辜苏历程（鲁滨逊漂流记）1902年版，第六章，粤语版

原著：英国，丹尼尔·笛福

翻译：英国传教士，英为霖

抄录：常ならむ

第六章

    虽然各物搬到岸上，冇地方收藏，倘或潮水大起嚟，必定被水浸哓，岂毋系前功尽弃咩，故此周围睇下地方，见三里咁远，有一个大山，箇山好高嘅，山后便又有好多山，一连好远，将藏火药嘅牛角，挂在膊头，手枪收埋袋里头，担起一枝火枪，一直行，𢬿嚟防避，因为初到呢处，毋知到点样，若遇着野人或野兽，有火器可以拒敌，而且至紧要嘅，仲在有肉食，有火器就随便打猎，可以得饱，一路行到山边，见箇笪地冇人嘅踪迹，冇耕田人行嘅路，与及人整食物嘅地方，一啲都冇，连畜生都冇，所以知得呢笪地方，自古至今，冇一个人到呢处嘅，就上到高山顶，睇见四围皆系水，好蓝色嘅，知系海岛，总冇人喺处嘅，近海箇处，另有两个细岛，我所上嘅系大嘅，有好多雀鸟，亦毋知系乜名，就拣择一只大嘅，开枪打死佢，想下呢个岛，自创世以来，有枪声，算呢账系第一次，后来睇见打死只雀系鹰之类，箇啲肉毋食得嘅，故此毋要，又再睇下呢个岛，无非皆系毋好嘅地方，心里叹息，噉就落山，将各样物件搬去高地，但系箇阵已经挨晚呀，想下今晚点瞓得安乐呢，若系有野兽毒蛇岂毋危险咩，虽然噉样想下，后来亦知到呢个岛实系冇野兽毒蛇嘅，就𢬿装嚟嘅箱，共箇啲板，整成一间屋仔，可以喺处瞓，忽然想下，我所带嚟食物，若食完，又点呢，呢处冇蔬菜，五谷，肉食，记得在山箇时睇见有只兽，好似兔，又毋系兔，亦毋知到佢好食嘅毋好食，想哓好耐，明日用乜嘢法子，再到大船处攞物件，呢啲事要商量，忽然笑起嚟话在呢个岛处，无别二个人，共乜谁商量呢，独系自己个心共个口商量呮，讲到呢阵，好疚癐就瞓，过哓一晚，到明日想一定到大船处，毋使昨日嘅木排系游水去，就将衣服脱晒，挤落瞓箇处，游水到大船，先入木匠嘅房，𢬿所用嘅斧头铁凿，几十件攞晒，又攞小钉共极大嘅钉，磨刀石，共埋起重物嘅千斤，又入军器房，攞火枪，鸟枪，火药，弹子，好多物件，亦𢬿板钉成木排，挤晒排上，又将各人衣服，及篷𢃇嘅布帐，堆埋排上，挤到满哓为止，照依昨日嘅法子，装到岸上，十分平安，在船箇时，想下岸上有咁多物件，或系俾野兽所食，点算好呢，后来上岸到瞓箇处，见箇啲物件喺处，心中好欢喜咯。