇耐，就止息，然后放心，急啲将二百四十磅火药分为二百四十包，分开藏埋山嘅细洞里，就可以免雷火嘅灾，噉就想每日做工夫之外，必定出外便散步一账，亦可知岛中风景，第一账出外散步，睇见成队山羊，有一百几十只咁多，了不得咁欢喜，自后毋忧冇肉食咯，就开枪打死佢，即时走晒去，第账出外，睇见成队羊喺山，我就打死佢，又打毋中，就想下羊嘅眼，净系睇下，我若系向上打佢，嘥去气力呮，毋似转上高处，由上便打下，噉就羊嘅眼睇毋见咯，就枪声一响，即时见一只羊倒地，睇下系羊乸，侧边有只羊仔企处，就孭住羊乸返去，羊仔跟住嚟，因为失哓羊乸，故此成日叫喊，畀佢食亦毋食，到底必定饿死，所以亦𢬿枪打死佢，但系一连杀哓羊乸羊仔，肉食太多，食哓好耐咯。
